Məhkəmə

MTN işi məhkəməyə qaytarılıb – generallar narazıdır 

Leyli Cəfərova
22 Noyabr, 2022
136

Toplum tv - mövlam şıxəliyev

Bakı Apelyasiya Məhkəməsində hakim İlqar Murquzovun sədrliyi ilə Milli Təhlükəsizlik Nazirliyinin (indiki DTX) İstintaq Baş İdarəsinin sabiq rəisi general-mayor Mövlam Şıxəliyevin apelyasiya şikayəti üzrə məhkəmə iclası keçirilib.

Toplum Tv-nin müxbiri xəbər verir ki, noyabrın 22-də baş tutan məhkəmənin hazırlıq iclasında Mövlam Şıxəliyevlə bərabər hakim qarşısına çıxarılan 2-ci şöbənin rəisi Vüsal Ələkbərov, İbtidai istintaq idarəsinin rəis müavini Yasin Məmmədov və şöbə rəisinin müavini olmuş Sahib Ələkbərovun anket məlumatları dəqiqləşdirilib.

Şüşə qəfəsdə yan-yana əyləşən təqsirləndirilən şəxslər iclas zamanı ara-sıra öz aralarında söhbətləşiblər. 

Müddəti keçmiş protest

Məhkəmə iclası zamanı zərərçəkənlər apelyasiya şikayətlərinə əlavələr təqdim ediblər. Dövlət ittihamçısı Murad Vəliyev isə məhkəmədən şikayət vermə müddətlərinə xüsusi diqqət olunmasını xahiş edib.

Məlum olub ki, iş üzrə zərərçəkən, mərhum Cahangir Məmmədovun hüquqi varisi tanınan həyat yoldaşı və digər zərərçəkən Elşən Mədətov apelyasiya şikayətlərini müddəti ötürməklə təqdim ediblər. Eyni zamanda iş üzrə Baş Prokurorluğun təqdim etdiyi protest də müddət ötürülməklə verilib. 

Mövlam Şıxəliyevin vəkili Ceyhun Yusifov bildirib ki, protest ümumiyyətlə onlara təqdim olunmayıb. Vəkil digər iki şikayətlə bağlı müddətin bərpası və protestin təqdim olunması üçün işin ilkin instansiyaya qaytarılmasını istəyib.

Məhkəmə müşavirə otağına yollanıb və bir qədər sonra qayıdaraq vəsatətin təmin edildiyini, işin 20 gün müddətində baxılaraq geri qaytarılması şərti ilə Bakı Hərbi Məhkəməsinə göndərilməsi barədə qərar çıxarıb.

Zərərçəkən tərəf narazılıq edir

Hökmdən narazı qalan təkcə Mövlam Şıxəliyev və suç ortaqları deyil. Ailə üzvləri də, dövlət ittihamçısı da, iş üzrə zərərçəkənlər də apelyasiya instansiyasına şikayətlərini təqdim ediblər. Mövlam Şıxəliyevlə tabeliyində işləmiş, onunla birgə mühakimə olunan şöbə rəislərinin, dövlət ittihamçısının, zərərçəkənlərin narazı qaldığı hökm sentyabrın 21-də, Bakı Hərbi Məhkəməsində çıxarılıb. Hökmə əsasən, 12 il azadlıqdan məhrum olunan Mövlam Şıxəliyevin general-mayor rütbəsi də alınıb. Onun tabeliyində işləmiş  3 polkovnikə də uzunmüddətli həbs cəzaları kəsilib. Keçmiş şöbə rəislərindən Vüsal Ələkbərov 11 il 2 ay, Yasin Məmmədov 10 il 6 ay, rəis müavini Sahib Ələkbərov isə 8 il azadlıqdan məhrum edilib. İstintaq və məhkəmə dövründə azadlıqda olan 3 polkovnik hökm elan olunanda məhkəmə zalında həbs olunublar.

7 milyonluq əmlak müsadirə olunub

Hökmdə sabiq MTN-çilərin əmlaklarının müsadirəsi məsələsi də yer alıb. Mövlam Şıxəliyevin özü və ailə üzvlərinin - həyat yoldaşı Aybəniz Şıxəliyeva, oğlu Elgün Şıxəliyev, qızı Samirə Əliyevanın adına 7 milyon manatdan çox dəyəri olan əmlaklar müsadirə olunub. Onların arasında Bakının mərkəzində - “Sahil” metrostansiyasının üstündəki binada 8 mənzil, Fəvvarələr meydanında, Nizami küçəsində, Ağdaşda evlər, obyektlər, Novxanıda bağ evi və başqa əmlaklar var. Maraqlıdır ki, Mövlam Şıxəliyevlə bərabər onun ailə üzvləri də hökmdən apelyasiya şikayəti veriblər. Onlar müsadirə olunan əmlakları geri tələb edirlər. İddia edirlər ki, həmin əmlaklar cinayət yolu ilə əldə olunmayıb. Şıxəliyevin ailə üzvləri çoxsaylı əmlakların onlara yaxın qohumları tərəfindən bağışlandığını qeyd etməklə geri almaq niyyətlərini apelyasiya şikayətlərində qeyd ediblər.

14 milyonluq rüşvət

Zərərçəkmişlər vaxtilə MTN-də onlardan alınmış pulların geri qaytarılması tələbi ilə məhkəmə prosesinin əvvəlində mülki iddialar qaldırmışdılar. Bununla yanaşı Mövlam Şıxəliyevin ailə üzvlərinin də cinayət yolu ilə əldə olunmuş əmlakların leqallaşmasında iştirak etdiklərinə görə cinayət məsuliyyətinə cəlb olunmaları üçün vəsatətlə çıxış etmişdilər. Məhkəmə vəsatətləri baxılmamış saxlasa da, zərərçəkənlərdən mülki iddia qaldırmış 16 nəfərinin iddiasını qismən təmin edib. Mülki iddialarının qismən təmin olunması zərərçəkənləri hökmdən narazı salan əsas məqamdır. Ümumilikdə isə onlar Mövlam Şıxəliyev və  3 polkovnikin daha ağır cəzalara məhkum edilmələrini də tələb edirlər. Eyni zamanda zərərçəkənlər müsadirəyə götürülmüş əmlakların yenidən qiymətləndirilməsini tələb edirlər. Bildirirlər ki, müsadirə olunan əmlaklara real bazar dəyərindən 2 dəfə ucuz qiymət qoyulub. Onlar alternativ ekspertiza təyin olunmsını da şikayətlərindən tələb edirlər. Sabiq MTN-çilər barəsindəki cinayət dosyesində ümumilikdə 14 milyon 292 min manat rüşvət almaqdan və hədə-qorxu ilə başqalarının 5 milyon 77 min manatlıq pulunu, əmlakını ələ keçirməkdən bəhs olunur.

2015-ci ilin oktyabrında MTN-də nazir Eldar Mahmudovun postundan uzaqlaşdırılması, generallar da daxil olmaqla, 20-dən artıq vəzifəlinin tutulması ilə nəticələnən əməliyyatdan sonra bu qurum ləğv edilib və onun bazasında Dövlət Təhlükəsizliyi Xidməti (DTX) yaradılıb. İttihama görə, Mövlam Şıxəliyev İstintaq Baş İdarəsinin rəisi vəzifəsində çalışdığı 2008-2014-cü illərdə qeyd edilən qurumun tərkibindəki şöbənin sabiq rəisi Vüsal Ələkbərov, İbtidai istintaq idarəsinin sabiq rəis müavini Yasin Məmmədov, şöbə rəisinin sabiq müavini Sahib Ələkbərov ilə mütəşəkkil dəstə tərkibində iş adamlarından hədə-qorxu yolu ilə külli miqdarda pul tələb ediblər. İstintaqla Mövlam Şıxəliyevin rəhbərlik etdiyi mütəşəkkil cinayətkar dəstənin özgə əmlakını hədə-qorxu ilə tələb edib alması, həmçinin səlahiyyət həddini aşmaları və sübutları saxtalaşdırma ilə əlaqəli cinayətləri törətmələrinə əsaslı şübhələr müəyyən edilmişdi.

Mövlam Şıxəliyevə Cinayət Məcəlləsinin 182.3.1, 182.3.2 (külli miqdarda əmlak əldə etmək məqsədi ilə mütəşəkkil dəstə tərəfindən hədə qorxu ilə tələb etmə), 294.3 (sübutları saxtalaşdırma), 311.3.1 (qabaqcadan əlbir olan bir qrup şəxs və ya mütəşəkkil dəstə tərəfindən rüşvət alma), Vüsal Ələkbərov, Yasin Məmmədov və Sahib Ələkbərova isə həmin Məcəllənin 311.3.1, 341.2.1, 341.2.3-cü (vəzifə səlahiyyətlərindən sui-istifadə və ya vəzifə səlahiyyətlərini aşma) və digər maddələri ilə ittiham elan olunmuşdu. Cinayət işi üzrə 36 zərərçəkmiş var. Onlardan 3 nəfəri yolu MTN-dən keçəndən sonra xəstəlik taparaq dünyasını dəyişib. Zərərçəkmiş Cahangir Məmmədov isə intihar etməklə həyatına son qoyub.


Toplum TV Azərbaycanın müstəqil xəbər platformasıdır. Ölkədə və bölgədə baş verən hadisələri dəqiq və qərəzsiz şəkildə izləyicilərimizə çatdırırıq.

Toplum TV hər gün siyasət, iqtisadiyyat, sosial, kriminal, gender mövzularında reportajlar və xəbər proqramları, tolk-şou və müsahibələri diqqətinizə təqdim edir.

Ən doğru xəbərləri izləmək üçün Toplum TV-yə abunə olun.

Youtube: https://www.youtube.com/channel/UCztIohlYx63yMJzcRTF18IA

WebSite: https://toplum.tv

Facebook: https://www.facebook.com/toplumtv

İnstagram: https://www.instagram.com/toplumtv/

Telegram: https://t.me/Tvtoplum

Şikayətlərinizi Whatsapp-da Qaynar Xəttimizə göndərin: +99450 247 55 06

Məhkəmə

İbtidai sinif müəllimələrinin məhkəməsi: Direktor müavini sələmə pul verirdi

Leyli Cəfərova
30 Noyabr 2022
Bakı Ağır Cinayətlər Məhkəməsində dələduzluqda təqsirləndirilən iki müəllimənin məhkəməsi keçirilir. Onlardan biri Nərimanov rayonundakı 200 saylı orta məktəbin ibtidai sinif müəlliməsi Billurə İsmayılova, digərisə Sabunçu rayonundakı 71 saylı orta məktəbin ibtidai sinif müəlliməsi Zülfiyyə Qocayevadır.  Məhkəmə iclasına  hakim Faiq Qəniyev sədrlik edir.  Müəllimələrə verilən ittihamsa bundan ibarətdir: Billurə İsmayılova həmkarı və tanış olanı Zülfiyyə Qocayevanı Təhsil Nazirliyinin əməkdaşı kimi təqdim edib. İşlədiyi məktəbin direktor müavini Arzu Nəzərovanı Zülfiyyə Qocayevanın köməkliyi ilə Bakıdakı məktəblərin birində direktor təyin etdirəcəyini vəd edib. Buna görə 19 noyabr 2016-cı ildə Arzu Nəzərovanın yaşadığı evin qarşısında ondan 38.000 manat alıb. Sonralar Billurə İsmayılova və Zülfiyyə Qocayeva...
Məhkəmə

Şirkət sahibi Yasamaldakı sosial evlərə görə məhkəmə qarşısındadır

Leyli Cəfərova
30 Noyabr 2022

Açıq mənbələrdən götürülüb

Bakı Ağır Cinayətlər Məhkəməsində “KAT Holdinq” MMC-nin təsisçisi Elçin Ələkbərovun mühakiməsi keçirilir. O, Cinayət Məcəlləsinin 179.4-cü (mənimsəmə - külli miqdarda ziyan vurmaqla törədildikdə) və 308.2-ci (vəzifə səlahiyyətlərindən sui-istifadə etmə) maddələri ilə təqsirli bilinir. Bu ilin əvvəli sosial şəbəklərdə Mənzil İnşaatı Dövlət Agentliyinin (MİDA) layihəsi olan Yasamal Yaşayış Kompleksindən mənzil alan bir neçə vətəndaşın narazılığı ilə bağlı məlumat yayılmışdı. Şikayətlər əsasən Yasamal Yaşayış Kompleksindəki 27, 28 və 29 nömrəli binalarla bağlı idi. Vətəndaşlar mənzil aldıqları binalarda təmir-tikinti işlərinin tam olaraq yekunlaşmadığını, həmçinin aldıqları mənzillərə daxil ola bilmədiklərini bildirirdilər. MİDA məsələ ilə bağlı açıqlama vermişdi ki, həmin binalar “KAT Holdinq” MMC ilə...

Seçilmiş Videolar

Toplum TV loqo