Yanvarın 29-u gecə radələrində Azərbaycanın İrandakı səfirliyinə edilən silahlı hücum nəticəsində həlak olan baş leytenant Orxan Əsgərovun cənazəsi Azərbaycana gətirilib. Heydər Əliyev hava limanına enən təyyarədə həmçinin Tehrandakı səfirlikdən təxliyyə edilən heyət üzvləri də olub. 

Toplum TV Xarici İşlər Nazirliyinə (XİN) istinadən xəbər verir ki, Orxan Əsgərov bu gün saat 12:00-da II Şəhidlər xiyabanında dəfn olunacaq.

Dünən axşam hava limanında jurnalistlərə açıqlama verən xarici işlər nazirinin müavini Xələf Xələfov baş vermiş hadisənin Azərbaycan-İran münasibətlərinə ziyan vurduğunu bəyan edib. 

https://toplum.tv/siyaset/piran-prezidenti-ilham-eliyeve-zeng-etdip

Xələfov açıqlamasında vurğulayıb ki, Azərbaycanın İrandakı səfirliyinin diplomatik fəaliyyəti tamamilə dayandırılıb. 

Onun sözlərinə görə, bu hadisənin baş verməsiylə Azərbaycan ilk dəfə qonşu dövlətdən şəhid alıb. 

"Azərbaycan səfirliyi ilk dəfə şəhid aldı. Həm şəhid Orxan Əsgərov, həm də yaralananlar öz qanları bahasına terror aktının daha ağır nəticələr verməsinin qarşısını ala bildilər. Onlar qəhrəmanlıq göstərdilər. Onlar Azərbaycan Respublikasının suverenliyi, müstəqilliyi uğrunda canlarından keçdilər, xəsarət aldılar".

Xələfov həmçinin qeyd edib ki, hansısa ölkədə diplomatik fəaliyyəti dayandırmaq məsuliyyətli qərardır:

"Amma səfirliyimizin əməkdaşlarının təhlükəsizliyinin təminatı ilə bağlı İran tərəfinə ümidimiz və etibarımız yoxdur".

Rəsmi Azərbaycan tərəfinin təhlükəsizliyin təminatı ilə bağlı qayğılarını dəfələrlə qarşı tərəfə çatdırdığını, amma buna biganə yanaşıldığını qeyd edib. 

O, baş vermiş terror hadisəsi və onun ağır nəticələri ilə əlaqədar İranın bir dövlət kimi məsuliyyət daşıdığını sözlərinə əlavə edib. Xələfov həmçinin qeyd edib ki, hadisənin məişət zəminində baş verməsinə dair iddialar abdurddur, çünki bunun əksini sübut edən kifayət qədər sübutlar var: 

“Hadisə baş verəndən dərhal sonra İranın bəzi qurumları terror aktının guya məişət zəminində baş verməyini sırımağa çalışdılar. Bu absurddur və ictimai fikri məsələnin əsas mahiyyətindən uzaqlaşdırır. Amma biləsiniz ki, bizim müvafiq orqanlarımızda cinayətin baş verməsi ilə bağlı kifayət qədər tutarlı sübutlar, materiallar var. Ona görə biz İran tərəfindən tələb edəcəyik ki, istintaq ədalətli aparılsın. Bu işdə əli olan, bu cinayəti törətmiş bütün insanlar ədalət mühakiməsinə cəlb olunmalıdır və öz layiqli cəzasını almalıdır”.

Xələfov Tehrandakı səfirlik diplomatik fəaliyyətini dayandırsa da, qərarın Azərbaycanın Təbrizdəki baş konsulluğunun fəaliyyətinə şamil olunmadığını bildirib. Bununla belə o, vurğulayıb ki, konsulluğun təhlükəsizliyinin təminatına Tehran cavabdehdir. 

Xatırlatma

Azərbaycanın Tehrandakı səfirliyinə hücum yanvarın 27-si səhər saat 8.30 radələrində baş verib.

Silahlı şəxs mühafizə postunu yararaq səfirliyə daxil olub. O, səfirliyin mühafizə xidmətinin rəhbərini qətlə yetirib, daha iki nəfəri isə yaralayıb. 

Hadisə barəsində Azərbaycan Dövlət Təhlükəsizliyi Xidmətində cinayət işi başlanılıb. 

ABŞ, Böyük Britaniya, İsrail, Ukrayna, Rusiya, Türkiyə və digər ölkələr Azərbaycanın İrandakı səfirliyinə hücumu pisləyiblər.