10:53, 08 İyul 2019 (Bazar ertəsi) 38

Yunanıstanda mühafizəkarlar partiyası parlament seçkisini qazanıb

Yunanıstanda mühafizəkarlar partiyası parlament seçkisini qazanıb


/ DÜNYA
Yunanıstanda mühafizəkar Yeni Demokratiya partiyası parlament seçkisini udub. 

Bu barədə Azadlıq Radiosu xəbər verir.

Son dörd ildə ölkəni idarə etmiş sosialist Baş nazir Alexis Tsipras isə seçicilərdən təpki görüb.

Artıq bülletenlərin 80 faizindən çoxu sayılıb. Yeni Demokratiya səslərin 39,7, Tsipras-ın Syriza partiyası isə 31,6 faizini yığıb. İfrat sağçı Qızılı Üfüq partiyası parlamentə keçməkdən ötrü 3 faizlik baryeri aşmağa çalışır.

Yeni Demokratiyanın lideri Kyriakos Mitsotakis seçicilərə "Yunanıstana dəyişməyə güclü mandat” verdiklərinə görə təşəkkür edib.

"Bu gündən çətin, ancaq gözəl savaş başlayır”, – o vurğulayıb.

51 yaşlı Mitsotakis seçki kampaniyası dövründə vergiləri azaldacağını, investisiya cəlb edəcəyini vəd edib.

Məğlubiyyəti etiraf edən Tsipras deyib ki, "vətəndaşlar seçimlərini ediblər”.

44 yaşlı Tsipras Skopye ilə qonşu ölkənin adının dəyişdirilməsi üzrə razılaşma əldə edib. Hər iki ölkənin millətçiləri Makedoniyanın adının Şimali Makedoniyaya çevrilməsini nəzərdə tutan sazişə qarşı çıxıblar. Ancaq razılaşma qüvvəyə minib.

Tənqidçiləri Tsipras-ı həmçinin 2010-cu ildə başlanmış maliyyə böhranına görə ittiham ediblər.