“Nyu Layf” reabilitasiya mərkəzində narkomaniyadan əziyyət çəkən şəxslərə işgəncə verməkdə, onlardan biri Hüseyn Məmmədovun ölümündə təqsirləndirilən mərkəzin məsləhətçisi Fərhad Əliyevin məhkəməsi başlayıb. 

Məhkəmə iclasına hakim Faiq Qəniyev sədrlik edir.  

Bu iş üzrə hələ yayda Orucəli Heydərovun, Elvüsal Hüseynovun, Famil Rzayevin, Sərxan Əliyevin, Qənbər Həsənovun məhkəməsi başlamışdı və hazırda da davam edir.  O iş hakim Rasim Sadlqovun icraatındadır. Fərhad Əliyevin cinayət işi isə hələ ibtidai istintaq dövründə digərlərinin işindən ayrılaraq başqa icraata verilmişdi. Hazırda Fərhad Əliyevin məhkəməyə ruhi xəstəxanadan gətirildiyi deyilir.  
 
İbtidai istintaqın gəldiyi nəticəyə görə, Fərhad Əliyev mərkəzin rəhbəri Orucəli Heydərov, mərkəzin işçiləri - Elvüsal Hüseynov, Famil Rzayev, Sərxan Əliyev və Qənbər Həsənovla birlikdə Mərkəzdə reabilitasiya keçən pasiyentlərə (Hüseyn Məmmədov, Cahangir Əliyev, Kamran Əliyev) işgəncə verib. Nəticədə onlardan biri - Hüseyn Məmmədov ölüb.  

https://toplum.tv/mehkeme/pnecmeddin-sadikovun-oglunun-biznes-ortagi-mehkeme-qarsisindadirp
 
Bu reabilitasiya mərkəzi son illərdə yerli televiziyalarda ən çox reklam olunan məkanlardan biri olub. Burda reabilitasiya prosesində bütün dünyada narkotik, alkoqol asılılığının müalicəsində tətbiq olunan “12 addım” proqramından istifadə edildiyi deyilirdi. İstintaq orqanı isə Mərkəzdəki qaydalara, əmrlərə tabe olmayan şəxslərə qarşı amansız davranıldığını iddia edir.   

Hələ bir neçə ay əvvəl Rasim Sadıqovun sədrliyi ilə keçirilən məhkəmə iclasında Mərkəzdəki işgəncələrdən sonra xəstəxanaya aparılarkən yolda öldüyü iddia olunan Hüseyn Məmmədovun atası Rafiq Məmmədov zərərçəkmiş kimi dindirilmişdi. O, ifadəsində göstərmişdi ki, oğluna işgəncə verilib, 18 saat başıaşağı asılı vəziyyətdə saxlanılıb, nəticədə halı pisləşib, xəstəxanaya götürülərkən ölüb. Ancaq təqsirləndirilən şəxslər məhkəmədə deyiblər ki, Hüseynə işgəncə verməyiblər, o, hardansa narkotik əldə edib, dozadan çox qəbul etdiyinə görə vəfat edib.  

Hazırda məhkəməsi başlayan Fərhad Əliyev də ittihamlar üzrə özünü təqsirli bilmir. O, ifadə verib ki, əvvəllər narkotik vasitələrdən özü də əziyyət çəkib və sonradan sağalıb. F.Əliyev bundan sonra Mərkəzdə məsləhətçi kimi işləməyə başladığını söyləyib. 

Keçmiş məsləhətçi Mərkəzdəki iş rejimindən də danışıb: “Orada növbədə olan işçiləri, həmin qaçmaq istəyən xəstələri saxlayıblar, qaçmalarına imkan verməyiblər. Sonra Mərkəzin rəhbəri gəlib və onlarla söhbətlər aparıb. Mən bunu səhəri gün eşitdim. Həmin şəxslər Mərkəzin zirzəmisində qaçmaları ilə bağlı sorğu-sual olundular”.  

Daha sonra prokurorla Fərhad Əliyev arasında belə bir dialoq gedib:

 - Mərkəzdə saxlanılanlara narkotik verilirdimi?  

- Yuxu dərmanı verilirdi, narkotik verildiyini görməmişəm.  

- Cəza verilirdimi?  

- Yox. Kiminsə ayağından asılmasını da nə görmüşəm, nə eşitmişəm. Onlara əsasən yazı yazdırırdılar. Mən özüm də başımı çox vaxt yazmaqla qatırdım. Bu yolla narkotikdən uzaq dayanmaq olur. Yazı-pozu aparmaqla xəstələri orada saxlamaq olurdu. Mənim özümü də orada yazı-pozu saxlayırdı, yoxsa bir gün də qalmazdım. Bu isə cəza deyildi, müalicə üsulu idi.  

- Kimsə getmək istəyəndə icazə alırdı?  

- Yox. Mənim kiməsə icazə vermək səlahiyyətim yox idi. Mənim işim müalicə tədbirləri ilə bağlı məsləhətlər vermək olub. Rezidentlərlə ünsiyyətdə olmurdum. Yazırlar ki, xəstələri Mərkəzin zirzəmisinə aparmışıq, orada onlara işgəncə vermişik. Belə bir şeylər olmayıb. Bəzi xəstələri zirzəmiyə aparıblar. Amma onların yanında mən olmamışam. Orada baş verənlərdən də xəbərim olmayıb. Həmin vaxt mən Mərkəzin ikinci mərtəbəsində olmuşam. Zirzəmidən səs də eşitməmişəm.  
Təqsirləndirilən şəxs məhkəmə heyətinin suallarını cavablandırandan sonra hakim növbəti məhkəmə iclasını fevralın 6-na təyin edib.  
 
“Nyu Layf” Reabilitasiya Mərkəzi Binəqədi rayonu, Novxanı qəsəbəsinin bağlar massivindəki evlərdən birində yerləşib.

Cinayət işinin materiallarında göstərilib ki, “Nyu Layf” Reabilitasiya Mərkəzində müalicə kursu keçən onlarla pasiyentin hər birindən 1500 manatdan 6600 manata qədər ödəniş alınıb. Araşdırmalar zamanı məlum olub ki, xeyli vaxt reklamı gedən, pasiyentlərin gəldiyi mərkəzin ümumiyyətlə, lisenziyası yoxdur.