Ali Məhkəmə jurnalist Rasim Əliyevin döyülməsində suçlanaraq 9 il həbs cəzası almış Samir Mustafayevin kassasiya şikayətini təmin etməyib.
Məhkəmənin məlumatına görə, kassasiya şikayəti ilə bağlı yekun qərarı Tahir Kazımovun sədrlik etdiyi hakimlər kollegiyası dekabrın 7-də verib.
Məlumata görə, S.Mustafayev kassasiya şikayətində təqsirsiz olduğunu bildirib. Şikayətdə qeyd edilib ki, o, nə R.Əliyevi, nə də qarşı tərəfi tanıyıb. Üstəlik, şikayətdə vurğulanıb ki, o, jurnalistin döyülməsində də iştirak etməyib. Şikayətə görə, təhlükəsizlik kameralarının qeydə aldığı görüntülər də bunu təsdiq edir.
Onun vəkilləri məhkəmədən xahiş ediblər ki, bəraət hökmü çıxarılsın.
Ancaq T.Kazımovun sədrlik etdiyi hakimlər kollegiyası S.Mustafayev barəsində qərarın dəyişdirilmədən saxlanılmasına, kassasiya şikayətinin təmin edilməməsinə qərar verib.
Jurnalist R.Əliyevi futbolçu Cavid Hüseynovla Facebook şəbəkəsində yaşadığı insident zəminində 2015-ci il avqustun 8-də bir qrup şəxs döymüşdü. Bir gün sonra isə o, Kliniki Tibbi Mərkəzdə vəfat etmişdi.
Bu hadisə ilə əlaqədar Kənan Mədətov, Camal Məmmədov, Samir Mustafayev, Elşən İsmayılov, Arif Əliyev və futbolçu C.Hüseynov tutulub. İstintaqın sonunda C.Hüseynov haqqında cinayət işi ayrılıb.
Cinayəti bilib xəbər verməməkdə suçlanan C.Hüseynov 2016-cı il mayın 31-də Səbail Rayon Məhkəməsinin hökmü ilə 4 il azadlıqdan məhrum edilib. Bakı Apellyasiya Məhkəməsi 2016-cı il oktyabrın 12-də onun cəzasını 1 il 2 aya endirib və o, azadlığa buraxılıb.
Bakı Ağır Cinayətlər Məhkəməsinin hökmü ilə K.Mədətov və S.Mustafayevin hər biri 9 il, C.Məmmədov 11 il , A.Əliyev 12 il 6 ay, E.İsmayılov isə 13 il azadlıqdan məhrum edilib. Bakı Apellyasiya Məhkəməsi də bu hökmü qüvvədə saxlayıb.
Bu işlə bağlı həbs edilənlər kimi, jurnalistin valideynləri də verilmiş hökm və qərarlarla razılaşmırlar. Onlar hesab edir ki, jurnalistin ölümünə görə onun vəfat etdiyi xəstəxananın həkimləri də məsuliyyətə cəlb edilməli idi. Üstəlik, onlar düşünürlər ki, futbolçu C.Hüseynovun bu məsələdə məsuliyyəti yalnız cinayəti bilib gizlətməkdən ibarət olmayıb.
Azadlıq Radisou
Toplum TV Azərbaycanın müstəqil xəbər platformasıdır. Ölkədə və bölgədə baş verən hadisələri dəqiq və qərəzsiz şəkildə izləyicilərimizə çatdırırıq.
Toplum TV hər gün siyasət, iqtisadiyyat, sosial, kriminal, gender mövzularında reportajlar və xəbər proqramları, tolk-şou və müsahibələri diqqətinizə təqdim edir.
Ən doğru xəbərləri izləmək üçün Toplum TV-yə abunə olun.