Bakı Ağır Cinayətlər Məhkəməsində Kikboksinq Federasiyasının vitse-prezidenti olmuş Səbuhi Rəcəb mühakimə edilir. Məhkəmə iclasına hakim Əli Məmmədov sədrlik edir.

İttihama görə, Səbuhi Rəcəb tanışı Şahin Əliyevi Səhiyyə Nazirliyinin Əziz Əliyev adına Azərbaycan Dövlət Həkimləri Təkmilləşdirmə İnstitutunun rektor vəzifəsinə düzəldəcəyinə arxayın edib. Buna görə ondan 250 min manat alıb.

Başqa ittihama görə, o, digər tanışı Səbinə Əliyevadan birlikdə iş görüb qazanc əldə etmək adı altında 40 min manat alıb, qaytarmayıb. Daha bir zərərçəkmişsə Səbuhi Rəcəbin başqa tanışı Günay Əliyevadır. İttihama görə, Səbuhi Rəcəb bu xanımın “Bentley" markalı avtomobilini dələduzluq yolu ilə ələ keçirib, ona 51 min manat zərər vurub.

Sentyabrın 26-da məhkəmə zərərçəkmiş Günay Əliyevanı dindirib. O, ifadəsində göstərib ki, Səbuhi Rəcəbə pulu 2022-ci ilin martında iş yoldaşı İbrahimov Eminin vasitəsilə verib:

“Emindən xahiş etdim ki, pulu Səbuhiyə o versin. Semaşkonun yaxınlığında yerləşən “Şiş Kabab” adlı restoranda görüşdük. Orada danışdıq və pulun ofisdə olduğunu dedim. Səbuhi dedi ki, pulu gətir, avtosalonun qarşısında görüşək. 30 min dolları Eminə verdim ki, Səbuhiyə versin. Mən də maşında gözlədim. Səbuhiyə pulu Emin verdi.  Səbuhi demişdi ki, həmin pula kreditlə “Bentley” markalı maşın götürüb, maşını banka qoyub bankdan 150-200 minə qədər pul götürəcək. Pulu verəndən sonrakı günlərdə xəbər ala bilmədim. Pulu Emin verdiyindən, ona zəng edirdim. Açmadıqda evlərinə getdim. Sonra Səbuhi mənə zəng edib Eminin evinə getdiyim üçün məni təhqir etdi. Dedi ki, Emin pulu mənə verib. Cavabdeh mənəm”.

Günay Əliyeva məhkəmənin suallarını cavablandırarkən bildirib ki, ümidini üzəndən sonra Nərimanov Rayon Polis İdarəsinə şikayət edib. Onun şikayəti əsasında Emin İbrahimov polisə dəvət edilib: “Emin də gedib polisdə dedi ki, pulu Səbuhiyə yox, başqasına verib. Bir müddət gözlədim, polisdən xəbər çıxmadı. Yaxınlarımla məsləhətləşib DİN-ə şikayət etdim. Emin İbrahimov DİN-ə də çağırıldı. Orda deməsinə görə, Səbuhi ona tapşırıb ki, pulun 50 min yox, 28 min manat olduğunu bildirsin. Yəni səhv izahat versin. Sonra da eşitdim ki, Səbuhi başqa adamlara qarşı da dələduzluq edib və tutulub. Ancaq 2 aydan sonra ev dustaqlığına buraxıldı. Mən pulumu almamış bunu niyə çölə buraxıblar deyə, təzədən hüquq-mühafizə orqanlarına şikayət etdim”.

Zərərçəkmiş məhkəmənin və vəkilin suallarını cavablayıb. Hakim növbəti məhkəmə iclasını oktyabrın 10-na təyin edib.

Səbuhi Rəcəb əvvəllər Konstitusiya Məhkəməsində çalışıb. Daha sonra Azərbaycan Kikboksinq və Sambo Federasiyalarında döyüş sambosu üzrə vitse-prezident olub. 2018-ci ildə isə Dünya Azərbaycanlılarının Mədəniyyət Mərkəzi İctimai Birliyinin vitse-prezidenti vəzifəsinə təyin edilib. O, həmçinin 2020-ci ildə 13 saylı Xəzər-Pirallahı dairəsindən deputatlığa namizəd olub.