19:58, 23 May 2019 (Cümə axşamı) 151

"47 aqropark yaradılıb, hamısı da məmurlara məxsusdur"

Prezident İlham ƏIiyev mayın 21-də "Azərbaycan Respublikasının Kənd Təsərrüfatı Nazirliyi  yanında Aqrar Xidmətlər Agentliyi haqqında Əsasnamə”nin təsdiq edilməsi barədə” fərman imzalayıb.
 
 

Fərmana əsasən, Nazirlər Kabineti Azərbaycan Respublikası Prezidentinin aktlarının bu Fərmana uyğunlaşdırılması ilə bağlı təkliflərini üç ay müddətində hazırlamalı, Nazirlər Kabinetinin normativ hüquqi aktlarının bu fərmana uyğunlaşdırılmasını üç ay müddətində təmin etməli, mərkəzi icra hakimiyyəti orqanlarının normativ hüquqi aktlarının bu fərmana uyğunlaşdırılmasını nəzarətdə saxlamalı və icrası barədə beş ay müddətində Azərbaycan Respublikasının Prezidentinə məlumat verməli, həmçinin fərmandan irəli gələn digər məsələləri həll etməlidir.

Kənd Təsərrüfatı üzrə ekspert Vahid Məhərrəmov Toplum.Tv-yə deyib ki, belə qrumların yaradılması kənd təsərrüfatına heç bir fayda verməyəcək: "Prezidentin sərəncamı ilə çoxlu qurumlar yaradılıb. Əvvəllər rayonlarda kənd təsərrüfatı idarələri var idi. Sonra isə bu qurumu Aqrar İnkişaf Mərkəzi etdilər. Burada əvvəl 99 nəfər işləyirdi, sonra isə bu sayı artırıb 750 çatdırdılar. Amma idarələrin yaradılması mahiyyətcə heç nəyi dəyişmədi. Yenə də kənd təsərrüfatda istehsal azdır. Hazırda kənd təsərrüfatı sahəsində kifayət qədər lazımsız ştat var. Bu ştatların kənd təsərrüfatına heç bir adiyyatı yoxdur. Hər rayonda lazım olduğundan artıq işçi qəbul ediblər. Amma onların heç kənd təsərrüfatından anlayışları yoxdur. Məsələn, sürücü, xadimə , katibə, kadrlar üzrə mütəxəsis və s. saymaqla qurtarmaq olmaz. Hazırda kənd təsərrüfatında mütəxəsisə ehtiyac olan bir vaxtda belə qrumların yaradılması, ştatların artırılması ziyandan başqa heç bir faydası yoxdur. İndi daha çox aqronomlara, topraqşünaslara, zootexniklərə, baytarlar ehtiyac var. Bunlardan başqa heç bir ştata ehtiyac yoxdur. Ona görə ki Azərbaycanda kənd təsərrüfatı məhsullarının istehsalı azdır. Yeni qurumların yaradılması dövlət büdcəsindən əlavə vəsait tələb edəcək və kənd təsərrüfatına heç bir fayda verməyəcək".

"Ola bilsin ki, bu qrumlar  dövlət məmurlarının biznesini idarə edəcək. Ölkədə qırx yeddi aqropark yaradılıb və bunların da hamısı yüksək vəzifəli dövlət məmurlarına məxsusdur. Onların idarə edilməsi ola bilsin ki, indi dövlət büdcəsi hesabına həyata keçiriləcək. Yaradılan qurumlar isə dolayısı ilə həmin məmurlarının biznesini idarə etmək və ya yardım etməklə məşğul olacaqlar ”, - deyə ekspert qeyd edir.

Lalə Tağızadə