Mayın 29-da qismən tanınmış Kosovanın Zvecan bələdiyyəsi ərazisində zorakılıq zamanı yaralanan NATO sülhməramlılarının sayı 30-a çatıb. 

Toplum TV xəbər verir ki, bu barədə NATO-nun yerli missiyası məlumat yayıb. 

Bildirilir ki, NATO-nun rəhbərlik etdiyi KFOR missiyası eskalasiya riskini azaltmaq üçün serb əhalinin kompakt yaşadığı ərazilərdə, Kosovanın şimalındakı dörd bələdiyyədə mövcudluğunu artırıb.

Bölgədə baş verən toqquşmalarla əlaqədar Serbiya Prezidenti Aleksandr Vuçiç Qərb ölkələrinə müraciət edib. O, Kosovanın şimalından alban merlərini və xüsusi təyinatlı polis qüvvələrini çıxarmağa çağırıb.

Vuçiçin sözlərinə görə, Priştinanın birtərəfli addımları serblərə qarşı zorakılığa gətirib çıxarır ki, bu da bizi regionda sülh və sabitlikdən uzaqlaşdırır.

Prezident həmçinin Kosovanın baş naziri Albino Kurtini “serblərlə NATO arasında münaqişə yaratmaq istəyində” günahlandırıb.

https://toplum.tv/dunya/pserbiyanin-kennedisi-zoran-cinciccedilin-qetlinden-20-il-oumltduumlp

Bölgədə baş verən hadisələrlə əlaqədar Vaşinqton da Kosova rəhbərliyini tənqid edib. 

Dövlət katibi Entoni Blinken bildirib ki, Kosovanın şəhər administrasiyalarının binalarını ələ keçirmək cəhdləri Belqraddakı hakimiyyətlə gərginliyi daha da artırıb.

Blinken Kosovanın Avropadakı tərəfdaşlarının tövsiyyələrinə zidd hərəkətlərini qətiyyətlə pislədiyini bəyan edib. 

"Bu hərəkətlər gərginliyin kəskin və lüzumsuz artmasına səbəb olub, Kosova ilə Serbiya arasında münasibətlərin normallaşmasına kömək etmək səylərimizə xələl gətirib. Bu, Kosova ilə ikitərəfli münasibətlərimizə təsir edəcək", - deyə Blinken vurğulayıb.

Xatırlatma

Aprelin 23-də Kosovanın şimalında və Metohiya vilayətində bələdiyyə seçkiləri keçirilib. Serblərin maraqlarını təmsil edən “Serb siyahısı” qrupunun seçkiləri boykot etməsi səbəbindən bölgədə vəziyyət gərginləşməyə başlayıb.

Serblər bələdiyyə binaları ətrafında barrikadalar qurub. Kosova polisi binalara girməyə çalışarkən toqquşmalar baş verib.

Serbiya Prezidentinin əmri ilə Serbiya Silahlı Qüvvələri yüksək hərbi hazırlıq vəziyyətinə gətirilib.