BMT-nin baş katibi Antonio Quterreş Laçın dəhlizində Ermənistanı Qarabağla birləşdirən yolun qapadılmasından narahat olduğunu bildirib. 

Toplum TV xəbər verir ki, bu barədə təşkilatın yaydığı məlumatda deyilir.

Quterreş tərəfləri gərginliyi azaltmağa, daha əvvəl əldə edilmiş razılaşmalara uyğun olaraq dəhliz boyunca sərbəst və təhlükəsiz hərəkəti təmin etməyə çağırıb.

Baş katib regionda vəziyyətin nizamlanması üçün edilən cəhdləri dəstəklədiyini bir daha təsdiqləyib.

https://toplum.tv/siyaset/pqarabagda-seperatccedililar-herbi-veziyyet-elan-etdip

Bundan əvvəl ABŞ, Avropa İttifaqı və Fransa Şuşa yolunda keçirilən aksiya səbəbindən dəhlizin bağlanmasından narahat olduqlarını bildirmişdilər. 

Azərbaycan Xarici İşlər Nazirliyi isə öz növbəsində Aİ-nin və adı sadalanan ölkələrin mövqeyini tənqid etmiş, Şuşa-Laçın yolunda keçirilən aksiyaya haqq qazadırmışdı:

"Azərbaycan vətəndaş cəmiyyətinin nümayəndələrinin və ekologiya fəallarının Şuşa-Laçın yolunda son bir neçə gün ərzində həyata keçirdiyi etiraz aksiyası qeyd olunan qeyri-qanuni fəaliyyətlərə qarşı Azərbaycan ictimaiyyətinin haqlı narazılığının nəticəsidir və vətəndaş cəmiyyətinin bu mövqeyinə hörmətlə yanaşılmalıdır. Bu etiraz aksiyasının məqsədi hər hansı bir yolun bağlanması deyil və yoldan mülki təyinatlı nəqliyyat vasitələri sərbəst şəkildə hər iki istiqamətdə hərəkət edə bilərlər.

Bölgədə humanitar vəziyyətə gəldikdə bir daha bəyan edirik ki, Azərbaycan tərəfi ərazilərimizdə yaşayan erməni sakinlərin humanitar ehtiyaclarını qarşılamağa hazırdır”.

Azərbaycan fəallarının Şuşa-Xankəndi yolunda keçirilən etiraz aksiyası artıq 4 gündür davam edir. Yerli KİV aksiya iştirakçılarının sayının artmaqda olduğunu və paytaxtdan aksiyanın keçirildiyi Şuşa-Xankəndi yoluna ictimai fəalların axınının davam etdiyini yazır. 

Azərbaycanlı etirazçılar Rusiya sülhməramlılarının nəzarəti altında olan ərazilərdə təbii sərvətlərin qanunsuz istismarına qarşı çıxır, azərbaycanlı mütəxəssislərin mədənlərin monitorinqini aparmasına imkan yaradılmasını tələb edirlər. Onlardan bəziləri mətbuata açıqlamalarında Rusiya sülhməramlı qüvvələrinin komandanı Andrey Volkov əraziyə gələnə qədər etirazlarını davam etdirəcəklərini bildiriblər.