Məhkəmə

Məhkəmədə etiraz: katiblə vəkil bacı-qardaş imiş

Leyli Cəfərova
21 İyul, 2022
434

Açıq mənbələrdən götürüıüb

“Xəzər rayon Məhkəməsində çıxarılan xeyli hökm ləğv edilməlidir”  

Bu gün, iyulun 21-də Xəzər rayon Məhkəməsində keçirilən prosesdə ağac kəsməkdə ittiham olunan həkim, “Andromed” Klinikasının faktiki sahibi olan Mirzəli Quliyevin  vəkili İlqar Rüstəmov hakim Əkrəm Qəhrəmanova etiraz edib. O, etirazını hakimin icraatındakı məhkəmə işlərində katib və dövlət hesabına təyin olunan vəkilin bacı-qardaş olmasıyla əsaslandırıb: 

“Necə ola bilər ki, 9 iclas keçirilib, bacı-qardaş oturub burda, biri katibdir, biri vəkil? Özü də həmin vəkil bu işdə dövlət hesabına təyin edilib. Hamıya məlumdur ki, məhkəmə iclasında təqsirləndirilən şəxsin dövlət hesabına vəkillə təmin olunması üçün müraciəti hazırlayan, yazıb-pozan hakimin katibi olur. Sizin katib də bütün işlərdə dövlət hesabına vəkil lazım olanda bu məhkəmə binasının 5 metrliyində oturan vəkil qardaşını çağırır”. 

Əvvəl vəkilə və katibə, sonra da hakimə etiraz... 

İstintaqın gəldiyi nəticəyə görə Mərdəkanda yerləşən “Andromed” Klinikasının faktiki sahibi olan, orada həkim işləyən Mirzəli Cəfərquliyev klinikanın ərazisində iki ağac kəsməkdə ittiham olunaraq məhkəməyə verilib.

O və bir neçə şəxs Cinayət Məcəlləsinin 259-cu maddəsiylə ittiham olunur.

Mirzəli Cəfərquliyevin müdafiəsinə yeni qoşulan vəkil İlqar Rüstəmov işlə tanış olanda xəbər tutub ki, müvəkilinin bu yaxınlaradək vəkili olan Elşən Hüseynov hakimin katibi Mətanət Hüseynovanın qardaşıdır. 

Yeni vəkil ötən məhkəmə iclasında dövlət hesabına təyin olunmuş əvvəlki vəkilə və hakimin katibinə etiraz edib. Hakim etirazı təmin edib. Bu günsə vəkil hakimə də etiraz edib. O bildirib ki, elektron sistemdən əldə etdiyi məlumata görə, indiyədək bacı-qardaş xeyli sayda eyni məhkəmə iclaslarına çıxıblar, biri məhkəmə katibi, digəri vəkil kimi.

Vəkil vəsatətini təqdim edərkən bunları dedi: “Sizin icraatınızda olan çoxsaylı məhkəmə hökmləri var ki, bu bacı-qardaşın iştirakıyla çıxarılıb. Bu isə qanunvericiliyə ziddir. Cinayət Prosessual Məcəllənin 109, 116-cı maddələrinə görə, yaxın qohumların və şəxsi asılılıq münasibətində olan şəxslərin eyni cinayət prosesində iştirakı qanunvericiliyin tələbinə ziddir. Siz hakim olaraq müdafiəçi və katibinizin yaxın qohumluq əlaqəsində olduğunu bilə-bilə onların prosesdə iştirakına qəsdən yol vermisiniz. Belə olan halda biz sizin bu məhkəmə iclasına sədrlik etməyinizə etiraz edirik”.  

Hakim təqsirləndirilən şəxsə: Elşən də yoxdu, Mətanət də yoxdu, daha nə istəyirsiz? 

Hakim Əkrəm Qəhrəmanov etirazla bağlı vəsatətin Xəzər rayon Məhkəməsinin sədr əvəzi Zaur Tağıyevə veriləcəyini söylədi.

Pərt vəziyyətdə olan hakim növbəti məhkəmə iclasının tarixini elan edəndən sonra üzünü təqsirləndirilən şəxs Mirzəli Cəfərquliyevə tutdu:  “Mən hakiməm, vətəndaşam. Heç vətəndaş kimi demirəm, elə hakim kimi deyirəm. Bildirmək istəyirəm ki, Cəfərquliyev, ötən iclaslarda sizin bir neçə dəfə vəsatətiniz oldu, təmin etdim. Əgər mən qərəzli olsaydım, bu işin nəticəsində bir marağım olsaydı, heç o vəsatətlərinizi təmin etməzdim. Bundan başqa, siz o biri vəkiliniz  vasitəsiylə bizə disk təqdim etdiniz, mənim hansısa marağım olsaydı, heç o diski qəbul etməzdim, heç qulaq asmazdım. Qohum katiblə vəkilin eyni prosesdə iştirak etməsi qanunvericiliyə nə dərəcədə uyğundur ya yox, bu, hələ mübahisəli məsələdir. Vəkildən imtina etdiniz, katibdən imtina etdiniz, istintaqın təzələnməsini istədiniz, mən hamısını sizinçün təmin etdim. Ancaq təmin etməyə də bilərdim, elə deyilmi?.. Yaxşı, indi Elşən də yoxdu, Mətanət də yoxdu, nə problem var ki, daha nə istəyirsən?”, - hakim bunu deyib, məhkəmə zalını tərk etdi. 

 Növbəti məhkəmə iclası iyulun 25-nə təyin edilib.

Hüquqşünas Namizəd Səfərov deyir ki, yaxın qohumlar olan katib və dövlət hesabına təyin olunmuş vəkilin iştirakıyla keçirilən məhkəmələrin nəticələri ləğv olunmalı, bu işlərə yeni açılmış hal qaydasında təkrar baxılmalıdır.

Məhkəmə

Səlim Müslümov 20 milyon manat zərər ödəyib

Leyli Cəfərova
15 Avqust 2022

Açıq mənbələrdən götürülüb

Şəhid ailələri, əlillər üçün nəzərdə tutulmuş binaların tikintisində “əliuzunluq” etmiş keçmiş nazir dövlətə daha 7 milyona yaxın pul ödəməlidir.   Avqustun 15-də Bakı Ağır Cinayətlər Məhkəməsində hakim Faiq Qəniyevin sədrliyi ilə keçmiş Əmək və Əhalinin Sosial Müdafiəsi naziri Səlim Müslümovun məhkəməsi davam edib.     Məhkəmə iclası başlayan kimi prokuror Babaxan Həsənəliyev 573 səhifəlik İttiham Aktının nəticəvi hissəsini elan edib.      İttiham aktında qeyd olunub ki, keçmiş nazir şəhid ailələri və müharibə əlilləri üçün müxtəlif rayonlardakı yaşayış binalarının  tikintisinə ayrılan pulların bir hissəsini mənimsəyib, bir hissəsini də israfçılıqla istifadə edib. Bu işlərlə bağlı tenderlərdə qalib gələn podratçı şirkətlərdən külli...
Məhkəmə

Daha bir keçmiş mühacir məhkəmə qarşısına çıxarılır  

Leyli Cəfərova
9 Avqust 2022

Açıq mənbələrdən götürülüb

Samir Aşurov adam döyməkdə ittiham olunur      Qəsdən sağlamlığa ağır zərər vurmaqda ittiham olunan Bakı şəhər sakini Samir Aşurovun cinayət işi üzrə ibtidai istintaq yekunlaşıb. İş üzrə materiallar baxılması üçün Bakı Ağır Cinayətlər Məhkəməsinə göndərilib.  Toplum TV xəbər verir ki, cinayət işi hakim Məhəmməd Əkbərovun icraatındadır. Məhkəmənin hazırlıq iclası avqustun 19-a təyin edilib.  https://toplum.tv/mehkeme/selim-muslumov-kommersiya-sirlerine-gore-mehkemesinin-qapali-kecirilmesini-isteyib Samir Aşurov martın 29-da Almaniyadan deportasiya olunub, 20 gündən sonra isə Bakıda polis tərəfindən saxlanılıb. Onu Elşən Nəbiyevə bıçaqla xəsarət yetirməkdə ittiham ediblər (Cinayət Məcəlləsinin 126.2.4-cü maddəsi -xuliqanlıq niyyətilə qəsdən sağlamlığa ağır ziyan vurma). O, 6 ildən 11 ilədək azadlıqdan məhrum edilə bilər.  İyulun 21-də...

Seçilmiş Videolar

Toplum TV loqo