Qaynar xətt

Şikayətçi verdiyi rüşvətin işə yaramamasından narazıdır

Günel Manaflı
19 İyul, 2022
370

Açıq mənbələrdən götürülüb

“Atam Səid Zeynalov 2010-cu ildə həbs edilib. Azadlığa çıxmağına 1 il qalmış 9 saylı Cəzaçəkmə Müəssisəsinin rəis müavini Kamran Hacıyev atama yaxınlaşaraq 3500 manat qarşılığında onun şərti azadlığa buraxılmasına kömək edəcəyinə söz verərək bizi aldadıb”.

Bu haqda Toplum TV-nin qaynar xəttinə Bakı şəhər sakini Səbinə Zeynalova yazıb. Şikayətçinin iddiasına görə, atasından alınan rüşvət sonra geri qaytarılıb, amma 100 manat əksik. Zeynalova onlara maddi və mənəvi ziyan vurulduğunu deyir. Bildirir ki, şikayətlərinə baxan yoxdur.

“Mən qızı olaraq bankdan 3500 manatı kredit götürüb atama verdim ki, Kamran Hacıyevə versin. 5 fevral 2022-ci ildə atam pulu cəzaçəkmə müəssisəsində Kamran Hacıyevə verib. Ondan sonra bizi hər ay aldadırdılar ki, atanı komissiyaya çıxaracağıq. Ancaq sözlərinə əməl etmədilər. Aylar sonra atam Kamran Hacıyevə deyib ki, əgər iş düzəlmirsə, pulu qaytar. O da pulun üstündən 100 manata götürüb deyib ki, “bu mənim orucluq, bayram payımdır”, qalan pulu da qaytarıb”.

https://toplum.tv/qaynar-xett/sikayetci-psixiatr-bacima-pensiya-duzeltmek-ucun-1000-manat-istedi

Şikayətçi Ədliyyə Nazirliyinə bununla bağlı şikayət etdiyini deyir.

“Penitensiar Xidmətin istintaq şöbəsindən Fəxri Şükürov məni çağırıb ifadəmi aldı. İfadə zamanı bizə dəymiş ziyanı soruşdu. Bankdan aldığımız pulun faizlərini və Kamran Hacıyevin götürdüyü 100 manatı ödəyə biləcəklərini, ancaq Kamran Hacıyev barəsində heç bir tədbir görülməyəcəyini bildirdi.  Bunu da onunla əsaslandırdı ki, əlimdə onlara verdiyim pulla bağlı heç bir sübutum yoxdu. Halbuki istəsələr bunu araşdıra bilərdilər. Çünki biz görüşə gedəndə üstümüz yoxlanılır. Orada kameralar var, araşdırıla bilərdi. Araşdırma aparmaq əvəzinə Fəxri Şükürov dedi ki, bunu nə siz , nə də biz sübut edə biləcəyik. Oradakılar da bir-birini heç vaxt satmayacaq. Onu da dedi ki, işiniz həll olunsaydı, heç şikayət də etməyəcəkdiniz. Ona görə də sizə köməklik edə bilməyəcəyik”.

Səbinə Zeynalova deyir ki, onlara dəyən maddi və mənəvi ziyanla bağlı  Ədliyyə Nazirliyinə və Penitensiar Xidmətə etdikləri rəsmi müraciətlərə heç bir cavab gəlməyib.

Ədliyyə Nazirliyi yanında Penitensiar Xidmətin İctimaiyyətlə əlaqələr şöbəsinin rəisi, polkovnik Mehman Sadıqov bu mövzuda şərh verməyin yersiz olduğunu deyir: “Xanımın dediklərindən belə çıxır ki, o rəsmi olaraq müraciət edib və ona rəsmi olaraq da cavab verilib. Burada mənim şərh verəcəyim bir şey yoxdu. İstənilən vətəndaşın müraciəti dərhal araşdırılır və müvafiq qərarlar qəbul olunur”.

Mehman Sadıqov 

9 saylı Cəzaçəkmə Müəssisəsindən məsələylə bağlı münasibət almaq istəsək də, buna nail ola bilmədik. Müəssisədən telefonumuza cavab verən şəxs rəsmi şəkildə məktub yazıb, poçtla göndərməyimizi istədi. Elektron formada isə müraciət qəbul etmədiklərini bildirdilər. Telefon müraciətimizdən sonra cəzaçəkmə müəssisəsində məhbusun üzləşə biləcəyi durumu nəzərə alaraq, məktuba cavabı gözləmədən şikayəti işıqlandırırıq.  

Qaynar xətt

Qazi müharibədə sağlamlığını itirsə də, əlillik ala bilmədiyini deyir

Günel Manaflı
10 Avqust 2022

Şəxsi arxiv

Lənkəran rayon Şürük kənd sakini Bağırzadə Davud 4 oktyabr 2020-ci ildə könüllü olaraq 44 günlük müharibədə iştirak edib. İndi o, müharibədə ağır yaralandığı halda əlillik dərəcəsi ala bilmədiyini deyir. “Füzuli və Xocavənddə gedən döyüşlərdə ağır yaralandım. Qarın boşluğundan yaralanmışam. Ciyər, bağırsaq, mədəm, ayağım və qolum zədələnib. Qazinin sözlərinə görə, onu ağır yaralı vəziyyətdə ön cəbhədən Füzuli Mərkəzi Rayon Xəstəxanasına təxliyə edərək əməliyyat ediblər. Daha sonra Mingəçevir xəstəxanasına göndərilib. Burada bağırsaq və qaraciyərindən əməliyyat olunub. Daha sonra Bakıda hərbi hospitalda müayinələrdən keçib. https://toplum.tv/qaynar-xett/muharibe-istirakcisi-medal-alib-ancaq-veteranliq-ala-bilmir Şikayətçinin sözlərinə görə, ağrıları ona rahat işləməyə imkan vermir. Veteranlar üçün nəzərdə tutulan aylıq 80 manat isə dərmanlarına...
Qaynar xətt

Müharibə iştirakçısı medal alıb, ancaq veteranlıq ala bilmir

Günel Manaflı
9 Avqust 2022

Şəxsi arxiv

Zaqatala rayon sakini Əhmədov Cavid 44 günlük müharibədə iştirak etsə də, ona veteranlıq statusu verilməyib. Şikayətçinin sözlərinə görə onunla eyni vaxtda müharibədə iştirak edən hər kəsə bu status verilib. “2020-ci ildə həqiqi hərbi xidmətə çağırıldım. İlk xidmətimi Ağcabədi ərazisində keçirdim. 44 günlük müharibə ərəfəsində isə Füzuli, Xocavənd, Cəbrayıl, Qubadlı və Laçın uğrunda gedən döyüşlərdə iştirak etmişəm. Füzuli və Xocavənd uğrunda gedən döyüşlərə görə medallarla təltif edilmişəm. Ancaq veteranlıq statusum hələ də verilməyib. Necə olur ki, medallar verilir, hərbi biletimə müharibədə iştirak etdiyim qeyd edilir, ancaq veteranlıq statusu verilmir. Mən veteranlıq statusumun verilməsini tələb edirəm”. Müdafiə Nazirliyinin Mətbuat Xidmətinin sözçüsü Anar Eyvazov...

Seçilmiş Videolar

Toplum TV loqo