“Atam Səid Zeynalov 2010-cu ildə həbs edilib. Azadlığa çıxmağına 1 il qalmış 9 saylı Cəzaçəkmə Müəssisəsinin rəis müavini Kamran Hacıyev atama yaxınlaşaraq 3500 manat qarşılığında onun şərti azadlığa buraxılmasına kömək edəcəyinə söz verərək bizi aldadıb”.

Bu haqda Toplum TV-nin qaynar xəttinə Bakı şəhər sakini Səbinə Zeynalova yazıb. Şikayətçinin iddiasına görə, atasından alınan rüşvət sonra geri qaytarılıb, amma 100 manat əksik. Zeynalova onlara maddi və mənəvi ziyan vurulduğunu deyir. Bildirir ki, şikayətlərinə baxan yoxdur.

“Mən qızı olaraq bankdan 3500 manatı kredit götürüb atama verdim ki, Kamran Hacıyevə versin. 5 fevral 2022-ci ildə atam pulu cəzaçəkmə müəssisəsində Kamran Hacıyevə verib. Ondan sonra bizi hər ay aldadırdılar ki, atanı komissiyaya çıxaracağıq. Ancaq sözlərinə əməl etmədilər. Aylar sonra atam Kamran Hacıyevə deyib ki, əgər iş düzəlmirsə, pulu qaytar. O da pulun üstündən 100 manata götürüb deyib ki, “bu mənim orucluq, bayram payımdır”, qalan pulu da qaytarıb”.

https://toplum.tv/qaynar-xett/sikayetci-psixiatr-bacima-pensiya-duzeltmek-ucun-1000-manat-istedi

Şikayətçi Ədliyyə Nazirliyinə bununla bağlı şikayət etdiyini deyir.

“Penitensiar Xidmətin istintaq şöbəsindən Fəxri Şükürov məni çağırıb ifadəmi aldı. İfadə zamanı bizə dəymiş ziyanı soruşdu. Bankdan aldığımız pulun faizlərini və Kamran Hacıyevin götürdüyü 100 manatı ödəyə biləcəklərini, ancaq Kamran Hacıyev barəsində heç bir tədbir görülməyəcəyini bildirdi.  Bunu da onunla əsaslandırdı ki, əlimdə onlara verdiyim pulla bağlı heç bir sübutum yoxdu. Halbuki istəsələr bunu araşdıra bilərdilər. Çünki biz görüşə gedəndə üstümüz yoxlanılır. Orada kameralar var, araşdırıla bilərdi. Araşdırma aparmaq əvəzinə Fəxri Şükürov dedi ki, bunu nə siz , nə də biz sübut edə biləcəyik. Oradakılar da bir-birini heç vaxt satmayacaq. Onu da dedi ki, işiniz həll olunsaydı, heç şikayət də etməyəcəkdiniz. Ona görə də sizə köməklik edə bilməyəcəyik”.

Səbinə Zeynalova deyir ki, onlara dəyən maddi və mənəvi ziyanla bağlı  Ədliyyə Nazirliyinə və Penitensiar Xidmətə etdikləri rəsmi müraciətlərə heç bir cavab gəlməyib.

Ədliyyə Nazirliyi yanında Penitensiar Xidmətin İctimaiyyətlə əlaqələr şöbəsinin rəisi, polkovnik Mehman Sadıqov bu mövzuda şərh verməyin yersiz olduğunu deyir: “Xanımın dediklərindən belə çıxır ki, o rəsmi olaraq müraciət edib və ona rəsmi olaraq da cavab verilib. Burada mənim şərh verəcəyim bir şey yoxdu. İstənilən vətəndaşın müraciəti dərhal araşdırılır və müvafiq qərarlar qəbul olunur”.

9 saylı Cəzaçəkmə Müəssisəsindən məsələylə bağlı münasibət almaq istəsək də, buna nail ola bilmədik. Müəssisədən telefonumuza cavab verən şəxs rəsmi şəkildə məktub yazıb, poçtla göndərməyimizi istədi. Elektron formada isə müraciət qəbul etmədiklərini bildirdilər. Telefon müraciətimizdən sonra cəzaçəkmə müəssisəsində məhbusun üzləşə biləcəyi durumu nəzərə alaraq, məktuba cavabı gözləmədən şikayəti işıqlandırırıq.