Region

Rus dili Qarabağda "rəsmi dil" elan olundu

25 Mart, 2021
343

a1press.am

Layihəni “parlamentdəki” beş fraksiyadan üçünün hazırladığı deyilir. 

Azərbaycanın Dağlıq Qarabağ regionunun qondarma "parlamenti" erməni və rus dillərini rəsmi dil elan edib.

Məlumatı "AzadlıqRadiosu"-nun Ermənistan xidməti yayıb.

Bildirilir ki, “Dil haqqında” və “Televiziya və radio haqqında” qanunlara dəyişikliklər layihəsi qəbul edilib.

Layihəni “parlamentdəki” beş fraksiyadan üçünün hazırladığı deyilir. Onlar layihəni belə əsaslandırıblar: “Artsax (Dağlıq Qarabağ) və Rusiya arasında mədəni, hərbi və iqtisadi əlaqələrin tarixini və rus dilinin artsaxlıların çoxunun ikinci dili olduğunu nəzərə alaraq, yeni keyfiyyətli münasibətlərin və yeni gündəmin formalaşmasının vacib olduğunu hesab edirik”.

“Suahili dilini də Qarabağın rəsmi dili elan edə bilərlər” - Azərbaycan Prezidenti İlham Əliyev bu il fevralın 26-da keçirdiyi mətbuat konfransda belə demişdi. 

O bildirmişdi ki, Qarabağda Rus dilinin istifadə ediləcəyi barədə məlumatlar manipulyasiyadır: "Hazırda Azərbaycanın o bölgəsində qeyri-qanuni olaraq özlərini rəhbər adlandıranların manipulyasiyasıdır. Onlar orada suahili dilini də Qarabağın rəsmi dili elan edə bilərlər. Bunun heç bir təsiri və nəticəsi ola bilməz. Dağlıq Qarabağ mövcud deyil və hər kəs oranı Azərbaycanın tərkib hissəsi olaraq tanıyır. Düşünürəm, bu, onların, həmin cinayətkar xunta rejiminin son nəfəsidir, son cəhdləridir ki, guya onlar dövlətdirlər".

İlham Əliyev Qarabağda Azərbaycan dilinin rəsmi dil olacağını qeyd etmişdi: "Dağlıq Qarabağı hər kəs Azərbaycanın tərkib hissəsi kimi tanıyır. Azərbaycanda yeganə rəsmi dil Azərbaycan dilidir. Digər bir dilin Azərbaycanda rəsmi statusu ola bilməz".

Azərbaycan ötən il 44 günlük müharibə nəticəsində Qarabağın bir hissəsi və ətraf 7 rayona nəzarəti geri alıb. 

Amma qoşunların təmas xəttinə Rusiya hərbçiləri yerləşdirilib.

Müharibə atəşkəslə dayandırılandan sonra Prezident Əliyev çıxışlarında dəfələrlə Dağlıq Qarabağ münaqişəsinin artıq mövcud olmadığını vurğulayıb. 

Ermənistan rəsmiləri və qondarma rejim təmsilçiləri ilə regionun statusunun həllini tapmadığını deyir, beynəlxalq ictimaiyyəti onu tanımağa çağırırlar.

Region

Paşinyanı məhkəməyə verdilər

8 Aprel 2021

Habertürk

Ermənistanın sabiq prezidenti Robert Koçaryan Baş nazir Nikol Paşinyanı məhkəməyə verib. Şikayət Yerevan məhkəməsində hakim Artur Mkrtçyanın sədrliyi ilə araşdırılacaq (“news.am”). Ədalətli məhkəmə araşdırması hüququnun pozulduğunu iddia edən Koçaryan həm də ona maddi və mənəvi ziyan vurulduğunu bildirib; bu ziyanın ödənilməsini və haqqında deyilənlərin təkzib olunmasını tələb edib.
Region

“Feysbuk” “Gürcü marşı” ilə əlaqəli səhifə və hesabları sildi

8 Aprel 2021

Sosial media

"Feysbuk" rəhbərliyi "Gürcü Marşı" hərəkatı və onun gənclər qanadı ilə əlaqəli hesabları və səhifələri silib. Şirkətin açıqlamasına görə, "Feysbuk"-da 23, “İnstaqram"-da 11 hesab qapadılıb, daxili auditoriyaya yönəlmiş 12 qrup deaktiv edilib. "Gürcü Marşı - Milli Hərəkat" Gürcüstanın ultra-millətçi partiyasıdır. Hərəkat üzvləri sərt immiqrasiya qanunlarını müdafiə etmələriylə tanınırlar. Bundan başqa, onlar LGBT cəmiyyətinin nümayəndələrini hədələyir və miqrantlara nəzarət etmək üçün "xalq patrulu" yaratmaq təklifiylə çıxış edirlər (Sputnik-georgia).
Seçilmiş Videolar