17:52, 04 Oktyabr 2019 (Cümə) 1448

Rusiyalı jurnalist İranda saxlanılıb

Rusiyalı jurnalist İranda saxlanılıb


/ DÜNYA
Rusiyalı jurnalist Yulia Yuzik İranda saxlanıb. Məlumatı onun qohumları, həmkarları və Tehrandakı Rusiya səfirliyinin əməkdaşı verib.

Yuzik-in qızı anasının Facebook səhifəsində yazıb ki, jurnalistin "böyük problemləri var” və oktyabrın 5-nə təyin olunmuş məhkəmə prosesində "onun taleyi həll olunacaq”.

Jurnalistin keçmiş həyat yoldaşı, jurnalist Boris Voitsekhovsky AzadAvropa/AzadlıqRadiosu-na deyib ki, o, İsrail üçün casusluqda ittiham olunur. Ancaq bu informasiya rəsmən təsdiqlənməyib.
 
Səfirliyin sözçüsü Andrei Ganenko oktyabrın 4-də "Interfax” agentliyinə deyib ki, rusiyalı diplomatlar durumdan məlumatlıdır və daha çox informasiya əldə etməyə çalışırlar. 

Voitsekhovski-nin sözlərinə görə, Yuzik təqsirli bilinsə, onu 10 ilədək həbs cəzası gözləyir. O, Yuzik-in Rusiyanın bir media orqanı üçün İranda çalışdığını, bu həftənin əvvəlində Tehrana gedəndən sonra həbs olunduğunu bildirib. Voitsekhovski deyir ki, qadının pasportu Tehrana ayaq basan kimi sərhəd xidməti tərəfindən alınıb.

Yuzik 1981-ci ildə Rusiyanın Rostov regionunda doğulub. O, 2003-cü ildə "Allahın gəlinləri” kitabıyla tanınıb. Kitabda Rusiyanın Şimali Qafqaz regionunda qadın intiharçılardan söz açılır.