Ermənistan Kollektiv Təhlükəsizlik Müqaviləsi Təşkilatının (KTMT) təlimlərini keçirməkdən imtina edib. 

Toplum TV xəbər verir ki, bu barədə Baş nazir Nikol Paşinyan yanvarın 10-da keçirdiyi mətbuat konfransında bildirib.

“Ermənistanın müdafiə naziri artıq KTMT-dəki həmkarlarına yazılı şəkildə məlumat verib ki, bu vəziyyətdə Ermənistanda KTMT təlimlərinin keçirilməsini məqsədəuyğun hesab etmirik. Bu təlimlər ən azı bu il Ermənistanda keçirilməyəcək”, - deyə o bildirib. 

https://toplum.tv/siyaset/pnbspktmt-quotlaccedilin-dehlizi-problemi-mesuliyyet-zonamizdan-kenardadirquotp

Baş nazir deyib ki, 2021-ci ilin mayında "Azərbaycan Ermənistan ərazisinə təcavüz edəndə" Yerevan tərəfdaşlardan, xüsusən də Rusiyadan konkret addımlar gözləyib:

"Müraciətlərimizə verilən cavabda bildirildi ki, Ermənistanla Azərbaycan arasındakı sərhəddə delimitasiya aparılmayıb. Sual yarandı ki, o qırmızı xətt haradan keçir? Əlaqələrin bundan sonrakı inkişafı üçün qırmızı xəttin harada keçdiyini və məsuliyyət sahəsinin harada olduğunu biz bilməliyik”.

Bundan əvvəl KTMT-nin “Sarsılmaz qardaşlıq - 2023” təlimlərinin Ermənistan Respublikası ərazisində keçirilməsi planlaşdırılırdı. 

Paşinyan ötən ilin noyabr ayında KTMT-nin Yerevanda keçirilən sammitinin yekunu üzrə bəyannaməni imzalamaqdan imtina etmişdi. 

Baş nazir bunu sənəddə Azərbaycanın Ermənistanın ərazi bütövlüyünə qarşı “təcavüz”ünün siyasi qiymətləndirilməsinin olmaması ilə izah etmişdi.

"Bu çox üzücü haldır ki, Ermənistanın KTMT-yə üzv olması Azərbaycanı aqressiv hərəkətlərdən çəkindirməyib və üstəlik faktiki olaraq, biz bu günə kimi Azərbaycanın Ermənistana qarşı təcavüzünə KTMT-nin necə reaksiya verəcəyi ilə bağlı bir qərara gələ bilməmişik. Bu faktlar həm ölkə daxilində, həm də xaricdə KTMT-nin imicinə böyük zərbə vurur və mən bunu Ermənistanın KTMT-də sədrliyinin əsas uğursuzluğu kimi qiymətləndirirəm. Müttəfiqlərimiz - Qırğızıstan və Tacikistan arasında sərhəddə eskalasiya faktları barədə də eyni sözləri deyə bilərəm", - deyə Paşinyan sammitdəki çıxışı zamanı bildirmişdi.