Müsahibə

Gürcüstan müxalifətçisi: "Baş nazirin istefası müxalifət liderinin həbsi ilə bağlı deyil"

Nigar Səmədli
19 Fevral, 2021
735

24news.ge

“Gürcüstanda hakimiyyət məcbur qalaraq istefaya gedəcək”

“Toplum TV”-nin müsahibi Gürcüstanın “Vahid Milli Hərəkat” Partiyasının Marneuli qərargahının rəhbəri Aqil Mustafayevdir.

O, Gürcüstanda son günlər baş verən hadisələr, üzvü olduğu partiyanın rəhbəri Nika Meliyanın həbs qərarı, baş nazirin istefası və digər məsələrlə bağlı danışıb.

- Gürcüstanın Baş naziri Georgi Qaxariyanın istefası gözlənilən idimi və bu, Gürcüstanda necə qarşılandı? 

- 2020-ci ilin oktyabrın 31-də keçirilən seçkilərdən əvvəl Georgi Qaxariyanın postunu tərk etməsi ilə bağlı mediada məlumatlar yayılsa da, istefa vermədi. Çünki seçkiöncəsi bu addımı partiyanın imicinə təsir edəcəkdi. Amma hər kəsə məlum idi ki, o, yaxın zamanda vəzifəsindən uzaqlaşdırılacaq. Bunun üçün partiyadaxili qruplaşmaların əlində bir çox səbəb vardı. Bunların arasında Qaxariyanın əvvəllər Gürcüstan əhalisi arasında aqressiv addımları ilə yadda qalması, eyni zamanda partiyadaxili məsələlərdə yaranan müəyyən fikir ayrılıqları idi. İndiki halda isə o, düzgün zamanda düzgün taktika işlədərək istefa verdi.

- Georgi Qaxariya deyib ki, istefasının səbəb müxalifət lideri Nika Meliyanın həbsi ilə bağlıdır. Bu məsələdə hakim partiya - “Gürcü Arzusu” ilə aralarında  fikir ayrılığı yaranıb. Sizcə, Baş nazirin bu cür açıq tekslə istefa verməsinə səbəb nədir?

- Mən bunu açıq şəkildə söyləyirəm ki, Baş nazir Georgi Qaxariyanın istefa verməsinin səbəbi müxalifət lideri Nika Meliyanın həbs olunması ilə bağlı deyildi. Qeyd etdiyim kimi, uzun zaman öncədən partiyada daxili çəkişmələr, qruplaşmalar vardı və onlar birləşərək Qaxariyanı uzaqlaşdırmaq istəyirdilər. Sadəcə, son dövrlərdə onun siyasi şuranın iclaslarında, eyni zamanda ciddi siyasi qərarların verilməsində iştirak etməməsi və Meliya ilə bağlı fikrinin partiya daxilində müzakirə zamanı onun tərəfini tutmamaları bütün bu prosesi sürətləndirdi. Nəticədə o, özü üçün düzgün bir vaxt seçərək istefa verdi.

- “Vahid Milli Hərəkat” Partiyasının sədri Nika Meliyanın həbsinin təxirə salınması Gürcüstan hökumətinin geri addımı kimi dəyərləndirilə bilərmi? 

- Meliyanın həbsinin haradan qaynaqlandığına nəzər salsaq, 2019-cu il iyunun 20-də baş verən hadisələrə geri dönməliyik. İyun hadisələrində Gürcüstan hakimiyyəti torpaqlarının 20 faizini işğal etmiş Rusiyanın dövlət nümayəndəsini Gürcüstan parlamentinin spiker kürsüsündə əyləşdirərək xalqa qarşı təhqiramiz bir addım atdı. Bu səbəblə keçirilən etiraz aksiyalarında şəxsən mən də daxil olmaqla bir çox Gürcüstan vətəndaşı, eyni zamanda siyasi partiyaların liderleri də iştirak edirdi. Həmin aksiyalarda yüzlərlə şəxs hakimiyyətin sifarişi ilə məhkəmə tərəfindən sorğulandı və hətta bəzilərinə həbs qərarı çıxarıldı. Eyni zamanda məhkəmə partiyamızın lideri Nika Meliyanı cərimələdi. Sonradan Meliyanın məbləği ödəməkdən imtina edərək qanunsuzluğa qarşı çıxması hakimiyyət tərəfindən onun haqqında həbs qərarının çıxarılması ilə nəticələndi. Bu qərardan sonra Gürcüstan vətəndaşlarının etirazını, eyni zamanda bütün müxalif partiyalarının Meliya ətrafında birləşməsini və vəziyyətin onların siyasi platformaları üçün ciddi şəkildə zərərli olduğunu görən iqtidar geri addım atdı. Ümumilikdə götürsək, hakimiyyətin bundan sonra atacağı bu cür addımlar onun məğlubiyyəti kimi görünəcək. 

- "Vahid Milli Hərəkat" Partiyası növbədənkənar parlament seçkilərinin keçirilməsini tələb edir, eyni zamanda sabiq prezident Mixail Saakaşvili də müxalif partiyalara bununla bağlı çağırış edib. İndiki halda parlament seçkilərinin keçirilməsi mümkündürmü?

- "Vahid Milli Hərəkat" Partiyası və Gürcüstandakı bütün müxalif partiyalar ölkədə növbədənkənar parlament seçkilərinin keçirilməsini tələb edir. Bu, Gürcüstan vətəndaşları tərəfindən sifariş verilmiş və partiyalar tərəfindən irəli sürülən tələbdir. Bunun üçün yüzlərlə səbəb var, amma bunlardan ən önəmlisi Gürcüstanda keçirilən son seçkilərin saxtalaşdırılması, eyni zamanda bu seçkiləri qəbul etməyən parlament nümayəndələrinin mandatlardan imtina etməsidir. Bütün bu səbəblər onu göstərir ki, Gürcüstanda hazırkı siyasi böhrandan çıxış yolu yalnız növbədənkənar seçkilərin keçirilməsidir. Bu siyasi böhran nəinki ölkədəki partiyalar üçün, eyni zamanda bütün Gürcüstanın ictimai-siyasi və iqtisadi vəziyyətinin gərginləşməsinə aparıb çıxarır. Çox yaxın zamanda artıq beynəlxalq təşkilatlar öz mövqelərini bildirməyə başlayacaq, hətta artıq başlayıblar. Bütün baş verənlər onu göstərir ki, Gürcüstanda növbədənkənar parlament seçkiləri qaçılmazdır, sadəcə, hakimiyyət əlindən gəldiyi qədər vaxtı uzadaraq seçkiləri ləngitməyə çalışır. 

- Sizcə, Gürcüstanda növbəti inqilabi proseslər gözlənilirmi?

- Düşünmürəm ki, Gürcüstanda yenidən inqilab olsun, çünki artıq xalq da inqilablardan demokratik yolla hakimiyyətin dəyişməsi mərhələsinə keçmək istəyir. Necə ki 2012-ci ildə Saakaşvili tərəfindən bu addım atıldı və demokratik yolla hakimiyyətin dəyişməsinə nail olundu. Amma çox təəssüflər olsun ki, 2020-ci ilin parlament seçkilərində Gürcüstan vətəndaşlarının dəyişiklik üçün verdiyi səsi "Gürcü Arzusu" Partiyası qəbul etmədi və vəziyyəti daha da gərginləşdirdi. Xalq isə növbədənkənar seçkilərin keçirilməsini tələb edəcək və hakimiyyət bu tələbi yerinə yetirmədiyi halda onlar artıq itaətsizlik aksiyalarına başlayacaqlar. Nəticədə isə hakimiyyət məcbur qalaraq inqilabsız istefaya gedəcək. 

Müsahibə

“Mən Xocalıda anamın şəhid olduğu yerdən keçib erməni ilə birlikdə yaşaya bilmərəm”

Aytən Zamanova
26 Fevral 2021

Justice for Khojali

“Xocalıma, anamın şəhid olduğu yerə getmək istəyirəm”. "Toplum TV"-nin budəfəki müsahibi Milli Qəhrəman Tofiq Hüseynovun qızı Yasəmən Həsənovadır. Tofiq Hüseynov Xocalıda yaradılmış özünümüdafiə taborunun yaradıcılarından olub, daha sonra həmin taborun komandiri təyin edilib; “Mixaylo” ləqəbiylə tanınırdı.  Şahidlərin danışdığına görə, T.Hüseynov fevralın 26-da çox sayda dinc sakini Xocalıdan çıxara  bilib, 3 gün sonrasa sonuncu qumbarasını sinəsinə sıxaraq özü ilə bərabər yaxınlığındakı silahlı erməniləri də partladıb. O həlak olanda 37 yaşı vardı.  Xocalı hadisələri vaxtı həyat yoldaşı, qardaşı, ata-anası da qətlə yetirilib.   Azərbaycan Respublikası Prezidentinin 7 iyul 1992-ci il tarixli fərmanı ilə Tofiq Hüseynov "Azərbaycanın Milli Qəhrəmanı" adına layiq görülüb. O,...
Müsahibə

Arif Əliyev: "Əli Həsənov deyirdi ki, diffamasiyanı qəbul etsək, küçədə qan su yerinə axacaq"

Aytac Məmmədli
20 Fevral 2021

Arif Əliyev - "Turan"

Milli Məclisin İnsan hüquqları komitəsinin sədri Zahid Oruc deyib ki, komitə yaz sessiyası ərzində diffamasiya ilə bağlı dinləmə təşkil edəcək. O bildirib ki, mətbuat azadlığının gücləndirilməsi, beynəlxalq indekslərdəki problemlərin aradan qaldırılması üçün diffamasiya ilə bağlı məsələləri komitənin gündəliyinə daxil ediblər. Azərbaycan beynəlxalq təşkilatlar qarşısında diffamasiyanın dekriminallaşdırılması ilə bağlı öhdəlik götürsə də, bununla bağlı qanun layihəsi indiyə qədər parlamentdə müzakirəyə çıxarılmayıb. Bəs Azərbaycan diffamasiya ilə bağlı öhdəlikləri niyə yerinə yetirmir? “Toplum TV” bu və digər suallara aydınlıq gətirmək üçün Bakı Mətbuat Klubunun rəhbəri, jurnalist Arif Əliyevə müraciət edib. - Arif bəy, diffamasiya haqqında qanun çoxdandır ki, müzakirə olunur, niyə hələ də...
Seçilmiş Videolar