Bakı Ağır Cinayətlər Məhkəməsində Nahid Qəhrəmanovun məhkəməsi başlayıb. Onun adı 7 ay əvvəl hökümətyönlü xəbər saytlarında “Kərimə dövləti qurmaq istəyən 32 nəfər”dən biri kimi qeyd olunurdu. Bildirilirdi ki, həmin 32 nəfər özlərini cəmiyyətdə “dindar” kimi qələmə verərək sosial şəbəkələr üzərindən, eləcə də ibadət yerlərində, insanların toplaşdığı digər mərasimlərdə İran lehinə təbliğatlar aparıblar. Dini etiqad azadlığından sui-istifadə edərək Azərbaycanda formalaşmış tolerantlıq ənənələrinə xələl gətirmək üçün xaricdən aldıqları tapşırıqlarını yerinə yetiriblər. Ancaq bu ad altında həbs olunanların işi məhkəməyə gəldikcə məlum olur ki, onlara qarşı həmin əməllə bağlı yox, satış məqsədilə külli miqdarda narkotik əldə edib saxlamaqla bağlı ittiham verilir. Elə Nahid Qəhrəmanov da Cinayət Məcəlləsinin 234.4.3 maddəsiylə təqsirləndirilir. Dövlət ittihamçısının elan etdiyi İttiham aktına görə, DİN Baş Mütəşəkkil Cinayətkarlıqla Mübarizə İdarəsinin əməkdaşları Nahid Qəhrəmanovu Binəqədi ərazisində saxlayaraq idarəyə aparıblar. Üzərinə baxış keçirərkən külli miqdarda psixotrop maddə aşkar edilib.

https://toplum.tv/mehkeme/pirana-casusluqda-ittiham-olunan-sexslerin-istintaq-isi-yekunlasibp

Məhkəmə iclasına hakim Telman Hüseynov sədrlik edir. O, İttiham aktının elanından sonra Nahid Qəhrəmanovdan özünü təqsirli bilib-bilməməsini soruşub. Nahid Qəhrəmanov deyib ki, nəinki özünü təqsirli bilmir, hətta uzun müddətdir ki, insanları narkotikdən yayındırmaq üçün ictimai tədbirlərdə iştirak edib:

Hakim: - İttihamın mahiyyəti sizə aydındırmı?

Müttəhim: - Bəli. Ancaq qondarma ittihamdır. 

Hakim: - Baxın, burda ittiham aktı elan olundu, ittihama görə sizdən külli miqdarda psixotrop maddə aşkar edilib, buna görə sizi 5 ildən 12 ilədək həbs cəzası gözləyə bilər. Özünüzü təqsirli bilirsiz, ya yox? 

Müttəhim: - Bu maddə nəinki saxtadır, mən həmişə iş yerimdə, yaşadığım ərazidə narkotikaya qarşı mübarizə aparmışam. Hətta buna görə mədəniyyət evlərində, müxtəlif yerlərdə tədbirlər keçirmişik, insanları narkotikdən yayındırmaq üçün danışmışıq. 

Hakim: - Bunu ifadənizdə ətraflı danışarsız. 

Növbəti məhkəmə iclasında Nahid Qəhrəmanov ifadə verəcək. 

Nahid Qəhrəmanov bu ilin martında DİN Baş Mütəşəkkil Cinayətkarlıqla Mübarizə İdarəsinin əməkdaşları tərəfindən həbs olunub. Cinayət Məcəlləsinin 234.4.3 (Satış məqsədilə külli miqdarda narkotik əldə edib, saxlama) maddəsi ilə təqsirləndirilir. O, 2011-ci ildə “hicab məhbusu” kimi həbs olunub, 2012-ci ildə 5 il 5 ay həbs cəzasına məhkum edilib. 2013-cü ildə əfvə düşüb. 2017-ci ildə “Nardaran məhbusu” kimi 13 il 6 ay cəza alıb. 2021-ci ildə növbəti dəfə əfv edilib.