NATO-nun Baş katibi Yens Stoltenberq “Bild am Sonntag” qəzetinə müsahibəsində deyib ki, Rusiyanın Ukraynaya qarşı müharibəsi illər boyu davam edə bilər.

“Biz bunun illərlə davam edə bilməsinə hazırlaşmalıyıq. Biz Ukraynaya dəstəyimizi zəiflətməməliyik. Hətta xərclər – təkcə hərbi yardıma görə yox, həm də enerji daşıyıcılarının və ərzaq daşıyıcılarının qiymətinin qalxmasına görə - çox yüksək olsa da”, - NATO Baş katibi deyib.

O bildirib ki, əgər bu müharibədən sonra da Vladimir Putin 2008-ci ildə Gürcüstanda və 2014-cü ildə Krımda olduğu kimi davrana biləcəyini hesab etsə, NATO “daha böyük bədəl ödəməli olacaq”. 

Böyük Britaniyanın Baş naziri Boris Conson Ukraynaya ikinci səfərindən sonra “The Sunday Times” üçün yazdığı məqalədə Qərb liderlərini Ukraynanın tam qələbəsinə qədər çəkəcək uzunmüddətli müharibəyə hazırlaşmağa çağırıb. Ukraynanın “müharibənin son mərhələsindən uzaq” olmasını bu ərəfədə ölkənin Milli təhlükəsizlik və müdafiə şurasının katibi Aleksey Danilov da söyləyib.

Xatırlatma

Rusiya 2022-ci il, fevralın 24-də Ukraynada "xüsusi hərbi əməliyyat adlandırdığı" genişmiqyaslı müharibəyə başlayıb.

Hərbi əməliyyatlarla əlaqədar Prezident Vladimir Putin bəyan edib ki, Moskvanın məqsədi Donbass regionunda “səkkiz il ərzində Kiyev rejimi tərəfindən zorakılığa və soyqırıma məruz qalmış insanları qorumaqdır”.

Hərbi əməliyyatların başlamasından 2 gün əvvəl, fevralın 22-də isə Kreml Ukraynanın şərqindəki separatçı qurumları - "Donbas Xalq Respublikası"nı və Luqansk Xalq Respublikasını" rəsmən tanıyıb.

Ukraynada müharibə başlayandan sonra ABŞ, Avropa Birliyi, Böyük Britaniya, Kanada, Yaponiya, Avstraliya və digər Qərb ölkələri Rusiyaya qarşı sərt sanksiyalar tətbiq etməyə başlayıblar. Sanksiyalar paketinə Rusiya neftinə embarqo qoyulması, Rusiya iqtisadiyyatını təcrid edilməsi, oliqarxlara və siyasətçilərə məhdudiyyətlərin tətbiqi daxildir. Rusiya Prezidenti də sanksiya tətbiq edilən şəxslər siyahısına salınıb.

Aprelin 7-də BMT Baş Assambleyası Rusiyanın təşkilatın İnsan Hüquqları Şurasından çıxarılması ilə bağlı qətnamə qəbul edib.

Rusiya ordusunun Buça və digər Ukrayna şəhərlərində kütləvi qətliamlar və müharibə cinayətləri törətdiyi iddia olunur. BMT-nin açıqlamasına görə, müharibə başlayandan bəri 10 milyondan çox ukraynalı ölkəni tərk edib. Müharibənin Ukrayna iqtisadiyyarına milyardlarla dollar ziyan vurduğu bildirilir.