Nazirlər Kabineti yanında Operativ Qərargahın qərarına əsasən martın 29-dan Bakı metrosunun iş vaxtı məhdudlaşdırıb.
İndi metro yalnız səhər 7-9 və axşam 17-20 arası işləyir. Məqsəd koronavirusa yoluxmanı önləmək olsa da, səhər və axşam işə, evə tələsənlərin çoxluğu sıxlığa səbəb olur. Bu vəziyyətdəsə infeksiyadan qorunmaq üçün sosial məsafəni saxlamaq mümkün olmur.
Buna görə də qərardan narazılar var. Narazılar xüsusən də karantin günlərində işləmək məcburiyyətində olanlardır. Onlardan biri bankda işləyən Sahib Ağayevdir (ad şərtidir). Hər gün metrodan istifadə edir.
"Bank sektorunda işlərin dayanması, işləməməyimiz ölkə iqtisadiyyatının çökməsi deməkdir. Düzdür, iş prosesində mümkün qədər özümüzü qorumağa çalışırıq. Ancaq yenə də risk altındayıq”.
S.Ağayevin narahatlığını artıran səbəblərdən biri də metronun yalnız bəlli saatlarda işləməsi və bu səbəbdən yaranan sıxlıqdır. O danışan zaman yaşadığı qorxu və həyəcan gözlərindən belə açıq oxunur.
"Evdə iki körpə övladım, yaşlı anam var. Hər gün işdən evə geri dönəndə mənimlə birgə koronavirus da evimə girəcək deyə qorxuram. Səhər, axşam metroda nə qədər insanla yanaşı gedirəm. Metro ancaq müəyyən saatlarda işləyir deyə insanlar işlərini həmin vaxta salırlar. Ona görə də sıxlıq yaranır. Bəziləri maskadan belə istifadə etmir. Heç olmasa vaqonlar tez-tez gəlsə sıxlığın qarşısı alınardı”.
Bakı Metropoliteni Qapalı Səhmdar Cəmiyyətinin qaynar xəttinə zəng edirik. Ordan gün ərzində bu tipli şikayətlərin bir neçə dəfə edildiyini bildirirlər.
Metropolitenin ictimaiyyətlə əlaqələr şöbəsinin rəhbəri Bəxtiyar Məmmədov Toplum TV-yə açıqlamasında deyir: "Bir stansiyada hər iki istiqamətdə hərəkət edən qatarların sayı saatda 48-dir. Hər qatarın da 1500 nəfər tutumu var. Bu da sərnişinlərə imkan verir ki, istər stansiyalarda, istər vaqonlarda lazımi ara məsafəsini qorusunlar”.
O sıxlığı azaltmaq üçün daha bir nəzarət mexanizmi tətbiq etməyə başladıqlarını söyləyir. B.Məmmədovun sözlərinə görə, metro stansiyalarının girişində sərnişinlərin hərəkətini bir qədər də məhdudlaşdıran istiqamətləndiricilər qoyulub. Metropolitenin sözçüsü sərnişin sıxlığı olan bir neçə stansiyada əlavə səsgücləndiricilərlə sərnişinlərə elanlar, tövsiyələr verilməsini intensivləşdirəcəklərini bildirir.
Bəxtiyar Məmmədov vətəndaşlara evdə qalmağı və "kəskin zərurət” olmadıqca metropalitendən istifadə etməməyi tövsiyə edir. Bundan başqa sərnişinlərdən metropolitendən istifadə edərkən ara məsafənin qorunmasına daha diqqətli olmağa çağırır.
"Metropaliten ərazisi qapalı mühitdir və belə mühitdə virusun yayılması daha sürətlə baş verə bilər”, - deyə B.Məmmədov izah edir.
Həkim Vasif İsmayıl da metrodakı sıxlığın infeksiyanın yayılma sürətini artıracağını deyir.
Gigiyena və Epidemiologiya Mərkəzinə zəng etsək də onlar Səhiyyə Nazirliyinin izni olmadan danışa bilməyəcəklərini söylədilər.
Zülfiyyə Quliyeva
Toplum TV Azərbaycanın müstəqil xəbər platformasıdır. Ölkədə və bölgədə baş verən hadisələri dəqiq və qərəzsiz şəkildə izləyicilərimizə çatdırırıq.
Toplum TV hər gün siyasət, iqtisadiyyat, sosial, kriminal, gender mövzularında reportajlar və xəbər proqramları, tolk-şou və müsahibələri diqqətinizə təqdim edir.
Ən doğru xəbərləri izləmək üçün Toplum TV-yə abunə olun.