18:26, 12 İyun 2019 (Çərşənbə) 68

"Azərbaycan Dəmir Yolları” QSC yeyinti ittihamlarına cavab verdi

"Azərbaycan Dəmir Yolları” QSC-nin (ADY)  yaydığı açıqlamaya görə, 2019-cu ilin birinci rübündə Belarus Respublikasından hər hansı vaqon alınmayıb.

ADY fəaliyyəti ilə bağlı yayılan informasiyaları  qərəzli və həqiqətə uyğun olmadığını deyib: "2018-ci ildə Belarus Respublikasından 2 ədəd sərnişin vaqonu deyil, İsveçrənin "Stadler Rail Group” şirkətindən onun Belarus Respublikasındakı zavodunda komplektləşdirilmiş hər biri 4 vaqondan ibarət olan 2 ədəd ən müasir texnologiyalar ilə təchiz edilmiş ikimərtəbəli "KİSS” markalı elektrik qatarları alınıb. Sözügedən qatarlar Bakı-Gəncə-Bakı istiqamətində hərəkət edirlər”.

Açıqlamada Avropa ilə, Azərbaycan dəmir yolu xətlərinin standartının fərqli olduğu deyilib. Buna görə də, İsveçrənin "Stadler Rail Group” şirkətinin Azərbaycan standartlarına cavab verən qatarları isə həmin şirkətin məhz Belarus Respublikasındakı zavodunda komplektləşdirildiyi bildirilib.

"Bəzi kütləvi informasiya vasitələrində və sosial şəbəkələrdə məsələ ilə bağlı həqiqəti əks etdirməyən, ictimaiyyətdə çaşqınlıq yaratmaq məqsədi daşıyan qeyri-peşəkar məlumatların yayılması olduqca təəssüf hissi doğurur”, - deyə qurumun açıqlamasında bildirilib.

İqtisaçı Nemət Əliyev Polşa və Rusiyanın 1,7 milyon dollara satın aldığı vaqonu Azərbaycan 15,2 milyon dollara aldığını iddia etmişdi. 

Ekspert bu ticarəti rəzalət adlandırmışdı.

Uğur Fərzəli