İqtisadiyyat

İlqar Məmmədov: “Birinci uşağa görə dövlət heç kimə yardım etməməlidir”

Qadir İbrahimli: “Belə yanaşma konstitusiya pozuntusu deməkdir”

Nigar Səmədli
2 Aprel, 2021
1971

Kollaj - Toplum.tv

“Uşaqpulu mövzusu ilə xalqı aldadıb-alçaldan yaramazların hər birinin cavabını artıqlamasıyla verəcəyik”.

Bunu ReAl Partiyasının sədri İlqar Məmmədov martın 2-də “Feysbuk” hesabında yazıb. 

Partiya üzvü, deputat Erkin Qədirli isə uşaqpulu əvəzinə, vətəndaşların mənzil şəraitinin yaxşılaşdırılmasının daha doğru olduğunu söyləyib: “İnsanlara faizsiz kreditlər verilməlidir. Uşaqpulu sol strategiyaya uyğundur. Uşaqpulu verməklə problem çözülməyəcək. Valideyn vəsaiti uşağına xərcləməyə də bilər, amma mənzil şəraiti yaxşılaşdırılsa, nəticə əldə etmək olar”.

İlqar Məmmədov yazıb ki, uşaqpulu mövzusunu gündəmə gətirənlər bunun büdcəyə və iqtisadiyyata neçəyə başa gələcəyini konkret rəqəmlə ifadə etmirlər:

“Sadəcə, “uşağım var, dövlət mənə pul versin” kimi təsəvvürləri insanlarda yetişdirənlər ya nə danışdıqlarını heç anlamır, ya da xalqa vicdanlı xidmət hissini tam itiriblər". 

"Nəsilvermə əmsalı Azərbaycanda ancaq son 4-5 ildir ki, artım üçün tələb olunan əmsal 2.1-dən aşağı düşüb. Bunun mürəkkəb səbəbləri var. Buraya keçmiş müharibələrin irsi olan demoqrafik dalğalar, şəhərləşmə, iqtisadi təsəvvürlərin dəyişməsi və s. kimi hallar daxildir", - İlqar Məmmədov qeyd edib.

Onun sözlərinə görə, əmsalın daha aşağı düşməsinin qarşısını almaqdan ötrü bir çox tədbirlər görülməlidir: "Bu tədbirlər arasında, əlbəttə, doğumun iqtisadi stimullaşdırılması tədbirləri də var. Bizim isə mövqeyimiz belədir: 

- birinci uşağa görə dövlət heç kəsə maddi yardım verməməlidir. Birinci uşaq ailələrin tam şəkildə öz məsuliyyəti, seçimi və planı olmalıdır.

- ikinci uşağın doğulması və müəyyən yaşa çatması üçün isə dövlət tərəddüd edən ehtiyaclı valideyinlərə öz dəstəyini təklif etməlidir. Yardım məbləği qəpik-quruş yox, əhəmiyyətli olmalıdır. Amma bu vəsaitin valideyinlər tərəfindən məhz uşaqların qida, təhsil, geyim və müalicəsinə xərcləməsi üzərində dövlət ciddi nəzarət qurmalıdır. 

- üçüncü və sonrakı uşaqlar yenə də valideyinlərin öz məsuliyyətli seçimi və planı olmalıdır. Bu məsuliyyətli seçimi etməkdə dövlətin ümumi iqtisadi siyasəti valideyinləri inandırmaqla yardımçı olmalıdır. İş yerlərinin yaranması üçün iqtisadiyyat sərmayələrə açılmalıdır. Bu isə daha geniş, əhatəli siyasətin tərkib hissəsidir: hüquq aliliyi, korrupsiyanın cilovlanması, demokratik siyasi təmsilçilik və s".

İqtisadçı Qadir İbrahimli isə uşaqlara görə sosial müavinətin verilməsini vacib sayır:

“Ümumiyyətlə, ailənin ehtiyacı varsa, doğulan hər bir uşağa görə və ailədəki uşaqların sayından asılı olmayaraq dövlət tərəfindən maddi yardım edilməlidir. Çünki hər doğulan uşaq gələcəyin vergi ödəyicisi, əsgəri və nəhayət, vətəndaşdır, yəni bu onun konstitusyon hüququdur. Konstitusiyada uşaqların sayı ilə bağlı heç bir ayrıseçkilik yoxdur və belə yanaşma ilk növbədə konstitusiya pozuntusu deməkdir. İkinci bir məqamsa ondan ibarətdir ki, Azərbaycanda illərdir tətbiq olunan ünvanlı sosial yardım sistemi işləmir. Bu səbəbdən də bəzi problemlər yaranır. Əgər ailənin gəlirləri normal yaşayış üçün adekvat deyilsə, həmin ailə ünvanlı sosial yardımın əhatə dairəsində olmalıdır. Eyni zamanda, deputatın qeyd etdiyi mənzil şəraitinin də bu məsələ ilə heç bir əlaqəsi yoxdur. Azərbaycanın Mənzil Məcəlləsinə görə, hər bir vətəndaşın yaşayış yeri minimum 16 kvadratmetr olmalıdır”. 

İqtisadçı digər məqamı statistikanın şəffaf olmaması ilə əlaqələndirib: “Statistika Komitəsinin təqdim etdiyi rəqəmlər də real deyil. Avropa Birliyinə daxil olan ölkələrdə yoxsulluq həddi 17 faiz olduğu halda, Azərbaycan statistikası iddia edir ki, bizdə cəmi 5 faizdir. Hətta həmin 5 faizə daxil olan vətəndaşların da hamısı ünvanlı sosial yardım almır. Əmək və Əhalinin Sosial Müdafiəsi Nazirliyinin açıqlamasına görə, cəmi 63 faiz yoxsul insan ünvanlı yardımın əhatə dairəsindədir. Bu məsələlər çözülmədiyinə görə, uşaqpulu problemi həllini tapmadı və uzun müddət də tapmayacaq”. 
 


Toplum TV Azərbaycanın müstəqil xəbər platformasıdır. Ölkədə və bölgədə baş verən hadisələri dəqiq və qərəzsiz şəkildə izləyicilərimizə çatdırırıq.

Toplum TV hər gün siyasət, iqtisadiyyat, sosial, kriminal, gender mövzularında reportajlar və xəbər proqramları, tolk-şou və müsahibələri diqqətinizə təqdim edir.

Ən doğru xəbərləri izləmək üçün Toplum TV-yə abunə olun.

Youtube: https://www.youtube.com/channel/UCztIohlYx63yMJzcRTF18IA

WebSite: https://toplum.tv

Facebook: https://www.facebook.com/toplumtv

İnstagram: https://www.instagram.com/toplumtv/

Telegram: https://t.me/Tvtoplum

Şikayətlərinizi Whatsapp-da Qaynar Xəttimizə göndərin: +99450 247 55 06

İqtisadiyyat

Mərkəzi Bank uçot dərəcəsini artırdı

1 Fevral 2023

Açıq mənbələrdən götürülüb

Azərbaycan Mərkəzi Bankının (AMB) İdarə Heyəti 2023-cü ildə uçot dərəcəsilə bağlı ilk qərarını açıqlayıb. Belə ki, uçot dərəcəsinin 0,25 faiz bəndi artırılaraq 8,5 %-ə çatdırılması barədə qərar qəbul edilib. Toplum TV xəbər verir ki, bu barədə fevralın 1-də AMB-dən məlumat verilib.  Bildirilir ki, faiz dəhlizinin aşağı həddi 0,5 faiz bəndi artırılaraq 6,75 %, yuxarı həddi isə 0,25 faiz bəndi artırılaraq 9,5 % səviyyəsində müəyyən olunub. https://toplum.tv/iqtisadiyyat/pazerbaycanda-bank-emanetleri-vergiye-celb-edilirp “Bu qərar daxili və xarici mühitdə inflyasiyaya artırıcı və azaldıcı təsir göstərən amillərin dinamikası nəzərə alınmaqla verilib, - deyə bankın bəyanatında vurğulanıb.  Mərkəzi Bank faiz dəhlizinin parametrləri barədə növbəti qərarın martın 29-da ictimaiyyətə açıqlanacağını...
İqtisadiyyat

Azərbaycanda bank əmanətləri vergiyə cəlb edilir

31 Yanvar 2023

Açıq mənbələrdən götürülüb

Sabahdan Azərbaycanda əmanət faizləri vergiyə cəlb ediləcək Toplum TV xəbər verir ki, bu, Vergi Məcəlləsinə edilmiş dəyişikliyin müddətinin artırılmaması nəticəsində baş verəcək.   Fiziki şəxslərin əmanətləri üzrə ödədiyi illik faiz gəlirlərinin vergiyə cəlb edilməsi təkcə yerli bankların deyil, xarici bankların filiallarını da əhatə edəcək.  Əmanət faizlərinin vergidən azad edilməsi manatın 2015-ci ildəki ikili devalvasiyasından sonra banklardan əmanət axınının qarşısını almaq üçün atılmış addımlardan biri idi. Fiziki şəxslərin əmanətləri üzrə ödədiyi illik faiz gəlirləri 2016-cı il fevralın 1-dən 7 il müddətinə vergidən azad edilmişdi.   https://toplum.tv/siyaset/pbakida-banka-huumlcum-olubp Bununla belə, bu gün o da məlum olub ki, fevralın 1-dən bəzi səhm və istiqrazlar...

Seçilmiş Videolar

Toplum TV loqo