“İşıq İdarəsinin nə haqqı var ki, həyətimə transfarmator qoysun və qapımın kilidini sındırıb  istədiyi vaxt həyətimə girib çıxsın?”

 “2000-ci ildə Heydər Əliyev sonuncu dəfə Şəkiyə gələndə rayon İcra Hakimiyyəti bizim icazəmiz və xəbərimiz olmadan 1912-ci ildən tikilən və yoldaşıma xalasından miras qalan evi yerlə-yeksan etdi ki, görünüşü pisdir, prezident görməsin. Həmin evdə yaşamadığımız üçün bu haqda bizə qonşular xəbər verdi. Gedib etiraz etdikdə dedilər ki, sizə kömək göstərəcəyik, evi yenidən tikərsiniz”.

Bu haqda Toplum TV-yə danışan Şəki şəhər sakini Aygün Məmmədovanın sözlərinə görə, verilən vədə əməl edilməyib, evi öz hesablarına tikiblər.

Şəki şəhər Məhəmməd Əmin Rəsulzadə küçəsi 32 nomrəli evdə yaşayan ailə indi də divarlarına bitişik qoyulmuş transfarmator problemi ilə üzləşib.

Şikayətçi deyir ki, İşıq İdarəsinin işçiləri onların icazəsi olmadan qapının kilidini qıraraq həyətə girir, transfarmatora baxırlar.

https://toplum.tv/qaynar-xett/sikayetci-verdiyi-rusvetin-ise-yaramamasindan-narazidir

400 ailəyə xidmət edən transfarmatorun həyətindən götürülməsini tələb edən Aygün Məmmədova İşıq İdarəsinə, İcra Hakimiyyətinə rəsmi müraciət etsə də, probleminin həll edilmədiyini bildirir.

“İcra Hakimiyyətindən mənə deyirlər ki, evi həyətin aşağı hissəsində tikərdin”

“İllərdir əlimə düşən vəsaiti bu evin tikintisinə qoymuşam ki, 29 yaşlı oğlumu evləndirib həmin evə yerləşdirim. Ancaq bu gün evimizdə yaşamağa imkan vermirlər. Axı işıq idarəsinin nə haqqı var ki, mənim icazəm olmadan həyətimə transfarmator qoysun və qapımın kilidini sındırıb həyətimə istədiyi vaxt girib çıxsın? İcra Hakimiyyətindən mənə deyirlər ki, evi həyətin aşağı hissəsində tikərdin. Axı bu həyət mənimdir, istədiyim yerdə tikə bilərəm. Bu qədər məmur özbaşınalığı olmaz”,- şikayətçi belə söyləyir.

İşıq İdarəsi: “Transfarmatoru götürməkdə biz də maraqlıyıq”

Şəki İşıq İdarəsinin müdiri Elgün Məmmədov Toplum TV-yə vətəndaşın həyətinə yerləşdirilən transfarmatorun oradan götürülməsində onların da maraqlı olduğunu deyir.

“Transfarmator çöl tərəfdən vətəndaşın hasarına bitişikdir. Bizim transfarmator məntəqəsi 1956-cı ildə quraşdırılıb. Bu gün onu götürüb qoymağa yer yoxdur. Əvvəllər transfarmatorun əhatəsi boş olub. Sonradan yerli idarəetmə qurumları tərəfindən həmin torpaq sahələri satılıb”.

O, bununla bağlı rayon İcra Hakimiyyətinə, Fövqəladə Hallar Nazirliyinin Şəki regional müəssisəsinə müraciətlər etdiklərini bildirir.

https://toplum.tv/qaynar-xett/vetendas-internet-problemiyle-bagli-7-ildir-eyni-cavabi-alir-anten-qurasdirilacaq

E.Məmmədov transfarmatoru yerləşdirməyə yer ayrılması üçün Şəki bələdiyyəsinə belə müraciət etsələr də, cavab almadıqlarını vurğulayır.

Şəki Bələdiyyəsinin torpaq mütəxəssisi İlham Xəlilov bununla bağlı şəhər 12 saylı Şəki Ərazi İdarəsinə müraciət ünvanlandığını deyir.

Onun söylədiyinə görə, aylardır transfarmatorun oradan götürülməsinə çalışırlar.

“Sadəcə onun hara qoyulması məsələsi qalıb. Həmin transfarmatorun ətrafındakı qapalı ərazinin dövlətə ya bələdiyyəyə məxsus olduğunu bilmək üçün dəfələrlə Əmlak Komitəsi yanında Reyestr xidmətinə məktub yazıb, müraciətlər etmişik, cavab gözləyirik. Vətəndaş tələskənlik edir. O haqlıdır. Amma biz də əlimizdən gələni edirik ki, problem həllini tapsın”.  

Şikayətçi Aygün Məmmədova isə bildirir ki, işıq transfarmatoru ora 1956-cı ildə qoyulmayıb. Bundan başqa, həmin ərazinin onlara məxsus olmasına dair Daşınmaz Əmlakının Dövlət Reyestri xidmətindən əllərində sənəd var. Şikayətçi məsələnin səbəbsiz yerə yubandığını iddia edir.

Şəki şəhər İcra Hakimiyyətindən isə məsələyə yazılı münasibət veriləcəyi, cavabın 15 gün, 1 ay çəkə biləcəyi deyildi.

Şikayətçi Aygün Məmmədova artıq səbrinin qalmadığını və aidiyyəti qurumların bəhanələrə son qoyub həyətindəki ransfarmatoru götürməsini tələb edir.