Bəxtiyar Hacıyevin səhhəti ilə bağlı Toplum TV Penitensiar Xidmətlə əlaqə saxlayıb. Oradan bildirilib ki, Bəxtiyar Hacıyev hazırda həkim nəzarətindədir. Qurumdan onun səhhəti haqqında əlavə məlumat verilməyib.

*

14:10

Ombudsaman aparatının ümumi şöbə müdiri İbrahim Abdullayev ictimai fəal Bəxtiyar Hacıyevin anası Solida Mövlayevanı qəbul edib.

Toplum TV xəbər verir ki, burada Mövlayevaya bildirilib ki, Ombudsman Səbinə Əliyeva hazırda məşğul olduğundan onunla görüşmək imkanı yoxdur. İbrahim Abdullayev Mövlayevanın tələblərini Ombudsmana çatdıracağını bildirib. 

***

13:18

Bu gün, fevralın 1-də həbsdə olan ictimai fəal Bəxtiyar Hacıyevin anası Solida Mövlayeva Ombudsmanla görüş tələbiylə Ombudsman aparatı qarşısında etiraz aksiyası keçirib. 

Toplum TV müxbirinə açıqlama verən Solida Mövlayeva deyib ki, oğlunun vəziyyətinin ağırdır, sağlamlığı kəskin pisləşib. O, oğlunun təqsirsiz olduğunu vurğulayıb və onun dərhal azadlığa buraxılmasını tələb edib. 

Polis Mövlayevanı Hökumət Evinin Vətəndaşları Qəbulu Mərkəzinə yönləndirib. Mərkəzdə bildirilib ki, Ombudsmanın hazırda başqa görüşdə olduğundan onu qəbul edə bilmir, amma Mövlayeva ilə görüş ehtimalı var. 

https://toplum.tv/siyaset/pvekiller-bextiyar-haciyevle-goumlruumlse-buraxilmadip

Xatırlatma

İctimai fəal Bəxtiyar Hacıyev ötən il dekabrın 9-da Xətai Rayon Məhkəməsinin qərarı ilə 1 ay 20 gün müddətinə həbs edilib. Yanvarın 21-də məhkəmə müstəntiqin vəsatəti əsasında həbs qətimkan tədbirini fevralın 28-dək uzatmaq qərarına gəlib.

Hacıyev xuliqanlıq və məhkəməyə hörmətsizlikdə ittiham olunur. Yanvarın 13-də ona qarşı irəli sürülən ittiham ağırlaşdırılıb. İctimai fəal isə ona ünvanlanan ittihamları qəbul etmir, həbsinin siyasi sifariş olduğunu bildirir.

ABŞ Dövlət Departamenti, beynəlxalq və yerli insan hüquqları təşkilatları Hacıyevin həbsinin qeyri-qanuni olduğunu bildirib və Azərbaycan hökumətini onu azadlığa buraxmağa çağırıblar.

Bəxtiyar Hacıyev saxlanıldığı 1 saylı Bakı İstintaq Təcridxanasında uzun müddətdir aclıq aksiyası keçirir. O, bununla həbsinə etiraz edir, həmçinin bütün digər siyasi məhbuslara da azadlıq tələb edir.