22:14, 31 Mart 2020 (Çərşənbə axşamı) 570

"Sabah gəlib necə deyəcəklər ki, övladını ver, əsgər aparaq?"

"Məgər mən Azərbaycan vətəndaşı deyiləm? Bu gün mənimlə, 4 övladımla maraqlanmayan dövlət sabah qapımı döyəcək ki, gəlmişik oğlunu hərbi xidmətə aparaq. 5 yaşında oğlumun nə yeyib-içdiyi ilə maraqlanmayan dövlət 17 yaşında balamı hansı haqla məndən istəyəcək?..” 

Cavabsız sualların içinə boğulub qalan müsahibim 40 yaşlı, 4 uşaq atası Ceyhun Mamedovdu. 

O, ailəsi ilə cəbhə bölgəsində yaşayır. Bir tərəfdən hər gün pozulan atəşkəs, bir tərəfdən kasıbçılıq onu sıxsa da, indiyədək bacardığı kimi ailəsinə baxmağa çalışıb. Ancaq son günlər koronavirusla bağlı xüsusi karantin rejiminin elan edilməsi vəziyyətini daha da çətinləşdirib.

"Allah bütün balaları saxlasın, içində də mənim 4 övladımı. Onlar gün görsün deyə varam, son nəfəsimə kimi də onlar üçün çalışacam. Düzdür, heç zaman yaxşı imkanım olmayıb, amma fəhləlik edərək uşaqlarımı kiminsə yanında boynubükük qoymamışam. Bu xəstəlik çıxandan sonra fəhləlikdən qazandığım pul da kəsildi. Mən də istəyərəm evdə qalım, bilmirik küçədə kim xəstədir, kim sağlamdır. Amma xəstəlikdən qoruduğum uşaqlarım belə getsə acından xəstələnəcək”, - deyir vətəndaş. 

Buna görə də C.Mamedov işsiz qalan əhaliyə hökumətin yardım etməsini istəyir. Əslində, indi bunu tək o yox, çoxu istəyir. 

Toplum TV bu məqsədlə Nazirlər Kabineti yanında Operativ Qərargahın ictimayətlə əlaqələr şöbəsinin rəhbəri İbrahim Məmmədovla əlaqə saxlayıb. 

 
 
O, "zamanım yoxdur, nə zaman da olacaq, bilmirəm” deyərək sualı cavablandırmayıb. 

Əmək və Əhalinin Sosial Müdafiəsi Nazirliyinin əlaqələr şöbəsinin rəhbəri Fazil Talıbov bildirib ki, həm sahibkarlara, həm də günəmuzd işçilərə yardımla bağlı təkliflər hökumətə təqdim edilib: "Pandemiyanın milli iqtisadiyyata, eyni zamanda bunun məşğulluğa mənfi təsirinin azaldılması üçün dövlət tərəfindən məqsədyönlü işlər aparılır. Prezident İlham Əliyevin 19 mart 2020-ci il tarixli Sərəncamı ilə yaradılmış İşçi Qrup koronavirus pandemiyasından zərər çəkməsi ehtimal olunan iqtisadi fəaliyyət sahələri üzrə yarana biləcək məşğulluq problemlərinin həlli, bu sahələrdə çalışanların sosial müdafiəsinin gücləndirilməsi məqsədilə müvafiq dəstək proqramları üçün təkliflər hazırlayıb”.

 
 
Fazil Talıbov bu məsələlərə "kompleks yanaşma” olacağını qeyd edib. O, bu istiqamətdə atılacaq addımlar barədə əhaliyə məlumat veriləcəyini bildirib. 

Bəzi mütəxəssislər hesab edir ki, ölkədə günəmuzd işçilərin sayı bilinmədiyi üçün dövlət qulluqçuları və təqaüdçülər istisna olmaqla hər kəsə yardım göstərilməlidir.

Politoloq Azər Qasımlı dövlətin adambaşına yardımlar etməsinin çox da real addım olmadığını düşünür. 

 
 
O, günəmuzd işçilərə yardımla bağlı səsləndirilən məbləğin də sadəcə, əhalinin və siyasi partiyaların tələbi olduğunu qeyd edir: "Daha çox hər kəsə 200 və ya 300 manat yardım edilməsi haqda danışılır. Böyük ehtimalla indiki durumda, yə həm epidemiya, həm iqtisadiyyatın durduğu, həm də neft bazarlarında qiymətlərin kəskin düşdüyü bu dövdə Azərbaycan çox ciddi iqtisadi böhranla üz-üzə qalacaq. Düşünürəm ki, hakimiyyət adambaşına hansısa məbləği ödəməkdən vaz keçəcək, çox kasıb, sosial durumu pis olan ailələrə yardım ediləcək. Yəni ünvanlı yardım ediləcək”. 

A.Qasımlı hesab edir ki, istənilən halda hakimiyyət bu problemi həll etməlidir. O, əks halda narazılıqların arta biləcəyini də istisna etmir. 

Zülfiyyə Quliyeva