"Fransanı Korsikada insan haqlarını qorumağa çağırırıq, məsələni BMT-də qaldırmaq lazımdır"

Toplum TV xəbər verir ki, bu sözləri dekabrın 20-də Milli Məclisin Beynəlxalq münasibətlər və parlamentlərarası əlaqələr komitəsinin sədri Səməd Seyidov deyib. 

Deputatın sözlərinə görə, Fransa Azərbaycana insan hüquqları sahəsində dərs keçmək istəyir, amma özü daxilində bunu pozur:

“Fransa bu gün Korsikada tamamilə insanlığa qarşı siyasət aparır. Orada insanlar öz dillərində danışmaq istəyirlər. Buna cavab olaraq Fransa silah gücünə o insanları öldürür, polis vasitəsilə ağlasığmaz işgəncələr verir. Onlar öz siyasi opponentlərini həbsxanalarda öldürtdürürlər".

https://toplum.tv/siyaset/pbmt-tehluumlkesizlik-surasi-laccedilin-dehlizindeki-veziyyeti-muumlzakire-edecekp

Seyidov bütün bunlara görə də Fransanın Azərbaycanda separatçı qüvvələri dəstəkləməyə haqqının olmadığını vurğulayıb: "Bu gün Fransanı Korsikada insan haqlarını qorumağa çağırırıq. Bu məsələni BMT-də də qaldırmaq lazımdır".

Digər deputat Musa Qasımlı da Fransa barəsində oxşar çıxış edib. Onun sözlərinə görə, BMT Təhlükəsizlik Şurasının daimi üzvü olan Fransanın insan haqlarından danışmağa haqqı yoxdur: “Fransanın bütün tarixi göz yaşları, müstəmləkəçilik tarixidir. Bunlardan biri də Korsikadır. Korsikada insanlar sadəcə dil, mədəniyyət istəyirlər. Fransa beynəlxalq hüquqları və konvensiyaları pozur, Korsika xalqının hüquqlarını tanımır, eyni zamanda Ermənistanda terroru müdafiə edir. Ona görə də Fransanı bütün beynəlxalq təşkilatlarda qınamalıyıq”.

Öz növbəsində deputat Elman Nəsirov da Fransanın korsikalıların səsini boğduğunu vurğulayıb. 

“Fransanın Korsikada illərdir törətdiyi cinayətlərə görə cəzasız qalması Makronda arxayınlıq yaradıb. Fransa üçün yaxşı və pis terrorçu bölgüsü var. Qarabağda Araik Arutyunyan yaxşı terrorçu hesab olunur, dəstək alır, amma Korsikada isə pis terrorçular həbsxanalara atılır. Bu, ikili standartların ən bariz nümunəsidir”, - APA deputatın çıxışından sitat gətirib. 

Bu gün məlum olub ki, Laçın dəhlizi ilə bağlı vəziyyət BMT-nin Təhlükəsizlik Şurasında müzakirə ediləcək. Qərarın Ermənistanın xahişi ilə verildiyi bildirilir. Ermənistan hakimiyyəti və Qarabağ seperatçıları Azərbaycan fəallarının Laçın-Xankəndi yolunda keçirdikləri aksiyadan şikayətçidirlər. Onlar Azərbaycan tərəfinin Laçın dəhlizini bağladığını və Qarabağın erməni əhalisini humanitar böhrana sürüklədiyini iddia edirlər. Azərbaycan tərəfi isə bu iddiaları rədd edir, Qarabağ ermənilərinə humanitar yardım etməyə hazır olduğunu vurğulayır.

Azərbaycan fəallarının Şuşa-Xankəndi yolunda keçirilən etiraz aksiyası dekabrın 12-dən bəri davam edir. 

Etirazçılar Rusiya sülhməramlılarının nəzarəti altında olan ərazilərdə təbii sərvətlərin qanunsuz istismarına qarşı çıxır, azərbaycanlı mütəxəssislərin mədənlərin monitorinqini aparmasına imkan yaradılmasını tələb edirlər.