Siyasət

AXCP fəalının həbsdə vəziyyətinin pisləşdiyi bildirilir

Məzahir Abdurahmanov
2 Avqust, 2021
894

Sosial Media

“Əlizamin Salayevin ürəyində və tənəffüs sistemində problemlər var. Ona görə də vəziyyəti tez-tez pisləşir. Onu sanitar hissəyə aparmırlar, gəlib, dərman verib gedirlər”.

Bunu avqustun 2-də “Toplum TV”-yə açıqlamasında hüquq müdafiəçisi Zəfər Əhmədov deyib.

Z.Əhmədovun sözlərinə görə, Ə.Salayev 17 saylı dövlət cəzaçəkmə müəssisəsindədir: 

“Bu yeganə müəssisədir ki, baraklarında havalandırma sistemi yoxdur. Ə.Salayev vəziyyəti pisləşdiyinə görə müraciət edib, onu sanitar hissəyə aparıblar. Dünən isə qəfil gələrək deyiblər ki, səni baraka qaytarırıq. Ə.Salayev özünü pis hiss etdiyini söyləsə də, məhəl qoyulmayıb, onu baraka qaytarıblar”.

Zəfər Əhmədov  - Açıq mənbələrdən götürülüb

“Baraka gətirilən kimi onun vəziyyəti pisləşib. Həkim çağırıblar, dava-dərman veriblər. Mən bunu səhərə yaxın öyrəndim. Vəziyyətinin pisləşməsinə baxmayaraq, onu sanitar hissəyə qaytarmayıblar”, - deyə hüquq müdafiəçisi qeyd edib.

Penitensiar Xidmətin ictimaiyyətlə əlaqələr şöbəsinin rəhbəri Mehman Sadıqov isə “Toplum TV”-yə Ə.Salayevin vəziyyətinin pisləşməsi barədə xəbəri təkzib edib: “Hər cəzaçəkmə müəssisəsində Ədliyə Nazirliyinin Tibb Baş idarəsinin həkimləri işləyir. Əgər onun sağlamlıq cəhətdən hansısa problemi varsa, həmin həkimlərə müraciət edə bilər. Bununla bağlı heç bir məhdudiyyət qoyulmayıb”.

AXCP üzvü Ə.Salayev yanvarın 13-də partiyanın digər fəalları Nicat Abdullazadə və Ceyhun Novruzovla birlikdə saxlanılıb. N.Abdullazadənin sözlərinə görə, onlar kafedə yemək yeyən zaman polislər gələrək onları 8-ci bölməsinə aparıb. Burada onun və C.Novruzovun haqqında xırda xuliqanlıqla bağlı protokol tərtib olunub, hər birini 50 manat məbləğində cərimələyiblər, Ə.Salayev isə həbs olunub. 

“Protokol tərtib etdilər ki, guya biz kafenin qabağında söyüş söymüşük”, - deyə N.Abdullazadə bildirib. 

AXCP isə Ə.Salayevin sifarişlə həbs olunduğunu iddia edir. Buna səbəb kimi onun həbsindən bir neçə gün əvvəl "Yutub" sosial şəbəkəsində Salyan Rayon Polis Şöbəsinin təhqiqat bölməsinin rəisi Həmzə Əzizov barəsində yerləşdirdiyi video göstərilir. Həmin videoda o, H.Əzizovu 21 yaşlı qıza təcavüz etməkdə ittiham edib. 

Polis rəisi isə Ə.Salayevin iddialarını rədd edib, ona "Qızın nəslində kişi yoxdur ki, sən bu məsələyə qarışırsan?" deyə cavab verib.

Bu il yanvarın 24-də AXCP üzvü olan bir qrup qadın Ə.Salayevə azadlıq tələbi ilə Daxili İşlər Nazirliyinin qarşısında aksiya keçirib.

Siyasət

Müsəlman Birliyi Hərəkatının üzvünə hökm oxundu

20 May 2022

Razi Hümbətov - sosial media

Bu gün, mayın 20-də Bakı Ağır Cinayətlər Məhkəməsinin qərarı ilə Müsəlman Birliyi Hərəkatının üzvü Razi Hümbətova hökm oxunub. Azadlıq Radiosunun məlumatına görə, hərəkatın üzvü 6 il azadlıqdan məhrum edilib. R.Hümbətov Cinayət Məcəlləsinin 234.4.3 (satış məqsədilə külli miqdarda narkotik əldə etmə, saxlama, daşıma) maddəsi ilə günahkar sayılıb. Atası məhkəmə qərarını qərəzli adlandırıb və qeyd edib ki, R.Hümbətovun qonşuları, digər şəxslər Prezident Administrasiyasına, Daxili İşlər Nazirliyinə onlarla məktub yazaraq onun bu işdə günahsız olduğunu və narkomaniya ilə mübarizə apardığını bildiriblər. Xəbərdə o da bildirilir ki, məhkəmə prosesinə gələnlərdən Ağaəli Yahyayev, Süleyman Ələkbərov və daha bir neçə şəxsin saxlanılıb. R.Hümbətov ötən il iyulunda saxlanıb....
Siyasət

Almaniyadan qaytarılan daha bir fəal həbs edilib

Roza Məmmədova
20 May 2022

açıq mənbədən götürülüb

Tənqidçi mövqeyi ilə tanınan ictimai fəal Ziya İbrahimlinin Bakı Hava limanında həbs edildiyi deyilir. Bu barədə məlumatı mayın 20-də jurnalist Əfqan Muxtarlı “feysbuk” hesabında yazıb: “Bu dəqiqələrdə Biləsuvar məhkəməsində Ziya İbrahimlinin məhkəməsi gedir. Ona vəkil tutmağa belə imkan verilməyib. Ziya bəy 2019-cu ildən Almaniyada yaşayıb. Onun eyni il axtarışa verilməsi siyasi fəaliyyəti ilə bağlıdır. Azərbaycanda yaşamayan adamı Biləsuvar polisi niyə axtarışa versin?” Əfqan Muxtarlı - sosial media Ə.Muxtarlı fəalın həbsində Almaniya Hökumətinin də məsuliyyət daşıdığını bildirib: “Əvvəl-əvvəl 2-3 ay gözləyib həbs edirdilər. İndi elə aeroportda həbs edirlər. Vətənə döndükdən sonra həbs edilən mühacirlərin hər biri üçün Almaniya höküməti məsuliyyət daşıyır”....

Seçilmiş Videolar

Toplum TV loqo