Son günlərdə Azərbaycanda ərazi üzrə sahə həkimlərinin və tibb bacılarının ev-ev gəzərək qeydiyyat apardıqları və sakinlərin hərarətini ölçmələri barədə məlumatlar müzakirə mövzusu olub.
Sosial mediada bəzi istifadəçilər isə bunun həmin işçilər üçün nə dərəcədə təhlükəsiz olmalarını sorğulayıb.
Tibbi Ərazi Bölmələrinin İdarəetmə Birliyindən (TƏBİB) verilən məlumata görə, həmin işçilərin təhlükəsizliyi ilə bağlı narahatlıq olmayıb.
Qurum bildirib ki, həmin adamların maskaları olub.
Bəs hazırda xəstəxanalarda və tibb heyətində virusla bağlı qabaqlayıcı tədbirlər hansı səviyədə görülür?
Toplum Tv-nin Goranboy rayon müxbiri məsələni araşdırıb.
Məsələ ilə bağlı Goranboy rayonunda yerləşən ərazi üzrə tibb məntəqələri ilə əlaqə saxladıq.
Hər gün minlərlə insanın temperaturunu ölçən tibb işçilərindən koronavirusa qarşı hansı qabaqlayıcı tədbirlər gördüklərini və qoruyucu vasitələrlə təmin olunub-olunmadıqların öyrənməyə çalışdıq.
Yerli tibb məntəqələrindən biri bildirib ki, karantin rejimi elan olunandan bu günə qədər Goranboy Rayon Mərkəzi Xəstəxanası tərəfindən 3 ədəd tibbi spirt, 3 ədəd tibbi tənzif və 1 ədəd birdəfəlik istifadə üçün nəzərdə tutulmuş qoruyucu kombinezon dəsti ilə təmin olunublar.
Məsələni daha ətraflı öyrənmək üçün Respublika Gigiyena və Epidemiologiya Mərkəzi ilə əlaqə saxladıq. Mərkəzdən verilən məlumata görə, ərazi üzrə tibb məntəqələrini qoruyucu dezinfeksiyaedici vasitələrlə Rayon Mərkəzi xəstəxanaları təmin etməlidir.
Goranboy Rayon Mərkəzi Xəstəxanasının baş həkimi Rüstəm Budaqov isə bizə yalnış məlumat verildiyini qeyd etdi.
Baş həkim bildirdi ki, Goranboy Rayonun Mərkəzi Xəstəxanasına bu təyinatlı vəsait ayrılmayıb və bu məsuliyyətin başqa qurumlara aid olduğunu bildirdi.
Göründüyü kimi, hazırda Goranboy rayonunda yerli tibb məntəqələrində vəziyyət o qədər ürəkaçan deyil. Və rəsmi qurumlar heç biri bu məsuliyyəti üzərinə götürmür.
Azərbaycan Respublikası Prezidentinin 2018-ci il 22 yanvar tarixli 3593 nömrəli Sərəncamına əsasən tikintisinin başa çatdırılması məqsədi ilə 22.35 milyon manat ayrılan Goranboy Rayon Mərkəzi Xəstəxanasının açılışı 3 mart tarixində olub.
Xəstəxana hal hazırda koronavirusun müalicəsi üçün qərargah kimi fəaliyyət göstərir.
Şahbanu
Goranboy-Bakı-Goranboy
Toplum TV Azərbaycanın müstəqil xəbər platformasıdır. Ölkədə və bölgədə baş verən hadisələri dəqiq və qərəzsiz şəkildə izləyicilərimizə çatdırırıq.
Toplum TV hər gün siyasət, iqtisadiyyat, sosial, kriminal, gender mövzularında reportajlar və xəbər proqramları, tolk-şou və müsahibələri diqqətinizə təqdim edir.
Ən doğru xəbərləri izləmək üçün Toplum TV-yə abunə olun.