Siyasət

Brüsseldə “məhsuldar görüş”, yoxsa əvvəlki müddəaların dəqiqləşdirilməsi?

Vüsalə Mikayıl
23 May, 2022
312

açıq mənbədən götürülüb

Avropa İttifaqı Şurasının prezidenti Şarl Mişel mayın 22-də Azərbaycan prezidenti İlham Əliyev və Ermənistanın baş naziri Nikol Paşinyan ilə üçtərəfli görüşü məhsuldar adlandırıb.

O, mətbuata açıqlamasında deyib ki, onlar humanitar məsələlər, o cümlədən minaların təmizlənməsi, məhbusların azad edilməsi və itkin düşmüş şəxslərin taleyi barədə ətraflı müzakirə aparıblar.

Şarl Mişelin bəyanatında yaxın günlərdə dövlətlərarası sərhəddə Sərhəd Komissiyalarının ilk birgə iclası keçiriləcəyi, delimitasiya və sabit vəziyyətin ən yaxşı şəkildə necə təmin edilməsi ilə bağlı bütün suallara cavab veriləcəyi bildirilir.

Həmçinin qeyd olunur ki, liderlər nəqliyyat əlaqələrinin açılması istiqamətində işlərin davam etdirilməsi ilə bağlı razılığa gəliblər.

Siyasi şərhçi Şahin Hacıyev isə bəyanatda yeni bir fikir səslənmədiyini deyir. Onun qənaətincə, indiyə qədərki görüşlərdə səsləndirilən müddəalar sadəcə dəqiqləşdirilib.

“Əhəmiyyəti isə odur ki, Ermənistanda bu razılaşmalara qarşı kəskin etirazlar var. Bu etirazlar fonunda Paşinyan deyilənləri qəbul edirsə, deməli, tərəflər eyni xətt üzrə davam edəcəklər. Bu isə Azərbaycanın xeyrinədir. Yəni Paşinyan daxildəki təzyiqlərə baxmayaraq iradə göstərir, sərhədlərin delimitasiyası, kommunikasiyası və sülh müqaviləsindən dönmür”, - siyasi şərhçi Şahin Hacıyev belə deyir.

Şahin Hacıyev - açıq mənbədən götürülüb

O hesab edir ki, son görüşdə yeni müddəa Qarabağ ermənilərinin hüquqlarının qorunması məsələsidir. Amma siyasi şərhçi rəsmi olaraq Azərbaycan tərəfinin Qarabağ ermənilərinin vətəndaş kimi hüquqlarını qorumağa hazır olduğunu dəfələrlə vurğuladığını da əlavə edir.

Növbəti görüşdən sülh müqaviləsi gözləmək olarmı?

Ş.Hacıyev bunun üçün hələ tez olduğunu və delimitasiya prosesində problemlər yarana biləcəyini bildirir.

“Ermənilər bizim Qazaxda olan anklav kəndləri qaytarmaq istəmirlər. Eyni zamanda, tələb edirlər ki, bizim qoşunlar geri çəkilsin. Yəqin bu barədə Brüsseldə və Moskvada danışılıb. Güman ki, erməni hökuməti anklavların qaytarılmasına razıdır. Anklav kəndlərin dəyişdirilməsi də mümkündür. Yəni ərazi mübadiləsi baş tuta bilər”.

Ekspert bu baş tutarsa, növbəti görüşdə sülh müqaviləsinin reallaşacağını istisna etmir.

“Azərbaycan postmünaqişə dövründə bölgədə sabitliyi bərpa etmək istəyir”

Ş.Mişelin sözlərinə görə, yaxın günlərdə baş nazirlərin müavinlərinin bu işi davam etdirəcəkləri qərarlaşdırılıb. Xarici işlər nazirlərinin başçılıq etdikləri nümayəndə heyətləri isə sülh müqaviləsi üzərində işi davam etdirəcəklər.

“Biz sıx təmasda qalmağa razılaşdıq və iyul-avqust aylarına qədər eyni formatda yenidən görüşəcəyik”, - deyə Ş. Mişel sözünə əlavə edib.

Deputat Aydın Mirzəzadə görüşlərdə dünyanın iki güc mərkəzinin iştirakını yüksək qiymətləndirir: “Həm Brüssellə, həm də Rusiya ilə danışıqların aparılması bölgədə sülhün bərpasına hesablanıb. Sülh müqaviləsinin növbəti görüşdə imzalanacağını demək, bunun üçün müəyyən vaxt söyləmək çətindir. Bu komissiyaların iş prosesindən asılıdır. Azərbaycan postmünaqişə dövründə bölgədə sabitliyi bərpa etmək istəyir”.

Aydın Mirzəzadə - açıq mənbədən götürülüb

2020-ci ildə Azərbaycan və Ermənistan arasında 44 günlük müharibədən sonra tərəflər arasında sülhquruculuğu prosesi baş tutmayıb. Brüsseldə üçtərəfli formatda ilk görüş 2021-ci ilin dekabrında, ikinci görüş aprelin 6-da keçirilib.

Siyasət

Azərbaycandan Ukraynaya növbəti humanitar yardım göndərilib

5 İyul 2022

Açıq mənbələrdən götürülüb

Humanitar yardımı Sumqayıt Şəhər İcra Hakimiyyəti təşkil edib. Buraya ərzaq məhsulları, məişət və tibbi sərfiyyat malları, həmçinin saxlama müddəti uzun olan məhsullar (konservlər, dənli bitkilər, quru yemək payı və s.), eləcə də uşaq qidaları, dərman vasitələri və geyimlər aiddir. Ümumi çəkisi 50 ton miqdarında olan humanitar yardım tərəfdaş şəhərlər xətti ilə Ukraynanın Çerkassı vilayət administrasıyasından Sumqayıt ŞİH-ə edilmiş rəsmi müraciətə cavab olaraq hazırlanıb və Çerkassı şəhəri əhalisinin ehtiyacları üçün nəzərdə tutulub. “Rusiya-Ukrayna müharibəsinin başlanğıcından indiyədək Azərbaycan tərəfindən Ukraynaya 20 milyon ABŞ dolları dəyərində 1,5 min ton vacib humanitar yük çatdırılıb", - bunu huanitar yardımın hava limanından göndərilməsində iştirak edən Ukraynanın...
Siyasət

İlham Əliyev Baydenə: Sülh sazişinin imzalanmasına töhfə verə bilərsiniz

4 İyul 2022

"president.az"

"Otuz ildir ki, Azərbaycan Respublikası ilə Amerika Birləşmiş Ştatlarını dostluq və tərəfdaşlıq münasibətləri birləşdirir. Biz ilk gündən ölkəmizin müstəqilliyinə, suverenliyinə və ərazi bütövlüyünə ABŞ-ın dəstəyini yüksək qiymətləndiririk". Bu fikirlər Prezident İlham Əliyevin 4 İyul – Müstəqillik Günü münasibətilə ABŞ Prezidenti Cozef Baydenə ünvanlandığı təbrik məktubunda yer alıb. Məlumatı Azərbaycan Prezidentinin rəsmi saytı - "president.az" yayıb.  Məktubda ikitərəfli əməkdaşlığın uğurla davam etdiyi vurğulanır: "Ölkələrimiz arasında qarşılıqlı faydalı əməkdaşlıq ikitərəfli və çoxtərəfli müstəvidə uğurla davam edir. Beynəlxalq təhlükəsizliyin təmin olunması və terrorizmə qarşı mübarizədə uzun müddətdən bəri davam edən birgə fəaliyyətimiz məmnunluq doğurur. Enerji təhlükəsizliyi məsələlərində ölkələrimizin sıx əməkdaşlığı, həyata keçirdiyimiz irimiqyaslı...

Seçilmiş Videolar

Toplum TV loqo