20:00, 11 İyun 2019 (Çərşənbə axşamı) 52

"Bu vəziyyətdə insanı həbsdə saxlamaq onu məqsədli şəkildə öldürməkdir"-Elçin Qasımov

Müsəlman Birliyi» Hərəkatı İdarə Heyətinin üzvü Əbülfəz Bünyadovun həyat yoldaşı deyir ki, Əbülfəz onsuz da yataq xəstəsiydi, hərəkət edə bilmirdi. İndi vəziyyəti lap pisləşib: "İyunun 5-də yanına getmişdik, elə gündədir ki, görəndə tanımadıq. O, uzun müddət tab gətirə bilməz"

Əbülfəz Bünyadov yalnız başını və əllərini tərpədə bilir. 26 noyabr 2015-ci ildə Nardaranda əməliyyat zamanı onurğasından iki güllə yarası alıb və o vaxtdan yataq xəstəsidir.
 Nardaranda ikisi polis olmaqla, altı nəfərin öldüyü əməliyyat onun həyətində keçirilib.

Həyat yoldaşının sözlərinə görə, Əbülfəz Bünyadov son vaxtlar yeyib-içməkdən də kəsilib, bağırsaqlarına infeksiya düşdüyü üçün qida qəbul edə bilmir: "Əbülfəzin durumu məlumdur, bu üzdən onun səhhətində illərdir problem var. Hərəkət qabiliyyətini itirməsi, uzanıqlı vəziyyətdə qalmağın yaratdığı yaralar, qaraciyərində Hepatit C... İndi üstəgəl bağırsaq infeksiyası. Ondan analiz götürüldü, aparıb kənarda yoxlatdırdıq, məlum oldu ki, güclü infeksiya düşüb, bir də göbələk var. Bağırsaqlar da daha işləmir. Heç dərman da qəbul edə bilmir. Çox pis vəziyyətdədir".


Əbülfəz Bünyadova 15 il cəza kəsilib və o, Penitensiar Xidmətin Müalicə Müəssisəsində saxlanılır.

Ə.Bünyadova Müalicə Müəssisəsində olan başqa məhbuslar qulluq edir. Həyat yoldaşı deyir ki, kiçik otaqda beş nəfər saxlanılır və üstəlik təmizlik problemi var.

"Bu vəziyyətdə insanı həbsdə saxlamaq onu məqsədli şəkildə öldürməkdir. Əbülfəz Bünyadov dərhal azad olunmalı, ciddi həkim nəzarətinə götürülməlidir. Əks halda, onun başına gələcəklərə görə məsuliyyəti onu qanunsuz olaraq həbsdə saxlayanlar daşıyacaq" - "Müsəlman Birliyi" Hərəkatının sədr müavini, Nardaran hadisələri ərəfəsində həbs olunan və bu il martın 17-də əfv fərmanıyla azadlığa buraxılan Elçin Qasımov deyir. 

Məsələyə Penitensiar Xidmətdən münasibət öyrənmək mümkün olmayıb.

Ə.Bünyadov Nardaran əməliyyatında yaralanaraq iflic olmasına baxmayaraq, həmin gün tutulub. O, 1 il 1 ay həbsdə saxlanılıb, 2016-cı ilin sonunda polis nəzarətinə vermə-qətimkan tədbiri ilə həbsdən buraxılıb.

2018-ci il iyulun 11-də 15 illik həbsi haqqında hökm oxunub və elə məhkəmə zalında həbs edilib. Hökmə görə o, 15 illik cəzanın ilk 3 ilini Qobustanda həbsxana rejimində çəkməlidir.

"Müsəlman Birliyi" Hərəkatının sədri Taleh Bağırov, onun müavini Elçin Qasımov da daxil, təşkilatın xeyli üzvü həbs olunub. Onlar dövlət çevrilişi, terror cəhdi, qanunsuz silah saxlama və başqa maddələrlə 10 ildən 20 ilədək azadlıqdan məhrum ediliblər.

T.Bağırov və onunla birlikdə mühakimə olunmuş digər şəxslər kimi, Ə.Bünyadov da saxlanılarkən və ondan sonra DİN-in Baş Mütəşəkkil Cinayətkarlıqla Mübarizə İdarəsində işgəncələrə məruz qaldığını söyləyib.

Həmin idarənin əməkdaşları isə məhkəmədə ifadə verərkən işgəncə iddialarını təkzib ediblər.

Nardaran məhbuslarının bir hissəsi Prezident İlham Əliyevin martın 16-da imzaladığı əfv sərəncamı ilə azadlığa buraxılıb.