Artıq bir sutkadan çoxdur ki, bir qrup hökumət yönlü təşkilatların nümayəndələrinin Şuşa-Xankəndi yolunda keçirdikləri etiraz aksiyaları davam edir. 

Aksiya iştirakçılarının sayı artmaqdadır və paytaxtdan aksiyanın keçirildiyi Şuşa-Xankəndi yoluna ictimai fəalların axını başlayıb. 

Etirazçılar Rusiya sülhməramlılarının nəzarəti altında olan ərazilərdə təbii sərvətlərin qanunsuz istismarına qarşı çıxır, azərbaycanlı mütəxəssislərin mədənlərin monitorinqini aparmasına imkan yaradılmasını tələb edirlər.

Qarabağdakı rejimin "daxili işlər nazirliyi"nin məlumatında bildirilib ki, Xankəndi-Gorus avtomobil yolunun bağlaması nəticəsində yüzlərlə vətəndaş evlərinə qayıda bilmir. Yolda bir kilometr uzunluğunda avtomobil tıxacı yaranıb, Xankəndi ilə ətrafdakı erməni kəndləri arasında nəqliyyat əlaqəsi kəsilib.

Deputat Elman Nəsirov isə davam edən etiraz aksiyası fonunda Azərbaycan, Ermənistan və Rusiya arasında imzalanmış 10 Noyabr sənədinə diqqət çəkir. Deyir, iki ildir Rusiya tərəfi sənədin 4-cü bəndini icra etmir:

Müstəqil siyasi şərhçilər hesab edir ki, sözügedən aksiya Azərbaycan hökuməti tərəfindən təşkil olunub və Rusiya tərəfindən göz yumulub. Bəzi ekspertlərə görə, bu aksiya Azərbaycanın maraqlarına uyğun deyil.

Məsələn, Azər Qasımlı düşünür ki, bu aksiya Azərbaycanın maraqlarına o zaman cavab verə bilər ki, hakimiyyətin aydın iki proqramı olmalıdır:

-  Rusiyanın hərbi kontingentinin Qarabağdan çıxarılması ilə bağlı siyasətini əks etdirən danışıqlar planı
-  Qarabağın və orada yaşayan əhalinin Azərbaycana inteqrasiyasını əks etdirən barış planı 

Ötən həftə Azərbaycanın xarici işlər nazirliyi Rusiyaya nota yollamışdı. Notada Rusiya sülhməramlı kontingentinin yerləşdiyi Azərbaycan ərazilərində təbii sərvətlərin qeyri-qanuni istismarının qarşısının alınması, sülhməramlı kontingentin ekologiyaya mənfi təsirin nəticələrinin aradan qaldırılmasına imkan yaratmaması bildirilmişdi.

Bu ay ikinci dəfədir ki, Azərbaycanlılar tərəfindən Ermənistanla Qarabağ arasında yeganə quru yol olan Gorus-Xankəndi yolu bağlanılıb. Qarabağdakı seperatçı rejimin "daxili işlər nazirliyi" isə bildirib ki, Azərbaycan tərəfi beynəlxalq humanitar konvensiyalardakı normaları, Qarabağ ermənilərinin əsas hüquq və azadlıqlarını pozur.