15:38, 23 Sentyabr 2020 (Çərşənbə) 215

Şikayətçi "bu ölkənin yiyəsi yoxdur" dediyinə görə saxlanılıb

Şikayətçi
Qardaşı onun Müsavat Partiyasının üzvü olduğunu deyir

Müsahibə verdiyinə görə Lənkəran rayon sakininin saxlanıldığı iddia olunur.

Göyşaban kənd sakini Daşqın Əsədov Xəzər TV-yə müsahibə zamanı məktəbin istifadəyə yararsız olmasından danışıb və daha sonra Liman Şəhər Polis Bölməsinə çağırılıb.

Bu barədə saxlanılan Daşqın Əsədovun qardaşı Mikayıl Əsədov Toplum TV-yə açıqlama verib.

Mikayıl Əsədovun sözlərinə görə, Daşqın Əsədov müsahibəsində məktəbdəki acınacaqlı vəziyyəti tənqid edib: "Məktəb 1959-cu ildə tikilib. Heç bir təmir işi aparılmayıb. Məktəbin ayaqyolusu belə yoxdur. Bina elə bir vəziyyətdədir ki, tədris prosesinə heç bir cavab vermir. Daşqın Əsədov da bunları dediyinə görə Liman Şəhər Polis Bölməsində saxlanılır". 

"O, televiziyaya deyib ki, bu ölkənin yiyəsi yoxdur. İndi ona qarşı polisin qanuni əmrinə tabe olmama ittihamı irəli sürülülüb", - deyə Mikayıl Əsədov bildirib. 

Hazırda saxlanılan vətəndaşın ailəsinə konkret heç bir məlumat verilmir. 

Bu gün məhkəməyə aparılması gözlənilir.

Lənkəran Rayon Polis İdarəsindən məsələyə münasibət bildirilməyib.

Zərifə Novruz