12:36, 11 Avqust 2020 (Çərşənbə axşamı) 565

Ermənistanda Sentyabrın 15-dən məktəblər açılır

Ermənistanda Sentyabrın 15-dən məktəblər açılır
Koronavirus pandemiyasına görə martdan məktəblərin bağlandığı Ermənistanda sentyabrın 15-dən təhsil ocaqları qapılarını tələbələrin üzünə açacaq. Bunu Təhsil naziri Arayik Harutiunian avqustun 10-da deyib.

Harutiunian açıqlamanı koronavirusla bağlı durumu koordinasiya edən aparıcı hökumət rəsmiləri ilə müzakirələrdən sonra verib.

Nazirin sözlərinə görə, təmayül kollecləri, musiqi və incəsənət məktəbləri də sentyabrın 15-dən yenidən açılacaq.

Harutiunian hökumətin qoyduğu bütün sanitar və gigiyenik qaydalara əməl etməyin vacibliyini vurğulayıb.

Nazir deyir ki, universitetlər və digər təhsil ocaqları haqda qərar gələn həftə ərzində veriləcək.

"Fövqəladə vəziyyətə nəzarət edən orqanlar, tərəfdaşlarımız və nazirlik bütün məsələlərlə bağlı detallı prosedur və qaydaları birgə hazırlayıblar, bunlar bir neçə günə dərc olunacaq və paylaşılacaq”, – Harutiunian Facebook-da yazıb.

Onun sözlərinə görə, müəllimlər, valideynlər və tələbələr "dərs ilinin uğurla başlaması və rahat getməsi üçün birlikdə işləməli, pandemiyanın səbəb olduğu qadağaları nəzərə almalı, media provokasiyalarına imkan verməməlidirlər”.

Martdan bütün məktəblər, universitetlər, digər təhsil ocaqları bağlanıb, distant təhsilə keçib.

Ermənistanda mövcud fövqəladə vəziyyət avqustun 12-də başa çatmalıdır, ancaq hökumət onu daha bir ay uzatmağı planlaşdırır.

İndiyədək bu ölkədə yeni koronavirusa 40 min 433 yoluxma və 796 ölüm təsdiqlənib.
 
azadliq.org