15:11, 30 Noyabr 2020 (Bazar ertəsi) 156

ANAMA: İşğaldan azad olunmuş ərazilərin 80 faizi təhlükəlidir

ANAMA: İşğaldan azad olunmuş ərazilərin 80 faizi təhlükəlidir
"İşğaldan azad olunmuş ərazilərin 80 faizi partlayıcı maddələr baxımından təhlükəli ərazilərdir”.

Bunu bu gün keçirilən mətbuat konfransında Azərbaycan Respublikası Ərazilərin Minalardan Təmizlənməsi üzrə Milli Agentliyin (ANAMA) Operativ Qərargah rəisi İdris İsmayılov bildirib.

İ. İsmayılov deyib ki, işğaldan azad olunmuş ərazilərin təmizlənməsi nəzərdə tutulur: "İnsanların ata-baba yurdlarına qayıtması üçün infrastruktur obyektlərində, əhalinin qayıtması üçün zəruri olan məkanlarda minalardan təmizləmə işləri aparılacaq. Daha sonra otlaq, əkin sahələrində, sonra ucqar ərazilər təmizlənəcək”.

ANAMA mətbuat konfransında işğaldan azad olunmuş ərazilərin sakinlərinə də müraciət edib.

"Azərbaycan Prezidentinin fərmanına uyğun olaraq işğaldan azad olunan ərazi vahidlərində müvəqqəti komendantlıqlar yaradılıb. Bu rayonların ərazilərinin girişlərinə polis postları təyin olunub. Xüsusi buraxılış olan şəxslərin və nəqliyyat vasitələrinin təmizlənmiş və işarələnmiş xüsusi yollarla hərəkətlərinə icazə verilir”. Bunu bu gün keçirilən mətbuat konfransındaANAMA-nın direktoru Qəzənfər Əhmədov deyib.

Q. Əhmədov bildirib ki, torpaqların işğaldan azad olunması sevinci ilə bir az öndə öz dədə-baba torpaqlarına getmək, öz yurdlarına baş çəkmək istəyənləri anlayışla qarşılayırlar: "Lakin bu ərazilərin minalarla, partlamamış hərbi sursatlarla, tərkibində partlayıcı olan qurğularla və müharibənin partlayıcı qalıqları çirkləndiyini nəzərə alaraq, təhlükəsiz səfər imkanlarının yaradılacağı müddətədək bu ərazilərə daxil olmamaları, bu ərazilərə edəcəkləri səfərlərdən çəkinmələri xahiş olunur.

Bildirmək istəyirik ki, polis postlarından yayınaraq, ara yollardan istifadə etməklə bu ərazilərə daxil olmaqla, mina, və partlamamış hərbi sursat təhlükəsinə məruz qalmaq riski çox yüksəkdir. Baş verə biləcək partlayış nəticəsində yaralı vətəndaşın həmin ərazidən çıxarılması üçün Agentliyin minaaxtaranlarının səfərbər olmaları bir an öncə yardımın göstərilməsi üçün edilən emosional vərdişlər təhlükəli və riskli minaaxtarma və zərərsizləşdirmə fəaliyyətlərini daha da qəlizləşdirir. Qeyd olunanları nəzərə alaraq vətəndaşlarımızdan şübhəli və təhlükəli ərazilərə daxil olmamalarını, tələb olunan qaydalara ciddi şəkildə riayət etmələrini, özlərinin və vətəndaşlarımızın təhlükəsiz mühitdə yaşamaları üçün fəaliyyət göstərən insanların həyat və sağlamlıqlarını təhlükə qarşısında qoymamalarını bu ərazilərə yaxın yaşayan vətəndaşların həssaslıq və diqqət göstərmələrini artıq dərəcədə xahiş edirik.

Bu ərazilərdə icra olunacaq genişmiqyaslı mina təmizləmə fəaliyyətləri çərçivəsində ilk növbədə hərəkət marşrutlarının, yolların təmizlənməsi nəticəsində yaxın gələcəkdə vətəndaşlarımızın öz yurdlarına baş çəkmələri üçün şərait yaradılacaq”. (APA)