Siyasət

Hərbi ekspert: "Beynəlxalq təcrübədə tam və dəqiq mina xəritəsi anlayışı yoxdur"

Aytac Məmmədli
5 İyul, 2021
875

Sosial Media

“Azərbaycanın erməni diversantlara qarşı davranışı onun hüquq sisteminin boş olduğunu göstərdi”.
 
Bu sözləri “Toplum TV”-yə siyasi şərhçi Nahid Cəfərov deyib.
 
İyulun 3-də Ermənistan işğal dövründə Füzuli və Zəngilanda basdırdığı tank və piyada əleyhinə təqribən 92 min minaya dair xəritələri Rusiyanın təşəbbüsü ilə Azərbaycana təqdim edib.
 
Ukraynalı hərbi ekspert Mixail Jiroxova görə, bir minanın aşkar edilib zərərsizləşdirilməsi 1000-5000 dollar məbləğə başa gələ bilər.
 
Bu baxımdan minalanmış ərazilərin xəritəsini almaqla Azərbaycan bu istiqamətdə çəkəcəyi xərcləri azaltmış olur.
 
Bəs mina xəritələri nə qədər dəqiqdir?
 
Hərbi ekspert Azad İsazadə deyir ki, beynəlxalq təcrübədə tam və dəqiq mina xəritəsi anlayışı yoxdur.

Azad İsazadə - Sputnik


Onun sözlərinə görə, hərbi hissələr minaları basdıranda bu xəritələri yaradır, amma nəzərə almaq lazımdır ki, müharibə zonasında qeyri-rəsmi şəkildə basdırılan minalar da olur.
 
Ekspert istisna etmir ki, Ermənistan natamam mina xəritələri verib: “Amma real xəritələr əsasında olan minaları indi təmizləsək, qalanları ilə sonra ayrıca məşğul olmaq olar. Onsuz da mina problemini bu xəritələrlə tam həll etmək mümkün olmaz. Əlimizdə olanlarla böyük əraziləri, cəbhəyanı zonaları təmizləsək, gediş-gəliş rahatlaşacaq. Yalnız gələcəkdə yenə də partlamamış sursatlar aşkarlanacaq”.
 
Nahid Cəfərovun fikrincə, mina xəritələrinin dəqiq olmamasını izah edən 2 səbəb var: Ermənistanın daha çox ziyan vurmaq üçün yalandan bir xəritə tərtib etməsi, Ermənistanda hərbi institutun zəif olmasına görə, minaların xəritələrdə yanlış göstərilməsi.
 
Xarici İşlər Nazirliyinin (XİN) məlumatına görə, Azərbaycan tərəfi də humanist addım olaraq məhkəmənin hökmü ilə azadlıqdan məhrum edilmiş və təyin edilmiş cəza müddəti bitmiş 15 nəfər erməni əsilli şəxsi Ermənistana təhvil verib.
 
İstintaq zamanı erməni diversantlara Azərbaycan Cinayət Məcəlləsinin 214 (terrorçuluq), 228 (qanunsuz silah-sursat saxlama), 279 (qanunsuz silahlı birləşmələr yaratma və ya onların tərkibində iştirak edib basqınlar törətmə) və 318-ci (Azərbaycanın dövlət sərhədini qanunsuz keçmə) maddələri ilə ittihamlar verilmişdi.
 
Məhkəmə zamanı dövlət ittihamçısı digər ittihamlara xitam verilməsini, Ermənistan vətəndaşlarının yalnız CM-in 318-ci maddəsi ilə təqsirli bilinib cəzalandırılmasını təklif edib.

Nahid Cəfərov - Sosial Media

N. Cəfərov hesab edir ki, diversantlara qarşı bu davranış dövlətin daxili siyasətinin xaricə vurduğu böyük zərbədir: “Heç kəsə sirr deyil ki, Azərbaycanda hüquq sifarişlə çalışır. Xəritələr 30 faiz doğrunu göstərsə belə, diversantlarin müqabilində onları almaq doğru addımdır. Həbsdə qalan erməni diversant minaya düşən azərbaycanlıdan daha vacib ola bilməz. Amma bunu qanunları sındırmadan da etmək olardı. Rəsmi Bakı bilirdi ki, hardansa təzyiq gələcək və o, erməniləri buraxmalı olacaq. Ona görə də diversantlara qarşı cəzanı sərtləşdirsə belə, yenə də yer qoymalı idi ki, onları azad edəndə qanunlarını tapdalamasın. Onun əvəzinə bir az şou göstərildi, populizmə oynanıldı. Sonda da belə rüsvayçı bir vəziyyət yarandı”.
 
N. Cəfərov, Türkiyə ilə ABŞ arasında Fətullah Gülən məsələsini nümunə çəkir: “Türkiyə bütün vasitələrdən istifadə etdi ki, Güləni Amerikadan alsın, amma Amerika dedi ki, mən öz hüququmu sənə görə çeynəyə bilmərəm”.
 
Azad İsazadə isə deyir ki, Azərbaycan diversantlarla mina xəritələri arasında seçim etməyə , öz təhlükəsizliyini təmin etmək üçün onları azadlığa buraxmağa məcbur idi: "Həbs olunan diversantlar və onların cinayətləri arasında fərq var. Məsələn, Şuşa həbsxanasında işgəncə verən 2 erməni illər boyu cinayət törədib və yəqin ki, onlar buraxılmayacaq. Elələri də var ki, diversant kimi göndərilsə də, cinayət törədə bilməyiblər. Reallıq budur ki, nədənsə imtina etməyə məcbur idik. Mən başqa variant görmürəm”.
 
Ötən ay Azərbaycanda 3 mina partlayışı baş verib, 8 mülki şəxs və 1 hərbçi ölüb.
 
Bu barədə Minalar Əleyhinə Azərbaycan Kampaniyası məlumat verib.
 
İyunda mina partlayışları Tovuz, Kəlbəcər və Ağdamda baş verib.
 
Ümumilikdə bu il ərzində ölkədə 68 nəfər minalardan və partlamamış hərbi sursatlardan zərər çəkib. Bunlardan da 21 nəfəri həlak olub.

Siyasət

ABŞ səfirliyi 14 may aksiyası barədə

Roza Məmmədova
17 May 2022

Toplum Tv

Birləşmiş Ştatların səfirliyi "Toplum TV"yə açıqlamasında Azərbaycan hökumətini vətəndaşların konstitusion hüquqlarına hörmət etməyə çağırıb Birləşmiş Ştatlarının Səfirliyi Azərbaycan hökumətini insan hüquqlarına və əsas azadlıqlarına hörmətlə yanaşmağa, o cümlədən bütün vətəndaşların öz fikirlərini dinc şəkildə ifadə etməsinə, azad toplaşma hüququndan istifadəsinə imkan verməyə çağırıb. Mayın 14-də Bakıda dinc etiraz aksiyasının iştirakçılarına qarşı zorakılıq və jurnalistlərlə ictimai fəallara təzyiqlə bağlı “Toplum TV”nin sorğusuna Birləşmiş Ştatlar səfirliyindən verilən cavabda belə deyilir.  “Biz bütün dünyada etdiyimiz kimi, Azərbaycanda da hökuməti medianın təhlükəsizliyini təmin etməyə və jurnalistlərin zorakılıq, təhdid və ya ədalətsiz həbsdən qorxmadan öz vəzifəsini yerinə yetirmək imkanlarını qorumağa çağırırıq”,- deyə açıqlamda qeyd olunub....
Siyasət

Putin niyə MDB ölkələrinin KTMT-yə üzv olmasını istəyir?

Roza Məmmədova
17 May 2022

Reuters

"Putinin dediklərini dinləməliyik, amma əhəmiyyət verməməliyik” Azərbaycanın sabiq xarici İşlər naziri Tofiq Zülfüqarov “Toplum TV”yə Kollektiv Təhlükəsizlik Müqaviləsi Təşkilatının (KTMT) mayın 16-da Moskvada keçirilən sammitində Rusiya Prezidentinin çıxışını şərh edərkən belə deyib. Rusiya Prezidenti Vladimir Putin məlum nitqi zamanı Müstəqil Dövlətlər Birliyinə (MDB) KTMT-də müşahidəçi statusunun verilməsi təklifi ilə çıxış edib. Bir gün əvvəlsə Belarusun müdafiə naziri Viktor Xrenin bir neçə ildən sonra onlarla ölkənin KTMT-yə qoşulacağını bəyan etmişdi. Hazırda təşkilatın üzvləri Rusiya, Belarus, Qazaxıstan, Ermənistan, Qırğızıstan və Tacikistandır. Putin saamitdəki çıxışında KTMT-nin payızda birgə hərbi təlimlər planlaşdırdığını da deyib. Onun sözlərinə görə, təlimlərin sayı getdikcə artacaq və onlar Qazaxıstan,...

Seçilmiş Videolar

Toplum TV loqo