"Azərbaycan nümayəndələri ilə görüşlər Rusiya sülhməramlılarının vasitəçiliyi ilə və əvvəlki görüşün baş tutduğu yerdə keçirilə bilər".

Toplum TV "Azadlıq Radiosu"nun erməni redaksiyasına istinadən xəbər verir ki, bu barədə qondarma "Dağlıq Qarabağ Respublikasının xarici işlər nazirliyi" məlumat yayıb. 

Separatçılar həmçinin humanitar, infrastruktur və texniki məsələlərin “həddindən artıq siyasiləşdirilməməsi” şərtiylə iclasın gündəliyinə salınmasını tələb edirlər.

Azərbaycan hökumətinin Qarabağın erməni nümayəndələrini “reinteqrasiya ilə bağlı növbəti müzakirə” üçün Bakıya dəvət etməsinə isə qondarma "Dağlıq Qarabağ Respublikasının xarici işlər nazirliyi" belə cavab verib:

"Münaqişənin həllinə yönəlmiş danışıqlar beynəlxalq səviyyədə tanınmış və təsdiq edilmiş formatda “tərəflərin bərabərliyinə və üzərlərinə götürdükləri öhdəliklərin yerinə yetirilməsinə dair beynəlxalq təminatlar əsasında” aparılmalıdır".

Bakıda reinteqrasiya üçün görüşmək təklifinə qondarma respublikanın "parlamenti" də qarşı çıxıb. 

Qondarma "Dağlıq Qarabağ Respublikası parlamentinin müdafiə və təhlükəsizlik Komissiyasının sədri" Seyran Ayrapetyan “Azatutyun” radiosuna deyib ki, onlar Bakının təklifini qəbul etmirlər. 

"Qarabağın müstəqilliyinin alternativi yoxdur və əgər Azərbaycan Prezidenti İlham Əliyev "Dağlıq Qarabağın prezidenti Arayik Arutyunyanı" üçüncü ölkədə Qarabağın öz müqəddəratını təyin etməsi bağlı məsələnin müzakirəsi üçün görüşə dəvət edərsə, onlar görüşə hazırdırlar", - Ayrapetyan deyib. 

O həmçinin bildirib ki, inteqrasiya, reinteqrasiya - məsələnin cür qoyuluşu dərhal rədd edilir. 

"Biz, reinteqrasiya və ya inteqrasiya haqqında deyil, öz müqəddəratını təyinetmə hüququmuzun tanınması və digər məsələlərlə bağlı danışıqlar apara bilərik”.

https://toplum.tv/siyaset/pputin-ve-pasinyan-azerbaycanla-suumllh-muumlqavilesini-muumlzakire-edibp

Xatırlatma

Martın 13-də Azərbaycan Prezident Administrasiyası Qarabağın erməni ictimaiyyətinin nümayəndələrini Bakıda ikinci görüş keçirməyə dəvət edib. 

Məlumata görə, Qarabağın erməni ictimaiyyətinin nümayəndələrini Bakıya reinteqrasiya ilə bağlı təmasların davam etdirilməsi, habelə Qarabağda infrastruktur layihələrinin reallaşdırılması məsələlərinin müzakirəsi üçün dəvət edilib.

Azərbaycan rəsmiləriylə Qarabağ ermənilərinin təmsilçiləri arasındakı ilk görüş martın 1-də Xocalı şəhərində Rusiya sülhməramlı kontingentinin qərargahında baş tutmuşdu. 

Bildirilirdi ki, görüş zamanı Azərbaycan qanunvericiliyinə uyğun olaraq Qarabağ bölgəsində yaşayan erməni sakinlərin Azərbaycan Respublikasına reinteqrasiyasına dair müzakirələr aparılıb.

Bu məlumatın yayılmasından sonra Qarabağ seperatçılarının liderləri reinteqrasiyası mövzusunun müzakirə olunması xəbərini təkzib etmişdilər.