Həbsdə olan jurnalist Əvəz Zeynallı Dövlət Təhlükəsizliyi Xidmətinin istintaq təcridxanasından Penitensiar Xidmətin Bakı İstintaq Təcridxanasına köçürülür. 

Toplum TV xəbər verir ki, bu barədə Zeynallının həyat yoldaşı Məlahət Qisuri məlumat verib. 

"Turan"-a açıqlama verən Qisuri həmçinin bildirib ki, sabah ona həyat yoldaşı ilə görüşə icazə veriləcəyi də deyilib. 

https://toplum.tv/siyaset/pheyat-yoldasi-evez-zeynalli-tecili-emeliyyat-olunmalidirp

Bu qərarlar Qisuri Baş Prokurorluğun İstintaq İdarəsinin binası qarşısında etiraz aksiyası keçirməsindən sonra verilib. 

Aksiyada o, Zeynallanın istintaq təcridxanasından telefonla danışmasına və qohumları ilə görüşünə qoyulan qadağanın ləğvini, evlərində axtarış zamanı götürülən ofis avadanlığının, habelə ailənin övladlarının təhsili üçün nəzərdə tutulan pulların geri qaytarılmasını tələb edib. Bundan əlavə, Qisuri jurnalistin katarakta əməliyyatı olması üçün şəraitin yaradılmasını tələb edib. 

Aksiyadan sonra onu İstintaq İdarəsinə, rəis müavini Qasım Məmmədov ilə qəbula dəvət ediblər.

Sabah Qisuri öz kompüterini, diktofonunu və mobil telefonunu ala biləcək. Amma pul vəsaitinin qaytarılması məsələsi həllini tapmayıb.

“Bu pul Avropa İnsan Hüquqları Məhkəməsinin qərarı əsasında Əvəzu Zeynallıya təyin edilmiş kompensasiyadır. Amma prokurorluqda deyirlər ki, siz pulu apreldə aldınız və sentyabra qədər xərcləməliydiniz. Arqument yumşaq desək, tutarlı deyil. Biz ailə büdcəsini özümüz idarə edirik və uşaqlarımızın təhsil haqqını ödəmək üçün pul saxlamışıq”, - Qisuri deyib.

Göz əməliyyatına gəlincə, prokurorluqdan bildiriblər ki, bu məsələ qurumun səlahiyyətində deyil. Bununla bağlı Qisuri Penitensiar Xidmətə müraciət etmək niyyətindədir. Həmçinin Zeynallının ev dustaqlığına keçirilməsi barədə vəsatət verilib.

"Xural TV" saytının təsisçisi Əvəz Zeynallı sentyabrın 10-da rüşvət almaqda ittiham edilərək saxlanılıb. Sentyabrın 11-də o, məhkəmənin qərarı ilə həbs edilib.

Sonradan jurnalistə qarşı CM-in 312-1.1-ci (vəzifəli şəxsin qərarına qanunsuz təsir göstərmə (nüfuz alveri)) maddəsi ilə yeni ittiham irəli sürülüb. Dekabrın 29-da onun həbs müddəti daha 3 ay uzadılıb.