Bakı Ağır Cinayətlər Məhkəməsində keçmiş prokuror Tariyel Qurbanovu hamam görüntüləriylə şantaj etməkdə təqsirləndirilən dəstənin məhkəməsi başa çatıb. 

Toplum TV xəbər verir ki, martın 3-də müttəhimlərə hökm oxunub. Məhkəmənin hökmüylə dəstə başçısı Ümman Əliyev 7 il 6 ay, Elnur Eldarov, Natiq Nuriyev 6 il 6 ay, İlqar Əliyev 6 il, Ələkbər Nuriyev 5 il müddətinə azadlıqdan məhrum edilib. Sahilə Məmmədovaya 4 il 8 ay 24 gün azadlıqdan məhrum edilmə cəzası təyin edilib. Lakin himayəsində olan azyaşlı övladı 14 yaşına çatana qədər cəzanın icrası təxirə salınıb. O, məhkəmə zalından birbaşa azadlığa buraxılıb. Pərvin Yusifovun isə dəymiş ziyanı tam ödəməsi, zərərçəkmiş şəxslə barışığı nəzərə alınaraq onunla bağlı cinayət işinə xitam verilib.

Aylardır ki, davam edən bu məhkəməyə hakim Azər Paşayev sədrlik edirdi. 

https://toplum.tv/mehkeme/pmehkemede-prokuror-ldquomoumlvlam-sixeliyeve-qaytarilan-emlaklar-geri-alinsinrdquonbspp

Ötən məhkəmə iclasında çıxış edən dövlət ittihamçısı bildirmişdi ki, bu şəxslərin 2021-22-ci illərdə prokuror işləyən Tariyel Qurbanovu hamam görüntülərini yayacaqları ilə şantaj edərək pul almaları ittihamı sübuta yetirilib. O, təqsirləndirilən şəxslər tərəfindən zərərçəkmişə dəymiş maddi zərərin - 3175 manatın Baş Prokurorluğun depozit hesabına ödənilməsini tələb etmişdi. 
  
Təqsirləndirilən şəxslərsə məhkəmə ifadələrində göstərmişdilər ki, onlar prokuroru şantaj etməyiblər. İstintaq vaxtı müstəntiq onları belə yazmağa məcbur edib.  

 
Tariyel Qurbanov uzun müddət Baş Prokurorluğun Dövlət təhlükəsizliyi, fövqəladə hallar və sərhəd xidməti orqanlarının istintaq, təhqiqat və əməliyyat-axtarış fəaliyyətində qanunların icrasına nəzarət idarəsinin rəis müavini olub. 

Bu ilin mart ayında vəzifəsindən azad olunan Tariyel Qurbanov sonradan Abşeron rayon prokurorunun böyük köməkçisi təyin olunub. 

Tariyel Qurbanov həmçinin Dini Qurumlarla İş üzrə Dövlət Komitəsinin sədri Mübariz Qurbanlının qardaşıdır. 

Prokuror bir vaxtlar sol əllə hərbi salam verməsi ilə gündəmə gəlmişdi. 
 
Cinayət işi üzrə Tariyel Qurbanovdan başqa Mirvasif Mahmudov ad-soyadlı şəxs də zərərçəkmiş kimi tanınırdı.