"Rusiya Federasiyasının Ukraynadakı "xüsusi hərbi əməliyyatı" qarşıya qoyulan tapşırıqlar yerinə yetirildikdən sonra başa çatacaq".
 
Bunu Rusiya Federasiyası Prezidentinin mətbuat katibi Dmitri Peskov iyunun 9-da keçirdiyi mətbuat konfransında deyib. 
 
Jurnalistlərin Ukraynanın Rusiyanın nəzarətinə keçən bölgə və vilayətlərində Ukrayna dilinin dövlət dili olaraq qalıb-qalmayacağı sualına cavabında Peskov deyib ki, hələlik Ukrayna dili bu bölgələrdə dövlət dili olaraq qalır, "amma gələcəkdə bu məsələnin həlli yerli əhalinin iradəsindən asılı olacaq".
 
Qərbə taxıl tədarükü ilə bağlı məsələyə qaldıqda isə, Kremlin sözçüsü deyib ki, hələlik heç bir razılaşma əldə olunmayıb.

Xatırlatma

Rusiya 2022-ci il, fevralın 24-də Ukraynada "xüsusi hərbi əməliyyat adlandırdığı" genişmiqyaslı müharibəyə başlayıb.

Hərbi əməliyyatlarla əlaqədar Prezident Vladimir Putin bəyan edib ki, Moskvanın məqsədi Donbass regionunda “səkkiz il ərzində Kiyev rejimi tərəfindən zorakılığa və soyqırıma məruz qalmış insanları qorumaqdır”.

Hərbi əməliyyatların başlamasından 2 gün əvvəl, fevralın 22-də isə Kreml Ukraynanın şərqindəki separatçı qurumları - "Donbas Xalq Respublikası"nı və Luqansk Xalq Respublikasını" rəsmən tanıyıb.

Ukraynada müharibə başlayandan sonra ABŞ, Avropa Birliyi, Böyük Britaniya, Kanada, Yaponiya, Avstraliya və digər Qərb ölkələri Rusiyaya qarşı sərt sanksiyalar tətbiq etməyə başlayıblar. Sanksiyalar paketinə Rusiya neftinə embarqo qoyulması, Rusiya iqtisadiyyatını təcrid edilməsi, oliqarxlara və siyasətçilərə məhdudiyyətlərin tətbiqi daxildir. Rusiya Prezidenti də sanksiya tətbiq edilən şəxslər siyahısına salınıb.

Aprelin 7-də BMT Baş Assambleyası Rusiyanın təşkilatın İnsan Hüquqları Şurasından çıxarılması ilə bağlı qətnamə qəbul edib.

Rusiya ordusunun Buça və digər Ukrayna şəhərlərində kütləvi qətliamlar və müharibə cinayətləri törətdiyi iddia olunur. BMT-nin açıqlamasına görə, müharibə başlayandan bəri 10 milyondan çox ukraynalı ölkəni tərk edib. Müharibənin Ukrayna iqtisadiyyarına milyardlarla dollar ziyan vurduğu bildirilir.