Oktyabrda üç dəfə raket zərbəsinə məruz qalan Gəncədə analar narahatdır. Onlar övladlarını itirməkdən qorxurlar. Təkcə oktyabrın 17-də raket zərbəsindən 3 azyaşlı ölüb, iki uşaq itkin düşüb, 5 azyaşlı yaralanıb.
Bundan sonra uşaqlarını Gəncədən çıxaranlar olub.
"Toplum TV”-yə danışan Gəncə sakinlərinin sözlərinə görə, şəhərdən gedənlər də var, qalanlar da.
Şəhər sakini Ceyhunə Həsənli deyir ki, bir neçə uşaqlı ailə Gəncədən çıxıb: "Qonşuluğumuzdakl 5-6 evdə uşaqlı ailələr yaşayırdı, onlar artıq gediblər”.
Uşaqları qorumaq üçün kampaniya
Gəncədəki uşaqlarları ölümdən qorumaq üçün oktyabrın 17-də kampaniyaya start verilib.
Kampaniyanın təşəbbüskarı jurnalist, Ana Vətən Partiyasının sədr müşaviri Jalə Mütəllimovadır.
Onun sözlərinə görə, artıq bir neçə ailəyə müəyyən köməklik göstərilib: "Həmin gün səhərə qədər oturub canlı efiri izləyirdik. Ürək dağlayan mənzərələr vardı, dağıntıların arasından cəsədləri çıxarırdılar. Böyüklər daha dözümlü, psixoloji baxımdan daha stabildirlər; körpələr üçünsə bu travmadır. Bilirəm ki, Gəncə camaatı mərddir, onlar şəhərdən çıxan deyillər. Ona görə də təşəbbüslə çıxış etdim ki, uşaqlarını bizlərə əmanət etsinlər. Müraciət edənlər oldu, amma kömək edə bilmədiklərimiz də oldu. Sonra sakinlərə Gəncədə lazımi dəstək verməyə başladılar, dövlətimiz onların yanındadır”.
Azərbaycan Yüksəliş Partiyasının həmtəsisçisi, jurnalist Aygün Muradxanlı da kampaniyaya qoşulanlardandır. Onun sözlərinə görə, əlaqə saxladığı gəncəlilər dəstək təklifini qəbul etməyiblər:"Gəncəyə sonuncu raket zərbəsindən sonra həlak olan soydaşlarımızın sayı artdı. Düşündük ki, ola bilsin, əhali şəhərdən çıxmaq istəsin. Ən azı uşaqlar və qadınlar çıxmaq istəyə bilərlər. Buna görə də Gəncədə jurnalist həmkarlarımla birlikdə sakinlərə müraciət etdik; kimsə uşağını təhlükəsiz yerə köçürmək istəyirsə, yardıma hazırıq, Bakıda yerləşdirə bilərik dedik. Amma ünsiyyətdə olduğumuz ailələrin hamısı imtina etdi”.
Oktyabrın 17-si gecə saatlarında Ermənistan hərbi birləşmələrinin raket zərbələri nəticəsində Gəncədə 16 nəfər həlak olub, 52 yaralanıb.
Zərifə Novruz
Toplum TV Azərbaycanın müstəqil xəbər platformasıdır. Ölkədə və bölgədə baş verən hadisələri dəqiq və qərəzsiz şəkildə izləyicilərimizə çatdırırıq.
Toplum TV hər gün siyasət, iqtisadiyyat, sosial, kriminal, gender mövzularında reportajlar və xəbər proqramları, tolk-şou və müsahibələri diqqətinizə təqdim edir.
Ən doğru xəbərləri izləmək üçün Toplum TV-yə abunə olun.