Vamiq Vəliyev Goranboy rayon sakinidir. O, 5 uşaq atasıdır. Toplum TV – nin qaynar xəttinə müraciət edən Vamiq Vəliyev sosial durumunun yaxşı olmadığından gileylənir. Sosial yardım almaq üçün etdiyi müraciətlərinə də baxılmadığını iddia edir.

Vamiq Vəliyevin həyat yoldaşı Şəlalə Haqverdiyeva sosial yardım üçün Dövlət Sosial Müdafiə Fonduna müraciət edib. Bununla bağlı Toplum TV-yə Dövlət Sosial Müdafiə Fondunun ictimaiyyətlə əlaqələr departamentinin müdiri Rəşad Mehdili tərəfindən verilən məlumata görə, vətəndaş elektron müraciətdə mülkiyyətində olan kənd təsərrüfatına yararlı torpaq sahəsinin sənədinin nömrəsini düzgün yazmadığına görə müraciətinə imtina cavabı verilib. 21 aprel 2023-cü il tarixində etdikləri müraciətlərinə də imtina cavabı gəlib. Buna səbəb isə şəxsiyyət vəsiqəsinin vaxtının bitməsi göstərilib. Ümidini itirməyən ailə mayın 8-də yenidən müraciət edib.

Şikayətçinin problemi bununla da bitmir. Onun qızı epilepsi xəstəsidir. Xəstəliyinə görə 2016-cı ildən pensiya alır.

Dövlət Tibbi-Sosial Ekspertiza və Reabilitasiya Agentliyinin şöbə müdiri Tural Qurbanov Toplum TV-yə bildirib ki, Vəliyeva Lətifə Vamiq  qızı ilə bağlı elektron sistemə daxil edilmiş göndərişdə vətəndaşın instrumental müayinə nəticələri qeyd olunmadığına görə əlilliyinin qiymətləndirilməsi mümkün olmayıb. Lətifə Vəliyeva 03.02.2023-cü il tarixdə Dövlət Tibbi-Sosial Ekspertiza və Reabilitasiya Agentliyinin ərazi üzrə Tibbi-Sosial Ekspert Komissiyası tərəfindən əyani müayinə edilib. Tural Qurbanov qeyd edir ki, vətəndaşın tibbi səndlərinə və əyani müayinə nəticələrinə əsasən əlavə müalicəyə ehtiyacının olması barədə qərar qəbul edilib.

Qaynar Xətt verlişinin qonağı olan Hüquqşunas Xalid Bağırov məsələni şərh edib. O qeyd edir ki, ünvanlı sosial yardım sistemi xırda detallar üzərində qurulduğu üçün, rahatlıqla bəhanələr gətirə bilirlər.

Xalid Bağırov pensiyanın kəsilməsi ilə bağlı olan problemin də səbəblərini verlişdə izah edib. O deyir ki, qanunvericilikdə bunun üçün fırıldaq imkanı yaradıblar.

Hüquqşunas söyləyir ki, gecdə olsa əlilliyi bərpa edilir və yenidən pensiya ilə təmin olunur. Ancaq bu 6 ay ərzindəverilməli olan pensiya dövlət tərəfindən mənimsənilir.