İctimai televiziyanın martın 27-də Dövlət Təhlükəsizliyi Xidmətinin (DTX) əməliyyatları ilə bağlı yayımladığı xüsusi reportajda tanınmış ictimai şəxsə sui-qəsd planından bəhs edilir. 

Toplum TV xəbər verir ki, materialda Ruhulla Axundzadə adlı şəxsin tapşırığı ilə Faiq Zeynalov, Etibar Məmmədzadə və Hüseyn Hüseynzadə adlı şəxslərin  Azərbaycan Respublikasında İranın lehinə casusluq etdikləri iddia olunub. 

Təqsirləndirilən şəxs Faiq Zeynalov açıqlamasında deyib ki, Bakı şəhərində ictimai şəxsin əvvəlcə izlənilməsi, ardınca da ona bıçaq və ya odlu silahla xəsarət yetirmək planı olub. Onun sözlərinə görə, məqsəd həmin şəxsə "göz dağı vermək" olub. 

Materialda haqqında bəhs edilən ictimai şəxsin adı açıqlanmayıb. Amma təqsirləndirilən şəxsin "ictimai şəxsə göz dağı vermək məqsədiylə cəzalandırılması metodu" ilə Milli Məclisin deputatı Fazil Mustafanın məruz qaldığı sui-qəsdin detalları arasında oxşarlıqlar var, lakin əməliyyat görüntülərinin çəkildiyi ərazi deputatın evinin yerləşdiyi məkan deyil. 

Fazil Mustafa ötən gün, martın 28-də Zabrat qəsəbəsində, evinin qarşısında silahlı hücuma məruz qalıb. Ona “Kalaşnikov” avtomatından çoxsaylı atəş açılıb. Çiyin nayihəsindən və ayağından güllə yarası alan deputat təcili xəstəxanaya çatdırılaraq əməliyyat olunub. Hazırda onun səhhətinin stabil olduğu bildirilir. 

DTX deputata qarşı silahlı hücumun terror aktı olduğunu bəyan edib. Hadisə barəsində Cinayət Məcəlləsinin müxtəlif maddələri ilə cinayət işi başlanılıb. 

"Terror aktını törətmiş şəxsin və cinayət hadisəsi ilə əlaqəsi olan digər şəxslərin müəyyən olunaraq cinayət məsuliyyətinə cəlb olunması istiqamətində əməliyyat-istintaq tədbirləri həyata keçirilir", - deyə DTX-nın məlumatında bildirilib. 

DTX Toplum TV-nin əməliyyat videomaterialında sözügedən qəsd planı ilə deputata sui-qəsd arasında əlaqə olub olmadığı barədə sualına hələ cavab verməyib. 

Deputat Fazil Mustafa çıxışlarında vaxtaşırı olaraq İran İslam Respublikasının Azərbaycanla bağlı siyasətini kəskin tənqid edirdi.