13:03, 12 Noyabr 2019 (Çərşənbə axşamı) 70

Müsavat Partiyasının üzvləri kütləvi şəkildə saxlanılır

Müsavat Partiyasının üzvləri kütləvi şəkildə saxlanılır
Müsavat Partiyasının bir neçə fəalı noyabrın 12-də səhər saatlarında saxlanılaraq polis bölmələrinə aparılıb. 

Bu barədə partiyanın icra aparatının rəhbəri Gülağa Aslanlı Toplum.tv-yə məlumat verib.

Onun sözlərinə görə, partiyanın Siyəzən təşkilatının sədri Mərdan Mehdilini, Nərimanov rayon təşkilatının fəalı Valeh Hümmətoğlunu, Xətai təşkilatının sədri Qəzənfər Baxışovu evlərindən aparıblar.

Partiya başqanının müavini Razim Əmiraslanlının barəsində isə məlumat yoxdur. O, noyabrın 11-də səhər Binəqədi Rayon Polis İdarəsinə çağırılıb", - Gülağa Aslanlı qeyd edib.   
  
Partiya rəsmisi bildirib ki, Müsavatın mətbuat katibi Mustafa Hacıbəylinin telefonuna zəng çatmır: "Mustafa Hacıbəyli səhər evdən çıxıb. Çox güman ki, onu da yolda saxlayıblar".

Sumqayıtda polis Müsavat fəalı Bərşad Cümşüdlünün mənzilinə gəlib. 

Gəncədə  müsavatçılar Cahangir Əmirxanlı, Vidadi Həsənli və Oqtay Zeynalova saat 10:00-da polisə getmək tapşırılıb.

G.Aslanlı qeyd edib ki, kütləvi saxlanmalarda məqsəd Müsavat Partiyasının bu gün saat 15:00-da Bakı Şəhər İcra Hakimiyyətinin qarşısında keçirəcəyi piketi pozmaqdır.

Müsavat Partiyasının başqanı Arif Hacılı isə bildirib ki, noyabrın 12-də səhər polis və mülki geyimli şəxslər partiyanın mənzil-qərargahını əhatəyə alıblar: "Mənzil-qərargaha gələnlər dərhal saxlanılır”.

Müsavat partiyası noyabrın 12-də Bakı Şəhər İcra Hakimiyyətinin (BŞİH) qarşısında icazəsiz piket təşkil edib. Buna səbəb BŞİH-nin partiyanın icazəli mitinq müraciətinə müsbət cavab verməməsidir. 

Aytac Ağazadə