Ermənistanın baş naziri hesab edir ki, Bakı və beynəlxalq tərəfdaşlar İlham Əliyevin verdiyi açıqlamaların Brüssel razılaşmalarından imtina demək olub-olmadığını aydınlaşdırmalıdırlar. 

Toplum Tv xəbər verir ki, İlham Əliyev mayın 28-də Laçında verdiyi açıqlamada Qarabağ seperatçılarına səslənmiş, erməni “məmurlar”a hansı hallarda güzəşt oluna biləcəyini açıqlamışdı. 

“Hər kəs yaxşı bilir ki, bu gün o bölgədə (Qarabağ – red.) istənilən əməliyyatı keçirmək üçün hər bir imkanımız var. Ona görə “parlament” buraxılmalıdır, özünü “prezident” adlandıran ünsür təslim olmalıdır, bütün “nazirlər”, “deputatlar” və digərləri öz vəzifələrini artıq kənara qoymalıdırlar. Ancaq o təqdirdə onlara güzəşt oluna bilər. Ancaq o təqdirdə hər hansı bir amnistiyadan söhbət gedə bilər”.

https://toplum.tv/siyaset/pnikol-pasinyanla-ilham-eliyev-arasinda-muumlbahisep

Mayın 29-da parlamentdə çıxış edən Nikol Paşinyanın sözlərinə görə, Əliyevin bəyanatların mətni Brüssel razılaşmalarından imtinaya çox yaxındır. "Amma mən şərh vermək istəmirəm. Bundan sonrakı hərəkətlərimizi başa düşmək üçün bizə aydınlıq lazımdır", - deyə o qeyd edib.  

Hökumət başçısı həmçinin "Laçın dəhlizinə qoyulan blokun" açılması ilə bağlı Moskva müzakirələrinin nəticələrindən razı olmadığını dilə gətirib. O, "yolun bağlanmasının" Rusiya sülhməramlılarının iştirakı ilə baş verməsindən narahat olduğunu bildirib. 

"Yerevan Dağlıq Qarabağdakı humanitar vəziyyətin həlli və Laçın dəhlizinin blokunun açılması üçün müzakirələri davam etdirəcək",  -deyə Paşinyan qeyd edib. 
Onun sözlərinə görə, Yerevan ölkənin suverenliyi və yurisdiksiyası prinsipi əsasında kommunikasiyaların açılmasına hazırdır, hazırda dəmir yolunda işlər gedir.

Baş nazir onu da bildirib ki, hələlik Ermənistan və Azərbaycan arasında razılaşdırılmış və imzalanmağa hazır sülh müqaviləsi yoxdur. O, həmçinin iyunun 1-də Moldovanın paytaxtı Kişinyovda keçiriləcək Avropa Siyasi Birliyinin (AST) Sammiti çərçivəsində iki ölkə arasında sülh sazişinin bağlanması ehtimalını da təkzib edib. 

"Ermənistan tərəfi Vaşinqton görüşündən əvvəl verdiyi təkliflərə hələ də Azərbaycandan cavab almayıb. Bu, sənədin dördüncü nəşridir, lakin hələlik heç bir cavab yoxdur”, - deyə o qeyd edib.