Bayden Administrasiyası gələn həftə keçiriləcək Demokratiya Sammitində iştirakla bağlı 120 dünya liderinə dəvətnamə göndərib. Xəbəri Turan-ın Vaşinqtondakı müxbiri verir. 

Xəbərdə deyilir ki, dəvətlilər arasında Azərbaycanın adı yoxdur. 

"Biz 2021-ci ilin dekabrında ilk sammitə dəvət olunmuş hökumətləri və tərəfdaşlarımızı yenidən dəvət etdik, həmçinin bütün dünyadan səkkiz yeni hökumət əlavə etdik", - deyə ABŞ prezidentinin xüsusi köməkçisi Rob Berşinski brifinqdə bildirib. 

Onun sözlərinə görə, yeni dəvətlilər Bosniya və Herseqovina, Lixtenşteyn, Kot-d'İvuar, Qambiya, Mavritaniya, Mozambik, Tanzaniya və Hondurasdır. 

Berşinskinin sözlərinə görə, sammitin hədəfi demokratik institutların möhkəmlənməsi, korrupsiyaya qarşı mübarizəyə və insan hüquqlarının müdafiəsidir.

Bayden Administrasiyası gələn həftə demokratiya və hüquq müdafiəsi haqqında bir sıra yeni təşəbbüsləri açıqlamalıdır. Eyni zamanda azad və müstəqil KİV-lərin dəstəklənməsi, korrupsiyaya qarşı mübarizə, demokratik islahatların və hüquq müdafiəçilərinin dəstəklənməsi, azad və ədalətli seçkilərin müdafiəsi üzrə yeni və mövcud təşəbbüslər üçün 400 milyon dollar ayrılması gözlənilir.  

Azərbaycana və dəvət olunmayan digər ölkələrə gəlincə, Berşinskinin sözlərinə görə, Vaşinqtonun bu ölkələrin xalqlarına müraciəti açıqdır:

"Dəvət olunmayan ölkələrin fəallarına demək istərdik ki, onlar bu prosesdə özünəməxsus şəkildə iştirak edirlər. Onların da demokratiya dəyərlərinin təşviqində iştirak etmək imkanı olacaq”.

Onun sözlərinə götə, Demokratiya Sammitinin mahiyyəti demokratiyaya töhfə verən bütün iştirakçıları onun dəyərlərinin daha yaxşı təşviqi üzrə öhdəliklər götürməyə vadar etməkdən ibarətdir və bu, təkcə hökumətlərlə məhdudlaşmır. 

ABŞ-ın 2021-ci ilin dekabrında keçirdiyi Demokratiya Sammitinə Rusiya, Türkiyə, Azərbaycan və bəzi ölkə başçıları dəvət olunmamışdılar. 

Bakı bu addımı tənqid etmişdi. Prezident İlham Əliyev yerli mediaya müsahibəsində Azərbaycanın deyil, Ermənistanın sammitə dəvət edilməsini ayrıseçkilik kimi dəyərləndirmişdi.

Hakimiyyətin tənqidçilərisə Azərbaycanın tədbirə dəvət olunmamasını onun insan hüquqlarını, təməl azadlıqları pozması ilə izah etmişdilər.