17:49, 25 Noyabr 2019 (Bazar ertəsi) 281

"Normal bir komitə niyə sorğu aparsın ki, qadını döymək olar, ya yox?"

"Ailə, Qadın və Uşaq Problemləri üzrə Dövlət Komitəsinin apardığı sorğu, sadəcə, gülüncdür”.

Bunu Toplum.Tv-yə gender aktivisti Rəbiyyə Məmmədova Ailə, Qadın və Uşaq Problemləri üzrə Dövlət Komitəsinin sədri Hicran Hüseynovanın açıqlamasını şərh edərkən deyib. 

Komitə sədri "Qadınlara və qızlara qarşı zorakılığa son" kampaniyasına həsr olunan "dəyirmi masa"da bildirib ki, sorğular zamanı qadınların 20,9 faizi şiddətə meyilli olub: "Apardığımız təhlillər zamanı kişilərin 41 faizi, qadınların 34,7 faizi bildirib ki, qadın öz ailəsini qoruyub saxlamaq üçün zorakılığa dözməlidir. Həmçinin qadınların 20,9 faizi, kişilərin 37,4 faizi isə qeyd edib ki, bəzi zamanlar qadın döyülməyə layiqdir".

Rəbiyyə Məmmədova hesab edir ki, Ailə, Qadın və Uşaq Problemləri üzrə Dövlət Komitəsinin belə sorğular aparması doğru deyil: "Hicran Hüseynova anlamır ki, Statistika Komitəsinin yox, Ailə, Qadın və Uşaq Problemləri üzrə Dövlət Komitəsinin rəhbəridir. Əgər qadınlar belə düşünürlərsə, demək, Hicran xanım da anlamır ki, onun işi qadınlar arasında maarifləndirmə aparmaqdır, statistika yox. Normal bir komitə niyə gedib sorğu aparsın ki, qadını döymək olar, ya yox? Sivil ölkələrdə bu, təhqir sayılır. Lap tutaq ki, deyiblər. Bəs komitə rəhbəri başa düşmür ki, qadınların belə cavab verməsinin bilavasitə günahkarı onun özüdür. Bu sorğu apardığı maarifləndirmə və təbliğatın nəticəsidir. Açığı mən 20 oktyabra - "Qadına şiddətə son" aksiyasına qədər Hicran Hüseynovanın adını belə eşitməmişdim. 20 oktyabr aksiyasının ən böyük uğurlarından biri  Ailə, Qadın və Uşaq Problemləri üzrə Dövlət Komitəsinin dirilməsi oldu". 

"Bu ölkədə nə qədər şiddət qurbanı varsa, hamısının qanında Hicran Hüseynova kimilərinin əli var. Çünki onun vicdanı məsuliyyət daşıyır. Stol arxasında oturub etdikləri söhbətə bax. Problemləri həll etmək, maarifləndirmə aparmaqdansa, 3 nəfər arasında keçirdikləri sorğudan danışır. Hicran Hüseynova əgər bu problemlərin həllində özünü göstərməyə çalışdığı kimi səmimidirsə, İstanbul Konvensiyasının ratifikasiya olunmasına çalışmalıdır. Bu sahədə işlər görməlidir. Bu problemin həlli ilə bağlı Ailə, Qadın və Uşaq Problemləri üzrə Dövlət Komitəsi Nazirlər Kabinetinə yazılı müraciət göndərdi. Yaxşı bəs sonra? Hicran Hüseynova, həqiqətən, qadın, ailə problemlərinin həllini istəyirsə, qanunun Milli Məclisdə qəbul olunmasına çalışmalıdır”, - deyə Rəbiyyə Məmmədova deyib. 

Gender aktivisti ötən gün ölkədə baş vermiş qətl hadisəsinə də toxunub: "Dünəndə bir qadının başı kəsildi. Bütün telekanallar dünəndən bunu göstərir, ancaq Hicran Hüseynova bununla bağlı heç bir iş görmür. Gördüyü iş 5-6 nəfəri yığıb onlar arasında sorğu keçirməkdir. İndi də gəlib deyir ki, qadınlar özləri döyülməyin tərəfdarıdır. Görün nə qədər gülüş doğuran hadisədir?”

"Hicran Hüseynova bu sorğunu aparmaqdansa, gedib dövlət qarşısında vəsatət qaldırmalı idi ki, sığınacağımız yoxdur, sığınacaq açaq. Ailədaxili şiddət görən qadınların əksəriyyəti sığınmağa yer tapmır, nəticədə illərlə davamlı şiddətə məruz qalırlar. Bu boş sorğunu keçirməkdənsə, Hicran Hüseynova qadınların iqtisadi azadlığı üçün çalışmalı idi. Ona görə də Hicran Hüseynovanın apardığı sorğu sadəcə çox gülüncdür”.

Şəmsiyyə İbişova