Özünü Mehdi Sahib əz-Zaman kimi təqdim edən Aqil Babayevə qarşı irəli sürülən ittiham bu gün Bakı Ağır Cinayətlər Məhkəməsində elan olunub.

Hakim Eldar İsmayılovun sədrliyi ilə özünü 12-ci imam adlandırmaqla adamların etibarından sui-istifadə etməkdə, bu yolla əmlaklarını və pullarını ələ keçirməkdə ittiham olunan Aqil Babayevin məhkəməsi avqustun 2-də davam edib. İstintaqın gəldiyi nəticələri dövlət ittihamçısı Fuad Musayev səsləndirib.

İttihamda göstərilib ki, Aqil Babayev 2007-ci ildən 2020-ci ilə qədər müddətdə Bakı və Abşeronda yerləşən bağ evlərində dini məclislər təşkil edərək inanclı insanları özünün Mehdi Sahib əz-Zaman olmasına inandırıb. 

https://toplum.tv/mehkeme/irana-casusluqda-teqsirlendirilen-sexsin-mehkemesi-basladi

İstintaq müəyyən edib ki,  təşkil etdiyi dini məclislərdə Babayev özünü Yer üzünə ilahi qüvvə tərəfindən yaxşılıqlar və yoxsullara köməklik göstərmək məqsədilə göndərildiyini deyib, axirət əzabından xilas olmaq üçün ona inanmağın vacibliyini vurğulayıb.

İttihama görə o, insanları təsir altına salaraq, hər ay ona pul ödənilməsini istəyib. Deyib ki, toplanan pullar kasıblara paylanır, şəhid ailələri, Qarabağ əlilləri üçün evlər tikilir.

Tabeliyində olan insanların onun sözündən çıxdığı təqdirdə isə onlara müxtəlif zorakılıq hərəkətləri edərək şərəf və ləyaqətlərini alçaltdığı da istintaqda müəyyən edilib.

İttiham olunan şəxs zərərçəkmiş Anar Aslanova axirət dünyasında kömək edəcəyini vəd verib. Aqil Babayev ona deyib ki, lazım gələcəyi vaxtda zühur edəcək.

Anar Aslanov  da verilən vədlərə inanaraq "Hunday Santafe" markalı avtomobil də daxil olmaqla 585 min 300 manatlıq vəsaitini Aqil Babayevə verib.

Zərərçəkmiş Natiq Sadıqov isə axirət dünyasında savab qazanmaq üçün ona ümumilikdə 543 min manat verib.

Digər zərərçəkmiş Zaur Abdullayev isə biznes fəaliyyətində uğur qazanmaq və günahlarının bağışlanması üçün Aqil Babayevə 134 min manat verib.

İş üzrə dəymiş ziyan ümumilkdə 2 milyon 500 min manat təşkil edib.

Aqil Babayev ittihama münasibət bildirərək özünü təqsirli bilmədiyini deyib.

Dövlət ittihamçısı ittiham aktını elan etdikdən sonra hakim növbəti məhkəmə iclasını avqustun 23-də təyin etdi. Həmin gün təqsirləndirilən şəxsin və zərərçəkmiş şəxslərin ifadələri ilə davam edəcək.

Ötən ilin avqustunda Aqil Babayevin həbsindən az sonra onun ailə üzvləri mediaya müraciət edib, ittihamın saxta olduğunu bildirmişdilər. Onların sözlərinə görə, Aqil Babayev dostları tərəfindən şərlənib.