“Ordunun içində baş verənləri görmürük, sadəcə versiyaları eşidirik. Bu da nə qədər obyektivdir? Cavab vermək çətindir”

Dövlət Sərhəd Xidmətinin daha bir hərbi qulluqçusu vəfat edib. 

Bu barədə fevralın 3-də DSX-nin Mətbuat Mərkəzindən məlumat verilib. 

Məlumatda qeyd olunur ki, DSX-nin Yevlax şəhərində yerləşən hərbi hissəsində müddətdən artıq həqiqi hərbi xidmət hərbi qulluqçusu çavuş Ceyhun Nabatəlizadə qeyri-döyüş şəraitində vəfat edib. 

Təkcə mətbuatda çıxan məlumatlara görə, bu hadisə DSX-də son 1 ayda baş tutan 5-ci ölüm hadisəsidir. 

Bundan əvvəl-yanvarın 22-də DSX-nin hərbi qulluqçusu, matros Ramil Rzaquliyev intihar edib. 

Yanvarın 3-də isə  DSX Sərhəd Qoşunlarının  müddətdən artıq həqiqi hərbi xidmət hərbi qulluqçusu baş çavuş Əvəzli Elxan naməlum səbəbdən öz xidməti silahından atəş açmaqla hərbi qulluqçular - baş leytenant Yusif İsmayılovu, kiçik gizir Amil Cəlilzadəni, kiçik gizir Natiq İbrahimovu qətlə yetirib. 

Dövlət Sərhəd Xidmətində nə baş verir? 

“Toplum TV”-yə danışan DSX-nin mətbuat katibi Maya Şərifova baş verən hadisələrlə bağlı ictimaiyyətə lazım olan məlumatı verdiklərini söyləyir. Onun dediyinə görə, öz fəaliyyətləri barədə yalnız müvafiq qaydada məruzə etdikdən sonra açıqlama verə bilər. 

Mətbuat katibi onu da söyləyir ki, ölüm hallarına baxmayaraq, Dövlət Sərhəd Xidməti hələ də ən intizamlı qurumlardan biridir.

“Sərhəd qoşunlarının funksiyasının genişlənməsi hərbçilərə psixoloji və fiziki təsir edib”

Hərbi ekspert Azad İsazadənin sözlərinə görə, hərbçilərin ölümü barədə danışmaq çətindir, çünki hadisələr bir-birlərindən fərqlənir. Amma ekspertin fikrincə, sərhəd xidmətində ölümlərin artması sərhəd qoşunlarının funksiyasının genişlənməsi ilə əlaqədardır. 

“Sərhədlər uzanıb və çoxalıb. Bəzi sərhəd məntəqələri yaşayış yerlərindən uzaq, əhali olmayan yerlərdədir. Orda da təhlükəli vəziyyət və ünsiyyət problemi yaranır. Əlbəttə ki, bu hərbçilərə fiziki və psixoloji təsir edir”. 

Ekspert onu da qeyd edir ki, Azərbaycanda silahlı qüvvələrin psixoloji hazırlığı yüksək səviyyədə deyil, onlar ekstrimal vəziyyətlərdə yaşamağa hazırlanmayıblar. 
Azad İsazadə ölümlərin çoxalmasına təsir göstərən daha bir səbəb kimi silahlı qüvvələrin üzərində vətəndaş nəzarətinin olmamasını görür. 

“Hərbçilər hansı şəraitdə qulluq edirlər, yeməkləri, yatmaqları necədir? Bilmirik. Demokratik ölkələrin çoxunda silahlı qüvvələrin üzərində vətəndaş nəzarəti var. Bizdə də orduya vəkillər, QHT-lər, vətəndaş cəmiyyəti nümayəndələri nəzarət etməlidir.

Ordunun içində baş verənləri görmürük, sadəcə versiyaları eşidirik. Bu da nə qədər obyektivdir? Cavab vermək çətindir”.
Ekspertin dediyinə görə, vətəndaş nəzarətinin olmamağı həm də orduda “dedovşina”ya səbəb olur. 

“Tələskənliyə yol verməklə qaş düzəldən yerdə gözü də çıxarmayaq”

Hərbi ekspert Üzeyir Cəfərov isə hələlik bu məsələ barədə fikir səsləndirməyin etik olmadığını söyləyir.

“Hadisənin detallarını bilmirik, rəsmi açıqlama gözləyək. Ondan sonra nəsə deyə bilərik. Mən DSX-nin xidmətinə kölgə sala bilmərəm. Rəsmi açıqlama olmayanadək hər hansı fikir səsləndirmək etikadan kənar olar və istintaqı fərqli istiqamətə yönəldər”,- Ü.Cəfərov belə deyir. 

Ekspert bildirir ki, insan həyatı ilə bağlı olan məsələlərdə DSX da açıqlama verməyə tələsməməlidir. 

“DSX özbaşına deyil, məlumatı araşdırmalıdırlar. Güc strukturları sifarişlə işləmir, tabeli qurumlardır və Prezidentə tabedir. Tələskənliyə yol verməklə qaş düzəldən yerdə gözü də çıxarmayaq”.