Dekabrın 13-də daxili işlər naziri Vilayət Eyvazov “Müdafiə Xətti” İnsan Haqları Təşkilatının həmtəsisçiləri Rüfət Səfərov, Zəfər Əhmədov, Zaur Əkbər və Əlayif Həsənov ilə görüşüb.

Görüşdə, həmçinin nazir müavini İsmət Əliyev, Bakı Şəhər Baş Polis İdarəsi rəisinin əməliyyat işləri üzrə müavini Vüqar Ələkbərov və Daxili İşlər Nazirliyinin Mətbuat Xidmətinin rəisi Ehsan Zahidov da iştirak edib.

Bu gün, dekabrın 14-də isə “Müdafiə Xətti”-nin görüşdə müzakirə olunan məsələlərə həsr olunmuş mətbuat konfransı keçirilib. Məlumata görə, görüşdə polis-vətəndaş münasibətləri, ölkədə insan hüquqlarının vəziyyəti, polisin kütləvi askiyalarda aksiya iştirakçılarına, jurnalistlərə, hüquq müdafiəçilərinə qarşı davranışları müzakirə mövzusu olub.

DİN rəhbərliyi ilə Müdafiə Xətti”-nin həmtəsisçiləri arasında keçirilən görüşdə 1 dekabr aksiyasında fiziki zorakılığa məruz qalmış Tofiq Yaqublunun məsələsinə də diqqət yetirilib. “Müdafiə Xətti”-nin icraçı direktoru Rüfət Səfərov bildirib ki, Tofiq Yaqublunun döyülməsində məsuliyyət payı birbaşa polis orqanlarına aiddir:

“Vilayət Eyvazov rəsmən elan etdi ki, Tofiq Yaqublu, ola bilər ki, aksiya zamanı saxlanılarkən müəyyən xəsarətlər alıb, amma Tofiq Yaqublunun üz nahiyəsindəki xəsarətlərin polisə heç bir aidiyyatı yoxdur. Bu, bizə inandırıcı gəlmir. Biz sual veririk? Tofiq Yaqublu bir neçə polis əməkdaşı tərəfindən götürülür və bir neçə saatdan sonra bəlli olur ki, adamı şəhərdən 60-70 km aralıda düşürüblər və adama belə formada xəsarət yetiriblər. Amma prokurorluq orqanları hələ də fakta görə cinayət işi açmayıblar”.

Bunlarla yanaşı, nazirlə görüşdə hazırda aclıq aksiyası edən AXCP fəalı Saleh Rüstəmovun məsələsi də müzakirə olunub.

Rüfət Səfərov qeyd edib ki, görüşdə Vilayət Eyvazov Saleh Rüstəmovla bağlı səlahiyyətinin olmadığını bildirib. Lakin əfv komissiyasının üzvü olduğuna görə, Saleh Rüstəmov əfv sərəncamı yazarsa, məsələyə baxa biləcəyini deyib.

“Əfv nə deməkdir – “Mən cinayəti etmişəm və bunu etiraf edirəm. Dövlət başçısı siz də müstəsna səlahiyyətinizdən istifadə edib məni azad edin”. Saleh Rüstəmov isə ona qarşı irəli sürülən təqsirləndirmələri rədd edir və 38 gündür ona görə aclıq edir ki, Azərbaycan konstitusiyası və Avropa Konvensiya tərəfindən müəyyən edilmiş azadlıq hüququ tanınsın”, - R. Səfərov qeyd edib.

O bildirib ki, görüşdə, həmçinin, onlarla hərbiçinin və mülki şəxsin dövlətə xəyanətdə ittiham olunduğu "Tərtər hadisələri" və Azərbaycan Xalq Cəbhəsi Partiyasının fəalı, Gəncədə narkotik maddələrin qanunsuz dövriyyəsi ittihamı ilə həbs edilmiş Şahin Hacıyevin məsələsinə də toxunulub.