Həyətdəki səssizlik insanı hürküdür.
Bərdə rayonunun İmamqulubəyli kəndindəki bir sahənin ortasında qurulan evi qamışdan hörülən yarım hasar və külək gücünə yıxılacaq darvaza əhatə edir.
İlk baxışdan heç evə də oxşamır, elə mənzilin girişi də zülmətə qərq olub. Pəncərəsiz otaqlar, gün işığı dəyməyən divarlar... dəhlizboyu rütubət qoxuyur.
4 nəfərlik yalnızlıq var idi evdə. Ata hənirtisinə susamış 3 cüt göz baxırdı qapıya...
Sonradan öyrənəcəkdik ki, bu uşaqların ikisi məktəblidir. Amma gözləyirlər ki, yaşları 10 olan kimi evə pul gətirsinlər.
Üçüncünün - sonbeşiyin isə hələ 4 yaşı var. Həyatı düşünmədən, hərəkət etmədən, ağrılarla keçir. Hər xırda yad səsə dəqiqələrcə ağlayır. Anasının qoxusunu duyana qədər sakitləşmir. Gülməyi belə bacarmır, əzələlərini özü idarə edə bilmir, çünki…
Evin sahibəsi Sveta Novruzova heç yerdə işləmir. Ailənin stabil gəlir yeri 160 manatlıq sosial yardımdır.
O pul isə bir ayda 4 nəfərin qarnını doyurmağa yetmir. Amma ananın əsas dərdi başqadır, körpə Aynişanın müalicə olunmasını, sağalmasını istəyir.
Dediyinə görə, qızına hamilə olarkən həyat yoldaşının yeməsi üçün əncir yığmağa gedib. Elə əncir ağacından da yıxılıb. Nəticədə körpə iflic doğulub.
İmkansızlıq, iflic doğulmuş körpə və daha iki azyaşlı…
Sveta xanımın sözlərinə görə, həyat yoldaşı bunlara dözməyib, onları atıb gedib. Bundan sonra nə maddi, nə də mənəvi dəstək verib onlara. Məhkəmədə boşandıqdan sonra üzünü belə görməyiblər.
Sveta Novruzova deyir ki, əslən Tərtər rayonunun İsmayılbəyli kəndindəndir. Sonradan məcburi köçkün kimi bu kəndə pənah gətiriblər. İndi yaşadıqları bu ev də vaxtilə kolxoz binası olub, onlara sığınacaq kimi verilib.
Otağın döşəməsi betondandır. Döşəmənn ortasına kiçik xalça salınıb. Tavanda su izləri var. Nəmişlikdən şişib, ikiyə ayrılıb. Divarlar da rütubətdən göbələkləyib.
Ev sahibəsi deyir ki, evi odun sobası ilə qızdırırlar. Ona görə də qışın şaxtası düşənə qədər sobadan istifadə etmirlər: "Çünki evdə nə odun doğramağa kişi, nə də kəsməyə ağac var. Elektrik sobasını bir neçə gün əvvəl anamgil alıb gətirdi. Onların da imkanları yoxdur. Anam aldığı pensiyanı da mənə sərf edir. Uşaqların ikisi məktəbə gedir. Dəftər-qələmi, üst- başı var. Qızımın dərmanları bir yandan, bezləri bir yandan. Özümün də belimdə yırtıq yaranıb. Çay, çörək pulunu heç demirəm”.
O, dəfələrlə işləməyə cəhd etdiyini, lakin qızına görə evdən çıxa bilmədiyini deyir: "Bacımın övladı olmurdu. Düşündük ki, üçüncü uşaq dünyaya gələndə ona övladlığa verək. Aynişan iflic doğuldu deyə vermədim, özüm saxladım”.
Uşağın başqa dərdləri də var. Bu barədə danışan ana gözyaşlarını saxlaya bilmir: "Həkimlər ürəyində bir neçə dəlik olduğunu, uzun müddət yaşamayacağını deyirlər. Amma mən ümidimi kəsmirəm, onun böyüməsini istəyirəm, körpə ikən torpağa getməsini yox”.
Gülzar N. Məmmədli
Toplum TV
Toplum TV Azərbaycanın müstəqil xəbər platformasıdır. Ölkədə və bölgədə baş verən hadisələri dəqiq və qərəzsiz şəkildə izləyicilərimizə çatdırırıq.
Toplum TV hər gün siyasət, iqtisadiyyat, sosial, kriminal, gender mövzularında reportajlar və xəbər proqramları, tolk-şou və müsahibələri diqqətinizə təqdim edir.
Ən doğru xəbərləri izləmək üçün Toplum TV-yə abunə olun.