20:39, 23 May 2019 (Cümə axşamı) 304

Kamran Əsədov: "Kollec məzunlarının yenidən imtahan vermələrinə ehtiyac yoxdur"

Kamran Əsədov:
Yeni qaydalara əsasən, kollec məzunlarının ali məktəbə qəbul olunmasında yer məhdudiyyəti olmayacaq.

Bunu Təhsil Nazirliyinin şöbə müdiri Yaqub Piriyev Təhsil Nazirliyində 20 may 2019-cu il tarixində Nazirlər Kabinetinin təsdiq etdiyi qərarlarla bağlı mətbuat konfransındakı çıxışında deyib. 
 
 
Yaqub Piriyev

Onu sözlərinə görə, bu qəbul planı Nazirlər Kabinetinin qərarına əsasən, 6,4 faiz artıb: "Bu da onu göstərir ki, orta ixtisas təhsil müəssisələrini bitirənlərin ali məktəblərə qəbul faizi çoxdur. Həmçinin ümumtəhsil müəssisəsini bitirən məzunların sayı da ötən ilə nisbətən azdır. Ötən il qəbul planı 45 500 idi, bu il isə 48 506 yer müəyyən edilib. Bu da ali məktəbə qəbul şansını artırır”.

Şöbə müdiri qeyd edib ki, əvvəlki illərdə kolleci bitirən şəxs üçün yalnız bir yol vardı. 

Yeni qaydalar isə imtahansız qəbula imkanlar yaradır: "Lakin əsas tələb budur ki, pedaqoji kolleci bitirən şəxs sırf pedaqoji sahədə təhsilini davam edə bilər. Kollec məzunu 600 ballıq bir ixtisasa sənəd verə bilməz. O, imtahanda iştirak etmədən, sadəcə, 200-250 minimal bala sahib olmalıdır”.

Təhsil eksperti Kamran Əsədov Toplum.Tv-yə bildirib ki, bu qərar təhsilin əlçatımlılığı üçün müsbət addımdır: "Burda müvafiq dövlət qurumu tərəfindən mətbuat konfransında ifadələri düzgün istifadə olunmayıb. Qeyd edim ki, 2019-cu ildən etibarən məzunların ali təhsil müəssisələrinə qəbulu ilə bağlı bir neçə yenilik  tətbiq olunub. Builki yeniləyə görə kollec məzunları ali məktəblərə  imtahan vermədən müsahibə yolu ilə qəbul olma hüququna malikdir. Kollec məzunları  yalnız oxuduğu ixtisas üzrə ali məktəbə müsahibə yolu ilə qəbul ola bilərlər. Amma onlar qəbul imtahanında iştirak edərək istədikləri ixtisasda təhsil ala bilərlər. Qərarın 3.5-ci maddəsinə görə, qəbul imtahanı verən abituriyentlər ali təhsil müəssisələrinə yerləşdirildikdən sonra boş qalan yerlərə kollec məzunları qəbul ola biləcək, yəni onlar bərabər müsahibəyə buraxılmayacaqlar. Mətbuat konfransında düzgün ifadə olunmayan məqamlardan biri də qərarın 2012-ci ildən etibarən qəbul olunanlara şamil edilməsidir. Nazirlər Kabineti tərəfindən qəbul olunan qərarda belə bir müddəa yoxdur. Yəni bu qayda hamıya şamil olunur”.

"Kollec məzunları təhsil aldıqları ixtisasa dair bilik və bacarıqlara sahibdirlər. Ona görə də ali təhsil müəssisələrinə qəbul zamanı yenidən imtahan vermələrinə ehtiyac yoxdur”, - deyə ekspert bildirib. 
 
Lalə Tağızadə