Bakı Ağır Cinayətlər Məhkəməsində prokuror Tariyel Qurbanovu hamam görüntüləriylə şantaj etməkdə təqsirləndirilən dəstənin məhkəməsi yekunlaşmaq üzrədir. 

Toplum TV xəbər verir ki, hakim Azər Paşayevin sədrliyi ilə keçirilən məhkəmə iclasında dövlət ittihamçısı müttəhimlərə cəza tələb edib.  
 
Dövlət ittihamçısı çıxışında bildirib ki, Ümman Əliyev, Natiq Nuriyev, Pərvin Yusifov, Ələkbər Nuriyev, İlqar Əliyev, Elnur Eldarov və Sahilə Məmmədova qarşı irəli sürülmüş ittiham məhkəmə araşdırmasıyla sübuta yetirilib. İttihama görə isə, həmin şəxslər əlbir olaraq 2021-ci ilin sentyabrından 2022-ci ilin fevralınadək bir neçə dəfə hamam görüntüləri olduğunu bildirərək pul alıblar.  

https://toplum.tv/mehkeme/pldquobaku-steelrdquo-in-keccedilmis-sahibi-emlakini-geri-teleb-edir-nbspp
 
Prokuror Ümman Əliyevin 9 il, İlqar Əliyevin 8 il, Natiq Nuriyein 8 il, Sahilə Məmmədovanın 6 il, Elnur Eldaovun 8 il 6 ay, Ələkbər Nuriyevin 7 il müddətinə azadlıqdan mərhum edilməsini istəyib.  
  
Prokuror digər təqsirləndirilən Pərvin Yusifovun barəsində olan cinayıt təqibinə xitam verilməsini, onun cinayət məsuliyyətindən azad olunmasını istəyib. Buna səbəb təqsirləndirilən şəxs tərəfindən zərərçəkmişə dəymiş ziyan - 3175 manat Baş Prokurorluğun depozit hesabına, həmçinin qanunun tələb ilə cinayət yolu ilə əldə olunan pulun 25 faizi olan - 793 manatı isə dövlət büdcəsinə ödənilməsi olub.  

Müdafiə nitqi ilə çıxış edən Pərvin Yusifovun vəkili prokurorun çıxışı ilə razı olduğunu bildirib.  
 
Sahilə Məmmədovanın vəkili isə onun barəsində Cinayət Məcəlləsinin 70-ci (şərti məhkum etmə) maddəsinin tətbiq edilməsini istəyib.  
 
Təqsirləndirilən şəxslər məhkəmə ifadələrində göstərmişdilər ki, onlar prokuroru şantaj etməyiblər. İstintaq vaxtı müstəntiq onları belə yazmağa məcbur edib.  
 
Tariyel Qurbanov uzun müddət Baş Prokurorluğun Dövlət təhlükəsizliyi, fövqəladə hallar və sərhəd xidməti orqanlarının istintaq, təhqiqat və əməliyyat-axtarış fəaliyyətində qanunların icrasına nəzarət idarəsinin rəis müavini olub. 

Bu ilin mart ayında vəzifəsindən azad olunan Tariyel Qurbanov sonradan Abşeron rayon prokurorunun böyük köməkçisi təyin olunub. 

Tariyel Qurbanov həmçinin Dini Qurumlarla İş üzrə Dövlət Komitəsinin sədri Mübariz Qurbanlının qardaşıdır. 

Prokuror bir vaxtlar sol əllə hərbi salam verməsi ilə gündəmə gəlmişdi. 
 
Cinayət işi üzrə Tariyel Qurbanovdan başqa Mirvasif Mahmudov ad-soyadlı şəxs də zərərçəkmiş kimi tanınıb.  
 
Məhkəmə prosesi davam edir.